నడి సముద్రంలో మూడు వేల కోట్ల డ్రగ్స్.. గుజరాత్ ATS, భారత తీర రక్షక దళం సంయుక్త ఆపరేషన్
అరేబియా సముద్రంలో గుజరాత్ ATS, భారత తీర రక్షక దళం సంయుక్తంగా నిర్వహించిన ఆపరేషన్లో భారీగా మాదకద్రవ్యాలు పట్టుబడ్డాయి. సుమారు 526 కిలోల హెరాయిన్, మెథాంఫేటమిన్ను స్వాధీనం చేసుకోగా.. వీటి విలువ అంతర్జాతీయ మార్కెట్లో రూ.3 వేల కోట్లకు పైగా ఉంటుందని అధికారులు అంచనా వేశారు.
Updated on: Sep 30, 2026 | 12:33 PM
భారత సముద్ర జలాల్లో మాదకద్రవ్యాల అక్రమ రవాణాకు వ్యతిరేకంగా భద్రతా దళాలు భారీ ఆపరేషన్ నిర్వహించాయి. లక్షద్వీప్కు పశ్చిమాన అరేబియా సముద్రంలో గుజరాత్ ఉగ్రవాద నిరోధక దళం (ATS), భారత తీర రక్షక దళం సంయుక్తంగా చేపట్టిన ఆపరేషన్లో అంతర్జాతీయ డ్రగ్ సిండికేట్కు చెందిన భారీ మొత్తంలో మాదకద్రవ్యాలను స్వాధీనం చేసుకున్నారు. పట్టుబడిన డ్రగ్స్ విలువ అంతర్జాతీయ మార్కెట్లో రూ.3 వేల కోట్లకు పైగా ఉంటుందని అధికారులు అంచనా వేశారు.
పక్కా నిఘా, విశ్వసనీయ సమాచారం ఆధారంగా భద్రతా దళాలు సముద్ర, వాయు మార్గాల్లో ప్రత్యేక నిఘా ఏర్పాటు చేశాయి. సెప్టెంబర్ 25న అరేబియా సముద్రంలో అనుమానాస్పదంగా సంచరిస్తున్న ఓ పడవను గుర్తించిన అధికారులు.. దాన్ని వెంబడించి అదుపులోకి తీసుకున్నారు. పడవలో సుమారు 526 కిలోల హెరాయిన్, మెథాంఫేటమిన్ ఉన్నట్లు గుర్తించి స్వాధీనం చేసుకున్నారు.
ఐదుగురు పాకిస్తానీయులు అరెస్ట్
డ్రగ్స్ను అక్రమంగా తరలిస్తున్న పడవలో ఉన్న ఐదుగురు పాకిస్తానీ జాతీయులను గుజరాత్ ATS అదుపులోకి తీసుకుని అరెస్ట్ చేసింది. పడవ, నిందితులు, స్వాధీనం చేసుకున్న మాదకద్రవ్యాలను తదుపరి విచారణ, న్యాయపరమైన చర్యల కోసం కట్టుదిట్టమైన భద్రత మధ్య ముంబైకి తరలించారు.
భారత సముద్ర జలాల్లో ఎలాంటి అక్రమ రవాణాను ఉపేక్షించబోమని తీర రక్షక దళం స్పష్టం చేసింది. డ్రగ్స్ భారత తీరాలకు చేరకముందే నడిసముద్రంలో అడ్డుకోవడం ద్వారా మాదకద్రవ్యాల అక్రమ రవాణాను నిరోధించడంలో ఈ ఆపరేషన్ కీలకంగా మారింది. సముద్ర సరిహద్దుల రక్షణతో పాటు యువతను మాదకద్రవ్యాల బారిన పడకుండా కాపాడేందుకు భద్రతా దళాలు నిరంతరం అప్రమత్తంగా ఉంటాయని అధికారులు తెలిపారు.
