బోటి కర్రీని ఇలా ఒక్కసారి ట్రై చేయండి.. వాసన రాదు.. చాలా టేస్టీగా, జ్యూసీగా ఉంటుంది

తెలుగు రాష్ట్రాల్లోని చాలా మంది మేక బోటిని ఇష్టంగా తింటారు.. మేక బోటి (మేక పేగులు, కడుపు భాగం) ఆరోగ్యానికి మేలు చేసే ఒక సంప్రదాయ వంటకం.. మటన్ బోటీలో ఐరన్, విటమిన్ B12, ప్రోటీన్లు, జింక్ వంటి అద్భుతమైన పోషకాలు ఉంటాయి.. ఇవి రక్తహీనతను తగ్గించడం, రోగనిరోధక శక్తిని పెంపొందించడం.. జీర్ణక్రియను మెరుగుపరచడంలో ఎంతో సహాయపడతాయి.. బోటిని పలు విధాలుగా ఇష్టంగా వండుతారు.. కర్రీ అలాగే.. ఫ్రైగా వండుకుని తింటారు.. అయితే, బోటి మాంసం నుండి వచ్చే ప్రత్యేకమైన వాసన కొందరికి ఇబ్బందికరంగా ఉంటుంది. ఈ రెసిపీ ద్వారా, మీరు వాసన లేకుండా, అత్యంత రుచికరమైన బోటి కర్రీని సులభంగా ఇంట్లో తయారు చేసుకోవచ్చు.. అదెలాగో ఈ కథనంలో తెలుసుకుందాం..

బోటీ కర్రీ తయారీకి కావలసినవి:

బోటి: (శుభ్రం చేసి ఉడికించినది)

నూనె, ఉప్పు, పసుపు, కారం, అల్లం వెల్లుల్లి పేస్ట్, షాజీరా, జీలకర్ర, పచ్చిమిర్చి, ఉల్లిపాయలు, కొత్తిమీర

మసాలా పొడి కోసం:

• ఎండు కొబ్బరి ముక్కలు: 2-3 చిన్నవి
• ధనియాలు: 2 టేబుల్ స్పూన్లు
• లవంగాలు: 2
• యాలక్కాయ: 1
• దాల్చిన చెక్క: చిన్న ముక్క
• ఎండుమిర్చి: 1
• పేస్ట్ కోసం:
• పచ్చిమిర్చి: 2 ముక్కలు
• ఉల్లిపాయ: 1 చిన్నది
• టమాటా: 1 మీడియం సైజు
• నానబెట్టిన కాజు: 4-5

తయారుచేసే విధానం:

బోటిని సిద్ధం చేయడం: ముందుగా, బోటీ సెట్ ను నీట్ గా శుభ్రం చేసుకుని, ఉప్పు, పసుపు వేసి మెత్తగా ఉడికించుకోవాలి. ఇది బోటిని మృదువుగా చేయడమే కాకుండా, దాని సహజమైన వాసనను తగ్గిస్తుంది. ఉడికించిన బోటిని పక్కన ఉంచండి.

మసాలా పొడి తయారీ: ఒక కడాయిలో ఎండు కొబ్బరి ముక్కలు, ధనియాలు, లవంగాలు, యాలక్కాయ, దాల్చినచెక్క, ఎండుమిర్చి వేసి దోరగా వేయించాలి. వీటిని చల్లార్చి మిక్సీ జార్ లో వేసి మెత్తగా పొడి చేసుకోవాలి. ఈ మసాలా పొడిని ఒక బౌల్ లోకి తీసుకోవాలి.

పేస్ట్ తయారీ: మసాలా పొడి చేసిన అదే మిక్సీ జార్ లో రెండు పచ్చిమిర్చి ముక్కలు, ఒక చిన్న సైజు ఉల్లిపాయ ముక్కలు, ఒక మీడియం సైజు టమాటా ముక్కలు, నానబెట్టిన 4-5 జీడిపప్పులను వేసి మెత్తని పేస్ట్ లా గ్రైండ్ చేసుకోవాలి. ఈ పేస్ట్ ను కూడా పక్కన ఉంచండి.

పోపు తయారీ: ఒక పెద్ద కడాయిలో 4 టేబుల్ స్పూన్ల నూనె వేసి వేడి చేయాలి. నూనె వేడి అయ్యాక, 1/4 టీస్పూన్ షాజీరా, 1/4 టీస్పూన్ జీలకర్ర, 1 టేబుల్ స్పూన్ పోపు గింజలు, 4-5 పచ్చిమిర్చి చీలికలు, ఒక పెద్ద ఉల్లిపాయ ముక్కలు వేసి బంగారు రంగు వచ్చేవరకు బాగా వేయించాలి.

మసాలా దినుసులు కలపడం: ఉల్లిపాయలు వేగిన తర్వాత, 1/4 టీస్పూన్ పసుపు, తాజాగా నూరుకున్న 1 టేబుల్ స్పూన్ అల్లం వెల్లుల్లి పేస్ట్ వేసి పచ్చివాసన పోయే వరకు సుమారు 1 నిమిషం పాటు వేయించాలి.

బోటిని కలపడం: ఇప్పుడు ఉడికించి పక్కన ఉంచుకున్న బోటీని ఈ పోపులో వేసి బాగా కలపాలి. మీడియం మంటపై ఐదు నిమిషాల పాటు బోటీని వేయించాలి. బోటిలోని నీరు ఇంకిపోయి, నూనె పైకి తేలే వరకు వేయించడం ముఖ్యం. ఇది బోటికి మంచి రుచిని ఇస్తుంది.

పేస్ట్, కారం, ఉప్పు కలపడం: ఐదు నిమిషాల తర్వాత, ముందుగా తయారుచేసి పెట్టుకున్న టమాటా-ఉల్లిపాయ పేస్ట్ ను వేసి బాగా కలపాలి. హై ఫ్లేమ్ లో రెండు నిమిషాల పాటు ఈ పేస్ట్ పచ్చివాసన పోయే వరకు వేయించాలి. తరువాత, రుచికి సరిపడా సాల్ట్, 2 టేబుల్ స్పూన్ల కారం పొడి, 1 టేబుల్ స్పూన్ మసాలా పొడి (తయారుచేసి పెట్టుకున్నది) వేసి బాగా కలిపి ఒక నిమిషం పాటు వేయించాలి.

ఉడికించడం: మీకు కావలసినంత నీటిని పోసి, కర్రీని బాగా కలిపి, తక్కువ మంటపై పది నిమిషాల పాటు ఉడికించుకోవాలి. కర్రీ గ్రేవీ చిక్కబడే వరకు ఉడికించండి.

గార్నిషింగ్: పది నిమిషాల తర్వాత, చివరిగా కొద్దిగా కొత్తిమీర తరుగును వేసి కలిపి గ్యాస్ ఆఫ్ చేయాలి. వేడి వేడి రుచికరమైన బోటి కర్రీ సర్వ్ చేయడానికి సిద్ధంగా ఉంటుంది.

ఈ పద్ధతిలో బోటి కర్రీని తయారు చేస్తే, అది వాసన లేకుండా చాలా రుచిగా ఉంటుంది. గ్రేవీ కావాలంటే కొద్దిగా నీరు ఉన్నప్పుడే దించేసుకోవచ్చు, అది చల్లబడే కొద్దీ చిక్కబడుతుంది. ఫ్రై టైప్ కావాలంటే టమాటో ప్యూరీ వేసిన తర్వాత ఉప్పు, కారం వేసి ఫ్రై చేసి దించేసుకోవచ్చు. బోటి కర్రీ అన్నం రోటిలోకి అద్భుతంగా ఉంటుంది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..