ఆ వ్యాక్సిన్ తీసుకున్నా..కానీ యాంటీ బాడీలు ఏవీ ?…సీరం కంపెనీ సీఈఓ ఆదార్ పూనావాలాపై యూపీ వాసి కేసు

కోవిషీల్డ్ వ్యాక్సిన్ తీసుకున్నప్పటికీ తనలో యాంటీబాడీలు డెవలప్ కాలేదని అంటూ యూపీకి చెందిన ఓ వ్యక్తి సీరం ఇన్స్ టిట్యూట్ సీఈఓ ఆదార్ పూనావాలాపైన, మరికొందరిపైనా కేసు పెట్టారు. ఈ మేరకు లక్నోలోని ఆషియానా పోలీసు స్టేషన్ లో ఫిర్యాదు చేశారు. ప్రతాప చంద్ర అనే ఈ వ్యక్తి తన కంప్లయింట్ లో…డీజీసీఏ డైరెక్టర్, ఆరోగ్య మంత్రిత్వ శాఖ సంయుక్త కార్యదర్శి లవ్ అగర్వాల్, ఐసీఎంఆర్ డైరెక్టర్ బలరాం భార్గవ, నేషనల్ హెల్త్ మిషన్ డైరెక్టర్ అపర్ణా ఉపాధ్యాయ్ తదితరుల పేర్లను కూడా ప్రస్తావించాడు. ఏప్రిల్ 8 న తాను మొదటి డోసు కోవిషీల్డ్ వ్యాక్సిన్ తీసుకున్నానని, మళ్ళీ 28 రోజుల తరువాత రెండో డోసు తీసుకోవలసి ఉండగా విరామ కాలాన్ని మొదట 6 వారాలకు, తరువాత 12 వారాలకు పెంచారని అన్నాడు. తొలి డోసు తీసుకున్న అనంతరం శరీరంలో యాంటీ బాడీలు డెవలప్ అవుతాయని బలరాం భార్గవ మీడియా సమావేశంలో చెప్పారని, ఆమేరకు తాను ఓ ల్యాబ్ లో యాంటీ బాడీ జీటీ టెస్ట్ తీసుకున్నానని పేర్కొన్నాడు. కానీ తనలో ఎలాంటి యాంటీ బాడీలు డెవలప్ కాకపోగా ప్లేట్ లెట్లు 3 లక్షల నుంచి 1.5 లక్షలకు తగ్గిపోయినట్టు ఆ రిపోర్టు ద్వారా తెలిసిందని అన్నాడు. తన ఆరోగ్య పరిస్థితిపై ఆందోళన చెందుతున్నానన్నాడు.

అయితే ఇతని ఫిర్యాదుపై పోలీసులు ఎఫ్ఐఆర్ నమోదు చేయలేదు.తదుపరి చర్య తీసుకునే ముందు ఉన్నతాధికారులను సంప్రదిస్తామని వారు చెప్పారు. కానీ వీరు ఎఫ్ ఐ ఆర్ పెట్టకపోతే తాను కోర్టుకెక్కుతానని ప్రతాపచంద్ర హెచ్చరించాడు.

మరిన్ని ఇక్కడ చూడండి: VIRAL VIDEO : క్యారమ్ ఆడుతూ గొడవపడ్డ ఇద్దరు వృద్ధులు..! ఏమైందో తెలిస్తే నవ్వు ఆపుకోలేరు..

CM Jagan: రాష్ట్ర వ్యాప్తంగా.. 14 వైద్య కళాశాలల పనులకు సీఎం జ‌గ‌న్ శంకుస్థాపన