ఫ్లోరిడాలో పెను గాలులు.. గాల్లో తేలియాడిన కార్మికులు

అమెరికాలోని ఫ్లోరిడాలో ఓ విచిత్రం జరిగింది. గత నెల 30 న మధ్యాహ్నం వరకు ఎండ వేడిమి ఉక్కపోతతో అల్లాడారు జనం.  వాతావరణం బాగుండడంతో ఎత్తయిన ఓ భవనం బయటి కిటికీలను శుభ్రపరచేందుకు రెడీ అయ్యారు ఇద్దరు కార్మికులు. పొడవాటి స్టీల్ ప్లాట్ ఫామ్ వంటి దానిపై ఎక్కి అది గాల్లో తేలుతుండగా కిటికీల అద్దాలు తుడవబోయేలోగా ఒక్కసారిగా వాతావరణం మారిపోయింది. పెను గాలులతో తుపాను లాంటి వెదర్ వారిని భయపెట్టింది. గంటకు సుమారు 50 కి.మీ. వేగంతో వీచిన గాలులకు వారు  ఎక్కిన స్టీల్ ప్లాట్ ఫామ్ చిగురుటాకులా అటూఇటూ ఊగిపోయింది. సుమారు 20 నిముషాలసేపు అలా గాల్లో తేలుతూ ప్రాణాలు ఉగ్గబట్టుకుని ఉండిపోయారు. గాలులు కాస్త శాంతించిన తరువాత ఓ బాల్కనీ గోడను పట్టుకుని తమను తాము రక్షించుకున్నారు. మరి కొద్దిసేపు అదే పరిస్థితి ఉంటే పట్టు తప్పి ఎత్తు నుంచి కింద పడిపోయి ప్రాణాలు పోగొట్టుకుని ఉండేవారమని అంటున్నారు వాళ్ళు. తమ జీవితంలో ఇంతటి ఆపదను ఎప్పుడూ ఎదుర్కోలేదట ఆ కార్మికులు ! ఇది తమకు పునర్జన్మే అంటున్నారు.