Pregnancy: ప్రెగ్నెన్సీ సమయంలో వ్యాయామం చేయొచ్చా.? నిపుణులు ఏమంటున్నారంటే..

ప్రెగ్నెన్సీ సమయంలో మహిళల శరీరంలో ఎన్నో మార్పులు వస్తాయి. హార్మోన్లలో మార్పులు, తీసుకునే ఆహారంలో మార్పుల కారణంగా శరీరంలో మార్పులు జరుగుతుంటాయి. అయితే గర్భిణీలను వ్యాయామం చేయమని నిపుణులు సూచిస్తుంటారు. అయితే ఇదే సమయంలో వ్యాయామం విషయంలో కొన్ని రకాల అపోహలు ఉంటాయి. ఇంతకీ గర్భిణీలు వ్యాయామం చేయడం మంచిదేనా.? ఈ సమయంలో ఎలాంటి జాగ్రత్తలు తీసుకోవాలి లాంటి వివరాలు ఇప్పుడు తెలుసుకుందాం..

గర్భధారణ సమయంలో వ్యాయామం చేయడం మంచిదేనని నిపుణులు చెబుతుంటారు. అయితే కచ్చితంగా నిపుణులు పర్యవేక్షణ, సూచనల మేరకే ఈ పని చేయాలని చెబుతున్నారు. సుఖ ప్రసవం కోసం కొన్ని రకాల వ్యాయామాలు చేయాలని వైద్యులే సూచిస్తుంటారు. గర్భం దాల్చిన సమయంలో వెన్నునొప్పి రావడం సర్వసాధారణం కాబట్టి చిన్న చిన్న వ్యాయామలు చేయాలని నిపుణులు చెబుతున్నారు. కడుపుపై ఎక్కువ భారం పడేవి కాకుండా వాకింగ్‌ను అలవాటు చేసుకోవాలని చెబుతున్నారు.

గర్భిణీలు రోజుకు కనీసం 30 నిమిషాలు నడవాలని సూచిస్తున్నారు. గర్భిణీల్లో హార్మోన్ల అసతుల్యత కారణంగా ఒత్తిడి పెరిగే అవకాశం ఉంటుంది. కాబట్టి యోగా, మెడిటేషన్‌ వంటి వాటిని అలవాటు చేసుకోవాలి. వీటివల్ల మానసిక ఆరోగ్యం మెరుగవుతుంది. పెల్విక్‌ ఫ్లోర్‌ వ్యాయామాలు చేయడం వల్ల గర్భాశయం, మూత్రాశయం, ప్రేగులకు మద్దతు ఇచ్చే కండరాలను బలోపేతం చేస్తాయి.

కడుపులోని బిడ్డ నాడీ వ్యవస్థ చురుగ్గా ఉండేలా కూడా కొన్ని టిప్స్‌ ఉపయోగపడతాయి. స్నానం చేసే సమయంలో కడుపుపై గోరు వెచ్చని నీరు, మరోసారి చల్లటి నీళ్లు పోస్తుండాలి. వాటర్‌ థెరపీ చేయడం వల్ల బిడ్డ నాడీ వ్యవస్థ చురుగ్గా ఉంటుంది. అయితే ఈ సమయంలో చాలా జాగ్రత్తగా ఉండాలి. మరీ వేడి నీరు పోసుకుంటే ఇబ్బందులు వస్తాయి. ఇక గర్భినీలు ఉన్నపలంగా లేవడం, కూర్చోవడం, ఒక్కసారిగా కిందినుంచి పైకి బరువులు ఎత్తడం లాంటి పనులు చేయకూడదు. వ్యాయామాలు చేస్తే చాలా మితంగా చేయాలి. అలసిపోయే దాకా ఎట్టి పరిస్థితుల్లో వ్వాయామం చేయకూడదు.

నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. గర్భిణీలు ఆరోగ్యం విషయంలో అత్యంత జాగ్రత్తగా ఉండాలి. వైద్యుల సూచనల మేరకే వ్యాయామం చేయాలి. రెగ్యులర్‌ చెకప్స్‌ సమయంలో వైద్యుల తెలిపే సూచనలు ఫాలో అవ్వడమే ఉత్తమం.

మరిన్ని లైఫ్‌ స్టైల్‌ వార్తల కోసం క్లిక్‌ చేయండి..