Chanakya Niti: సక్సెస్ మీ అడ్రస్ వెతుక్కుంటూ రావాలా.. చాణక్యుడి ఈ సీక్రెట్ ఫార్ములా గురించి తెలుసా..?

Chanakya Niti For Success

ఏదైనా పని మొదలుపెట్టినప్పుడు ఆరంభంలో ఉన్న ఉత్సాహం మధ్యలో ఉండదు. చిన్నపాటి అడ్డంకులు రాగానే నిరాశ చెంది, ఆ పనిని సగంలోనే వదిలేస్తుంటాం. కానీ పట్టుదలతో ముందుకు సాగితేనే విజయం సాధ్యమని ఆచార్య చాణక్యుడు అంటారు. మీరు చేసే పనిలో విజయం సాధించడానికి ఆయన సూచించిన 4 ముఖ్యమైన సూత్రాలు ఇవే..

పని మొదలుపెట్టే ముందు 3 ప్రశ్నలు

చాణక్యుడి ప్రకారం.. ఏ పనిని అయినా గుడ్డిగా ప్రారంభించకూడదు. ఏదైనా ప్రాజెక్ట్ లేదా పనిని మొదలుపెట్టే ముందు మిమ్మల్ని మీరు ప్రశ్నించుకోవాలి. నేను ఈ పనిని ఎందుకు చేస్తున్నాను?, దీనివల్ల వచ్చే ఫలితం ఏమిటి?, నేను ఈ పనిలో విజయం సాధించగలనా?, ఈ మూడు ప్రశ్నలకు మీ దగ్గర స్పష్టమైన సమాధానం సమాధానం ఉన్నప్పుడే ఆ పనిని మొదలుపెట్టండి. అప్పుడే మీరు స్పష్టమైన అడుగులు వేయగలరు.

జ్ఞానమే అసలైన పెట్టుబడి

డబ్బు కంటే జ్ఞానమే గొప్ప మూలధనం అని చాణక్యుడు చెబుతాడు. మీకు ఏ రంగంలో అయితే అనుభవం, అవగాహన, విద్య ఉంటుందో.. ఆ రంగంలోనే అడుగు పెట్టండి. ఒక పనిపై మీకు పూర్తి జ్ఞానం ఉంటే మీరు ఆ పనిని ప్రారంభించక ముందే 50 శాతం విజయం సాధించినట్లే లెక్క. తెలియని రంగంలోకి దిగి ప్రయోగాలు చేయడం కంటే తెలిసిన విద్యలో ప్రావీణ్యం సంపాదించడం ఉత్తమం.

మీ ప్లాన్స్‌ను రహస్యంగా ఉంచండి

చాలామంది తాము చేయబోయే పనులను అందరికీ ముందే చెప్పేస్తుంటారు. కానీ చాణక్యుడు తప్పు అని అంటారు. మీ లక్ష్యం పూర్తయ్యే వరకు మీ ప్రణాళికలు రహస్యంగా ఉండాలి. మీ వ్యూహాలు ప్రత్యర్థులకు తెలిస్తే వారు వాటిని నీరుగార్చే ప్రయత్నం చేస్తారు లేదా మీకంటే ముందే వాటిని అమలు చేసి మిమ్మల్ని దెబ్బతీస్తారు. అందుకే విజయం దక్కే వరకు మీ పని నిశ్శబ్దంగా జరగాలి.

ఆత్మవిశ్వాసమే మీ ఆయుధం

యుద్ధంలో గెలవాలన్నా, జీవితంలో గెలవాలన్నా ఆత్మవిశ్వాసం చాలా ముఖ్యం. మీపై మీకు నమ్మకం ఉన్నంత వరకు మిమ్మల్ని ప్రపంచంలో ఎవరూ ఓడించలేరు. విఫలమైనప్పుడు పారిపోకుండా ఎందుకు ఓడిపోయామో విశ్లేషించుకుని, రెట్టింపు ఆత్మవిశ్వాసంతో ప్రయత్నిస్తే విజయం ఖచ్చితంగా వరించి తీరుతుంది.

ఓపిక, పట్టుదల, మొండితనం.. ఈ మూడు ఉంటే సాధ్యం కానిది ఏదీ లేదని చాణక్య నీతి చెబుతోంది. సగంలో వదిలేసే అలవాటును వదిలి, ఆలోచనతో ముందుకు సాగండి.

మరిన్ని లైఫ్‌స్టైల్ న్యూస్ కోసం ఇక్కడ క్లిక్ చేయండి..