Mirrors In Elevator: లిఫ్టులలో అద్దాలు ఎందుకు ఉంటాయో తెలుసా? సెల్ఫీల కోసం అస్సలు కాదు.. కారణం ఇదే!

లిఫ్టులలో అద్దాలను అమర్చడం అనేది కేవలం ఆధునిక డిజైన్ మాత్రమే కాదు, దీని వెనుక ఎలివేటర్ ఇంజినీర్లు , మానసిక నిపుణులు కలిసి ఆలోచించి డిజైన్ చేసిన ఒక అద్భుతమైన ట్రిక్ దాగి ఉంది. ప్రయాణికులకు ప్రయాణం సురక్షితంగా , సౌకర్యవంతంగా అనిపించేలా చేయడంలో ఈ అద్దాలు ఎలా ఉపయోగపడతాయో ఇప్పుడు చూద్దాం.

1. క్లాస్ట్రోఫోబియా భయాన్ని తగ్గిస్తుంది ఎలివేటర్లు అనేవి సాధారణంగా చాలా చిన్నవిగా, నాలుగు వైపులా పూర్తిగా క్లోజ్ చేసిన ఇరుకైన ప్రదేశాలు. పైగా అందులో అపరిచిత వ్యక్తులు గుంపుగా ప్రయాణిస్తుంటారు. కొంతమందికి ఇలాంటి క్లోజ్డ్ ప్రదేశాలలో ఉన్నప్పుడు ఊపిరాడనట్లుగా అనిపించడం, గుండె వేగం పెరగడం లేదా ఒక రకమైన తెలియని భయం కలుగుతుంది. ఈ మానసిక స్థితిని వైద్య పరిభాషలో ‘క్లాస్ట్రోఫోబియా’ (మూసి ఉన్న ప్రదేశాల భయం) అంటారు. ఇటువంటి పరిస్థితులలో లిఫ్ట్ గోడలకు అద్దాలను అమర్చడం వల్ల ఆ అద్దాల ప్రతిబింబం కారణంగా చిన్న లిఫ్ట్ కూడా లోపల చాలా పెద్దదిగా, విశాలంగా ఉన్నట్లు కనిపిస్తుంది. దీనివల్ల ప్రయాణికులలో ఊపిరాడకపోవడం అనే భ్రమ తగ్గి, మానసిక ప్రశాంతత లభిస్తుంది.

2. లిఫ్టులు ప్రకాశవంతంగా, విశాలంగా కనిపించేలా చేయడం ఇంటీరియర్ డిజైనింగ్ సూత్రాల ప్రకారం, చిన్న ప్రదేశాలను పెద్దవిగా చూపించడానికి అద్దాలు అద్భుతంగా సహాయపడతాయి. లిఫ్ట్ లోపల ఉండే బల్బుల వెలుతురు అద్దాలపై పడినప్పుడు ఆ కాంతి పరావర్తనం చెంది లోపలి భాగమంతా చాలా ప్రకాశవంతంగా , మరింత స్పేస్ ఉన్నట్లుగా భ్రమను కలిగిస్తుంది. ఒకవేళ అద్దాలు లేకపోతే లిఫ్టులు చీకటిగా, ఇరుకుగా , ఒక ఇనుప పెట్టెలా అనిపించి ప్రయాణికులలో ఒత్తిడిని పెంచుతాయి.

3. కాలక్షేపం.. విసుగును తగ్గించడం ఎలివేటర్ల ప్రారంభ కాలంలో, లిఫ్ట్ ప్రయాణానికి చాలా ఎక్కువ సమయం పడుతోందని , చాలా నెమ్మదిగా కదులుతున్నాయని ప్రజలు ఇంజినీర్లకు పదేపదే ఫిర్యాదు చేసేవారు. అయితే ఇంజినీర్లు దీనిపై పరిశోధన చేయగా అసలు సమస్య లిఫ్ట్ వేగం కాదని, ఆ కొద్ది సెకన్ల పాటు లిఫ్ట్ లోపల ఖాళీగా నిలబడటంలో వచ్చే విసుగు అని తేలింది. లిఫ్ట్ కదులుతున్నప్పుడు ఎటు చూడాలో తెలియక ప్రజలు ఇబ్బంది పడేవారు. అందుకే వారి దృష్టిని మరల్చడానికి లిఫ్టులలో అద్దాలను ఏర్పాటు చేశారు. అద్దాలు పెట్టిన తర్వాత ప్రజలు అందులో తమ ముఖాన్ని చూసుకోవడం, బట్టలు సరిచేసుకోవడం లేదా పక్కన ఉన్నవారిని గమనించడంలో బిజీ అయిపోయారు. దీనివల్ల ప్రయాణ సమయం చాలా వేగంగా గడచిపోయినట్లు అనిపించి, వేగం గురించిన ఫిర్యాదులు పూర్తిగా ఆగిపోయాయి.

4. వీల్‌చైర్ వినియోగదారులకు అద్భుతమైన భద్రత ఎలివేటర్లలోని అద్దాలు వీల్‌చైర్ ఉపయోగించే శారీరక వికలాంగులకు , వృద్ధులకు ఒక గొప్ప వరంగా పనిచేస్తాయి. వీల్‌చైర్‌తో లిఫ్ట్ లోపలికి ప్రవేశించిన వారు, తిరిగి బయటకు వచ్చేటప్పుడు లిఫ్ట్ ఇరుకుగా ఉండటం వల్ల వారి కుర్చీని వెనక్కి తిప్పడం చాలా కష్టమవుతుంది. అలాంటి సమయంలో ఎదురుగా ఉన్న అద్దం ద్వారా వారు తమ వెనుక భాగంలో ఏముందో, తలుపులు తెరుచుకున్నాయో లేదో స్పష్టంగా చూసుకోగలరు. ఎవరి సహాయం లేకుండానే కేవలం అద్దం సహాయంతో వీల్‌చైర్‌ని రివర్స్‌లో సురక్షితంగా బయటకు తీసుకురావచ్చు. ఇది వారి భద్రతను, ఆత్మవిశ్వాసాన్ని రెండింటినీ పెంచుతుంది.