కవిత విజయం ఖాయం : కేటీఆర్

మాజీ ఎంపీ క‌విత‌ను భారీ మెజార్టీతో గెలిపించాల‌ని పార్టీ ప్ర‌తినిధుల‌కు, కార్య‌క‌ర్త‌ల‌కు టీఆర్ఎస్ వర్కింగ్ ప్రెసిడెంట్ కేటీఆర్ విన్న‌వించారు. త్వరలో జరుగనున్న నిజామాబాద్ స్థానిక సంస్థల ఎమ్మెల్సీ ఎన్నికల్లో కవిత విజయం ఖాయమ‌ని కేటీఆర్ విశ్వాసం వ్య‌క్తం చేశారు. ఈ ఎన్నిక‌కు సంబంధించి స్థానిక సంస్థల ప్రజాప్రతినిధులతో మంగళవారం కేటీఆర్ వీడియో కాన్ఫరెన్స్ నిర్వహించారు. టీఆర్ఎస్ ఆవిర్భావం నుంచి పార్టీకి నిజామాబాద్ జిల్లా అండ‌గా నిలుస్తున్న‌ద‌ని కేటీఆర్ ఈ సందర్భంగా గుర్తు చేశారు.

అన్ని ఎన్నికల్లో విజయం సాధించినట్టే ఈ ఎన్నికల్లోనూ టీఆర్ఎస్ పార్టీకి నిజామాబాద్ మరోసారి అండగా నిలుస్తుందన్నారు. టీఆర్ఎస్ పార్టీ చేస్తున్న అభివృద్ధిని చూసి ఓర్వలేక కొన్ని దుష్ట శక్తులు రాజకీయాలు చేస్తున్నాయని.. అవన్నీ ప్రజల ముందు చెల్లవని కేటీఆర్ తేల్చి చెప్పారు. కులాలు మతాల పేరిట చిచ్చు పెట్టే వారిని ప్రజాక్షేత్రంలో టీఆర్ఎస్ బలంగా ఎదుర్కొంటుందని కేటీఆర్ స్పష్టం చేశారు.