అమెజాన్ లో వచ్చే ఏడాది జూన్ వరకు వర్క్ ఫ్రం హోం

ప్రపంచవ్యాప్తంగా కరోనా ప్రభావం ఇప్పుడప్పుడే తగ్గేలా లేదు. వ్యాక్సిన్ వచ్చేంతవరకు ప్రజల్లో కరోనా భయం తగ్గేలా లేదు. అయితే, ఐటీ కంపెనీలు ముందు జాగ్రత్త చర్యల్లో భాగంగా తమ ఉద్యోగులకు మరి కొన్ని రోజులపాటు ఇంటి నుంచే పని చేసుకునే అవకాశాన్ని కల్పిస్తున్నాయి. తాజాగా కొవిడ్ -19 మహమ్మారి కారణంగా ఆన్‌లైన్ దిగ్గజమైన అమెజాన్ తన ఉద్యోగులకు 2021 జూన్ 30వతేదీ వరకు వర్క్ ఫ్రం హోం చేసేందుకు వీలు కల్పించింది. ‘‘మా కంపెనీ ఉద్యోగులు 2021 జూన్ 30వతేదీ వరకు ఇంటి నుంచి సమర్థవంతంగా పనిచేసేందుకు మేం అనుమతిస్తున్నాం’’ అని అమెజాన్ ప్రతినిధి తాజాగా ఈ మెయిల్ పంపించారు. అమెజాన్ అంతకు ముందు 2021 జనవరి వరకే ఇంటి నుంచి పనిచేసేందుకు అనుమతించింది. దీన్ని ప్రస్తుతం వచ్చే ఏడాది జూన్ 30 వరకు పొడిగించింది.

ప్రపంచ వ్యాప్తంగా అత్యధికి వినియోగదారులను కలిగిన ఈ కామర్స్ ఆన్ లైన్ రిటైలర్ సంస్థ అయిన అమెజాన్ లో పనిచేస్తున్న 19వేల మంది ఉద్యోగులు కరోనా వైరస్ బారిన పడ్డారు. కరోనా మహమ్మారి సమయంలో అమెజాన్ వ్యాపార లావాదేవీలు కొనసాగించడంతో ఉద్యోగుల ఆరోగ్యాన్ని ప్రమాదంలో పడేస్తుందని సిబ్బంది చెప్పారు. సామాజిక దూరం పాటించడం, థర్మల్ తనిఖీుల చేయడం, ఫేస్ మాస్కులు ధరించడం, హ్యాండ్ శానిటైజర్లు వాడటం వల్ల తాము సురక్షితంగా ఉన్నామని అమెజాన్ ప్రతినిధి చెప్పారు. ఇప్పటికే ఫేస్ బుక్ వచ్చే ఏడాది జులై వరకు, గూగుల్ సంస్థ వచ్చే ఏడాది జూన్ వరకు వర్క్ ఫ్రం హోంకు అనుమతి ఇచ్చాయి. ఇక, మరిన్ని ఐటీ కంపెనీలు కూడా అదే దారిలో పయనిస్తున్నాయి.