ఓరీ దేవుడో ఇదేందిరా సామీ..! సాలీడు అనుకుంటే సర్రున దూసుకొచ్చి ప్రాణం తీస్తుంది? ఈ పాము ప్లాన్ తెలిస్తే..
ప్రకృతిలో ప్రతి జీవికి తనదైన వేటాడే శైలి ఉంటుంది. కానీ స్పైడర్-టెయిల్డ్ హార్న్డ్ వైపర్ అనే పాము అనుసరించే పద్ధతి ప్రపంచంలోనే అత్యంత వింతైనది. ఇరాన్ దేశానికి చెందిన ఈ పాము వీడియోలు ప్రస్తుతం సోషల్ మీడియాలో వైరల్ అవుతున్నాయి. ఈ వీడియో ఇంటర్నెట్లో సంచలనం సృష్టించింది. అంతుచిక్కని ఈ పామును చూసి నెటిజన్లు షాక్ అవుతున్నారు..
Updated on: Apr 23, 2026 | 9:14 PM
ప్రపంచంలోని అత్యంత వింతైన, ప్రమాదకరమైన పాములలో ఒకటిగా పిలవబడే స్పైడర్-టెయిల్డ్ హార్న్డ్ వైపర్ (Spider-Tailed Horned Viper) గురించి తెలిస్తే షాక్ అవుతారు. ఈ పాము తన వేటాడే విధానంతో శాస్త్రవేత్తలను సైతం ఆశ్చర్యపరుస్తుంది. ఈ పాము తోక చివర భాగం విలక్షణంగా ఉంటుంది. అది బూడిద రంగులో ఉండి, పొడవాటి వెంట్రుకల వంటి నిర్మాణాలతో అచ్చు ఒక సాలీడులా కనిపిస్తుంది. ఈ పాము రాళ్ల మధ్య కదలకుండా పడుకుని, కేవలం తన తోకను మాత్రమే మెల్లగా కదిలిస్తుంది. దూరం నుండి చూసే పక్షులకు అది రాళ్ల మధ్య తిరుగుతున్న సాలీడులా కనిపిస్తుంది.
మొదట చూడగానే అది పొడవాటి తోక ఉన్న సాలీడులా కనిపిస్తుంది. కానీ మరుక్షణమే ఆ సాలీడు కొమ్ము ఉన్న ప్రమాదకరమైన పాముగా మారిపోతుంది. ఇది మాయాజాలం కాదు, ప్రకృతిలోని అత్యంత ప్రత్యేకమైన వేటాడే జీవులలో ఒకటైన సాలీడు తోక కొమ్ముల వైపర్. సాలీడును తినాలనే ఆశతో పక్షులు దానిపైకి దూకిన మరుక్షణమే, రాళ్లలో కలిసిపోయిన పాము మెరుపు వేగంతో దాడి చేస్తుంది. పక్షి తనను తాను రక్షించుకునే లోపే ఈ విషపూరిత పాము దానిని వేటాడుతుంది. పక్షులను ఆకర్షించడానికి తన తోకను ఒక ఎర (Bait) లాగా వాడుకోవడం దీని ప్రత్యేకత.
View this post on Instagram
ఇవి ప్రధానంగా పశ్చిమ ఇరాన్ యొక్క పర్వత, ఎడారి ప్రాంతాలలో కనిపిస్తాయి. వీటి రంగు అక్కడి రాళ్లకు సరిగ్గా సరిపోతుంది, అందుకే వీటిని గుర్తించడం చాలా కష్టం. వీటి కనుబొమ్మల పైన కొమ్ముల వంటి పొలుసులు ఉండటం వల్ల వీటికి హార్న్డ్ వైపర్ అని పేరు వచ్చింది. ఈ వింత పాము గురించి 2006 వరకు ప్రపంచానికి పెద్దగా తెలియదు. జీవశాస్త్రంలో అత్యంత క్లిష్టమైన పరిణామ క్రమానికి ఈ పాము తోక ఒక నిదర్శనం. మనుషులకు ఇది ప్రమాదకరమే అయినప్పటికీ, అడవుల్లో దీని వేట సాగే తీరు నిజంగా అద్భుతం.
