నిజమా.. ఒక్క తెల్ల వెంట్రుకను పీకితే 10 మొలుస్తాయా..? అసలు వాస్తవాలు తెలుసుకోండి..

తలలో ఒకటి రెండు తెల్ల వెంట్రుకలు కనిపించగానే టక్కున పీకేస్తున్నారా? అయితే మీరు పెద్ద పొరపాటే చేస్తున్నారు.. తెల్ల వెంట్రుకను పీకితే మరిన్ని తెల్ల వెంట్రుకలు వస్తాయన్నది ఎంతవరకు నిజమో పక్కన పెడితే.. అలా పీకడం వల్ల మరో నష్టం ఉంది. అసలు తెల్ల వెంట్రుకలు ఎందుకు వస్తాయి..? అనే విషయాలు ఈ స్టోరీలో తెలుసుకుందాం..

Does Plucking Grey Hair Cause More To Grow

Krishna S |
Updated on: Aug 15, 2026 | 9:40 PM

ఈ రోజుల్లో వయసుతో సంబంధం లేకుండా చాలామందిని వేధిస్తున్న ప్రధాన సమస్యల్లో తెల్ల జుట్టు ఒకటి. గతంలో వృద్ధాప్యానికి సంకేతంగా భావించినా.. నేడు కాలుష్యం, పోషకాహార లోపం, ధూమపానం, పెర్నిషియస్ అనీమియా, జన్యుపరమైన సమస్యల వల్ల చిన్న వయసులోనే జుట్టు నెరిసిపోతుంది. తలలో కొన్ని తెల్ల వెంట్రుకలు కనిపించగానే వాటిని పీకేసే అలవాటు చాలామందిలో ఉంటుంది. అయితే దీనివల్ల మరిన్ని తెల్ల వెంట్రుకలు వస్తాయన్న ప్రచారం ఎంతవరకు నిజం? అసలు జుట్టు ఎందుకు తెల్లబడుతుంది? అనే డౌట్లు చాలా మందికి ఉంటాయి.

తెల్ల వెంట్రుకను పీకితే మరిన్ని పెరుగుతాయా?

ఒక తెల్ల వెంట్రుకను పీకితే మరిన్ని తెల్ల వెంట్రుకలు వస్తాయనే మాటకు ఎటువంటి శాస్త్రీయ ఆధారం లేదు. వెంట్రుకల కుదుళ్లలో ఉండే మెలనోసైట్స్ అనే కణాలు మెలనిన్‌ను ఉత్పత్తి చేస్తాయి. మెలనిన్ వల్లనే జుట్టు నల్లగా కనిపిస్తుంది. వయసు పెరిగే కొద్దీ లేదా పోషకాల లోపం వల్ల మెలనిన్ ఉత్పత్తి తగ్గినప్పుడు జుట్టు నెరుస్తుంది. ఒక కుదురు నుంచి తెల్ల వెంట్రుకను పీకినంత మాత్రాన అక్కడ మెలనిన్ ఉత్పత్తి తిరిగి ప్రారంభం కాదు. కాబట్టి అక్కడ మళ్లీ తెల్ల వెంట్రుక మాత్రమే వస్తుంది తప్ప, పక్కన ఉన్న వెంట్రుకలు తెల్లబడవు. కానీ వెంట్రుకలను పీకడం వల్ల కుదుళ్లు తీవ్రంగా దెబ్బతింటాయి. పదే పదే పీకడం వల్ల ఆ ప్రదేశంలో కొత్త జుట్టు పెరగడం పూర్తిగా ఆగిపోయి బట్టతల వచ్చే ప్రమాదం ఉంది.