ఒక్కరోజే లక్ష కోట్లు.. అమెజాన్ సీఈవో రికార్డ్..

Jeff Bezos: సంపదను సృష్టించే విషయంలో స్టాక్‌ మార్కెట్‌కు మించిన ప్రత్యామ్నయం ఈ భూమ్మీద మరొకటి లేదనడంలో ఎలాంటి సందేహం లేదు. ఈ క్రమంలో ఆన్ లైన్ దిగ్గజం అమెజాన్ సీఈవో జెఫ్‌ బెజోస్‌ సంపద ఒక్కరోజే 13 బిలియన్‌ డాలర్లు (రూ.97 వేల కోట్ల పైమాటే) పెరిగింది. సోమవారం అమెరికన్‌ స్టాక్‌ మార్కెట్లలో అమెజాన్‌ షేర్ల విలువ 7.9 శాతం పెరుగడమే ఇందుకు కారణమని బ్లూమ్‌బర్గ్‌ బిలియనీర్స్‌ ఇండెక్స్‌ (బీబీఐ) వెల్లడించింది. ప్రపంచంలోని సంపన్నుల వివరాలను బీబీఐ 2012 నుంచి వెల్లడిస్తున్నది.

కరోనా దెబ్బతో ఆర్థిక వ్యవస్థలు కుదేలైన నేపథ్యంలో.. అమెజాన్ అధినేత ఆస్తులు ఈ ఏడాది ఇప్పటివరకు 74.4 బిలియన్‌ డాలర్లు (రూ.5,54,858 కోట్లు) పెరుగడం విశేషం. దీంతో ఆయన మొత్తం నికర సంపద 189 బిలియన్‌ డాలర్లకు (రూ.14,09,518 కోట్లకు) వృద్ధి చెందింది. మరోవైపు అమెజాన్‌ షేర్ల విలువ పెరుగడంతో బెజోస్‌ మాజీ భార్య మెకెంజీ బెజోస్‌ సంపద కూడా ఒకే రోజు 4.6 బిలియన్‌ డాలర్లు (రూ.34,313 కోట్లు) పెరిగింది. దీంతో ఆమె ప్రపంచంలోని అత్యంత ధనవంతుల జాబితాలో 13వ స్థానానికి ఎగబాకారు.

Also Read: నేటి నుంచి సంతలు బంద్.. రూల్స్ అతిక్రమిస్తే జరిమానా, కేసులు నమోదు..