మరిన్ని రెవెన్యూ సంస్కరణలు…తహసీల్దార్లకే ‘నాలా’ అధికారాలు…

‘Nala’ Powers Only to Tehsildars : రెవెన్యూ సంస్కరణల్లో భాగంగా తెలంగాణ సర్కార్‌ మరో కీలక నిర్ణయం తీసుకోనుంది. కొత్త రెవెన్యూ చట్టంలో రెవెన్యూ అధికారుల అధికారాలను కుదించిన ప్రభుత్వం .. తాజాగా వ్యవసాయేతర భూమి నియోగ మార్పిడి అధికారాల నుంచి ఆర్డీవోలను తప్పించే అంశాన్ని పరిశీలిస్తోంది. ఈ అధికారాలను తహసీల్దార్లకు బదలాయించాలనే యోచనలో ఉంది తెలంగాణ ప్రభుత్వం. సాగు భూములను ఇతర అవసరాలకు మార్పిడి చేయాలంటే ఆర్డీవోకు దరఖాస్తు చేసుకోవాల్సి ఉంటుంది.

అయితే దీనిపై క్షేత్రస్థాయిలో రెవెన్యూ రికార్డులు, ప్రతిపాదిత భూమిని పరిశీలించి నివేదిక ఇవ్వాలని తహసీల్దార్‌ను ఆర్డీవో ఆదేశిస్తారు. ఆ తర్వాత తహసీల్దార్‌ సిఫారసుకు అనుగుణంగా ఆర్డీవో నిర్ణయం తీసుకుంటారు. ఈ ప్రక్రియ వల్ల ‘నాలా’జారీ ఆలస్యం కావడమేగాకుండా.. అక్రమాలు కూడా జరుగుతున్నాయని గుర్తించింది తెలంగాణ ప్రభుత్వం. ఇలాంటి రెవెన్యూ లొసుగులకు చెక్ పెట్టాలని తెలంగాణ సర్కారు ఈ విధానానికి స్వస్తి పలకాలని నిర్ణయించింది. భూ వినియోగ మార్పిడిపై దరఖాస్తు చేసుకున్న వారం రోజుల్లోపే సాగు భూమి విస్తీర్ణం నుంచి ఇతర అవసరాలకు మళ్లుతున్న భూమిని తొలగించేలా అధికారాలను ఇవ్వాలని నిర్ణయించింది.