మర్రి, రావి చెట్లకు పెళ్ళి!

ఇది పెనవేసుకుని పెరుగుతున్న ఓ మర్రి, రావి చెట్ల పెళ్లి కథ. ప్రణయ్ అనే మర్రి చెట్టుకు, దేబరతి అనే రావి చెట్టుకు ఆ ఊరి పెద్దలు పెళ్లి చేశారు. వేద మంత్రాల సాక్షిగా బెంగాళీ సాంప్రదాయంలో ఈ వేడుక నిర్వహించారు. ఈ పెళ్ళిని వీక్షించేందుకు స్థానికులతో పాటు చుట్టుపక్కల ప్రాంతాల నుంచి సుమారు పదిహేడు వందలకు పైగా అతిథులు పాల్గొని వధూవరులను ఆశీర్వదించారు.

బెంగాల్‌లోని కోల్‌కతాకు 15 కిలోమీటర్ల దూరంలోని సొదేపూర్‌లో 12 ఏళ్ల  ప్రణయ్‌ను దత్తత తీసుకున్న సొమనాగ్ అనే మహిళ ఈ పెళ్లి కోసం ప్రత్యేకంగా శుభలేఖలు అచ్చువేయించి ఊరంతా పంచింది. పెళ్లి సందర్భంగా ప్రణయ్‌ను దోతీకుర్తాతో అలంకరించారు. 10 ఏళ్ల దేబరతికి ఎర్ర రంగు బనారసీ చీర కట్టారు. ప్రణయ్‌కు సోమ, ఆమె భర్త సుప్రకాష్ నాగ్‌లు, దేబరతికి సునితీ సర్కార్, కమల్‌లు తల్లిదండ్రులుగా వ్యవహరించారు.

ఈ వేడుకపై పర్యావరణవేత్త సుభాష్ దత్తా మాట్లాడుతూ ‘‘ఇటువంటి కార్యక్రమాలు ప్రజలకు పచ్చదనంపై అవగాహన కలిగించేందుకు ఉపయోగపడతాయి. చెట్ల వల్ల ప్రయోజనాలు తెలుస్తాయి. ఈ రెండు చెట్లు రాత్రి వేళల్లో కూడా ఆక్సిజన్ అందిస్తాయి. పర్యావరణాన్ని పరిరక్షిస్తాయి. ప్రజలు మరిన్ని చెట్లు నాటి పర్యావరణ పరిరక్షణకు తమ వంతు కృషి చేయాలి’’ అని విన్నవించారు.