మేమూ ఆ యాప్ ని నిషేధించే యోచనలో ఉన్నాం.. అమెరికా

టిక్ టాక్ సహా చైనాకు చెందిన 58 యాప్ లపై భారత ప్రభుత్వం నిషేధం విధించిన నేపథ్యంలో అమెరికా కూడా దీనిపై దృష్టి పెటింది. అమెరికన్ల వ్యక్తిగత సమాచారం చైనా కమ్యూనిస్టు పార్టీ చేతుల్లోకి వెళ్లాలనుకుంటే వాళ్ళు టిక్ టాక్ యాప్ ని డౌన్ లోడ్ చేసుకోవచ్చు అని  ఆ దేశ విదేశాంగ మంత్రి మైక్ పాంపియో  వ్యంగ్యంగా అన్నారు. అమెరికా, చైనా దేశాల మధ్య సెక్యూరిటీ, వాణిజ్యం, టెక్నాలజీ వంటి వాటితో సహా వివిధ రంగాల్లో తీవ్ర విభేదాలు ఉన్నాయి. ముఖ్యంగా చైనాకు సంబంధించి వాణిజ్య టారిఫ్ విషయంలో అమెరికా ఆ దేశంతో విభేదిస్తోంది.

టిక్ టాక్ దేశ భద్రతకు ముప్పు అని అమెరికాలోని పలువురు ఎంపీలు భావిస్తున్నారు. చైనా కమ్యూనిస్టు పార్టీ అజమాయిషీలో ఉన్న బైట్ డాన్స్ సంస్థ ఆ దేశ ఇంటెలిజెన్స్ ఆదేశాలకు లోబడి పని చేయవలసి ఉంటుందని వారు చెబుతున్నారు. అందువల్ల ఆ నెట్ వర్క్ ఒత్తిడి ఆ సంస్థపై ఉండడం సహజమే అని వారు పేర్కొంటున్నారు. టిక్ టాక్ సహా పలు యాప్ లను  బైట్ డాన్స్ నిర్వహిస్తోంది. అటు-ముఖ్యంగా టిక్ టాక్ పై భారత ప్రభుత్వం విధించిన బ్యాన్ కారణంగా ఈ సంస్థకు సుమారు 6 బిలియన్ డాలర్ల నష్టం వాటిల్లిందని అంచనా.. మరోవైపు.. అమెరికా అధ్యక్షుడు ట్రంప్ ఇప్పటివరకు చైనా యాప్ లపై బ్యాన్ గురించి యోచించనప్పటికీ.. బహుశా ప్రభుత్వ ప్రతిపాదనను దృష్టిలో ఉంచుకునే మైక్ పాంపియో ఈ వ్యాఖ్యలు చేసినట్టు భావిస్తున్నారు.