అసలు D విటమిన్ పొందాలంటే ఏ సమయంలో ఎండలో నిల్చోవాలి..?

దక్షిణ భారతదేశం సూర్యరశ్మికి నిలయమైనప్పటికీ, ఇక్కడి ప్రజల్లో విటమిన్ డి లోపం చాలా ఉండటం ఆశ్చర్యకరమైన విషయం. భారత్‌లోని నగరాల్లో నివసించేవారిలో 70 శాతం మందికి, గ్రామాల్లో నివసించేవారిలో దాదాపు 20 శాతం మందికి తీవ్రమైన విటమిన్ డి లోపం ఉందని ప్రపంచ ఆరోగ్య సంస్థకు చెందిన సౌత్-ఈస్ట్ ఏషియన్ జర్నల్ ఆఫ్ పబ్లిక్ హెల్త్‌లో ప్రచురితమైన ఒక అధ్యయనం వెల్లడించింది. ఈ అధ్యయనంలో ఢిల్లీ నేషనల్ క్యాపిటల్ రీజియన్ లోని పట్టణాలు, గ్రామాల్లో నివసించే వారు పాల్గొన్నారు. రక్తంలో విటమిన్ డి స్థాయి 10 నానోగ్రాముల కంటే తక్కువ ఉంటే తీవ్రమైన లోపంగా పరిగణిస్తారు.

అధ్యయనాల ద్వారా వెల్లడైన నిజాలు:

పురుషుల కంటే మహిళల్లో విటమిన్ డి లోపం ఎక్కువగా ఉన్నట్లు పలు అధ్యయనాల్లో తేలింది. చెన్నైకి చెందిన గర్భిణులపై నిర్వహించిన ఒక అధ్యయనంలో 62 శాతం మంది మహిళలకు విటమిన్ డి లోపం ఉన్నట్లు గుర్తించారు. కేంబ్రిడ్జ్ యూనివర్సిటీ ప్రెస్ ప్రచురించిన మరో అధ్యయనంలో చెన్నై నగరవాసులలో 66 శాతం మంది విటమిన్ డి లోపంతో బాధపడుతున్నారని తేలింది. ప్రీ-డయాబెటిస్ లేదా టైప్ 2 డయాబెటిస్ ఉన్నా లేకపోయినా ఈ లోపం సాధారణంగా ఉంది. పంజాబ్, తిరుపతి, పూణే, అమరావతి వంటి ప్రాంతాల్లో నిర్వహించిన అధ్యయనాలు కూడా నగరాల్లోని వారికే ఈ లోపం ఎక్కువగా ఉన్నట్లు సూచిస్తున్నాయి.

విటమిన్ డి ఎలా లభిస్తుంది?

చర్మవ్యాధి నిపుణులు తెలిపిన వివరాల ప్రకారం, విటమిన్ డి శరీరానికి సూర్యరశ్మి, ఆహారం ద్వారా లభిస్తుంది. శరీరానికి అవసరమైన విటమిన్ డి లో ఎక్కువ భాగం సూర్యరశ్మి నుంచే వస్తుంది. మానవ చర్మం పై పొర సెవెన్ డీహైడ్రో కొలెస్ట్రాల్ అనే అణువును ఉత్పత్తి చేస్తుంది. సూర్యరశ్మిలోని అతినీల లోహిత (UVB) కాంతి చర్మాన్ని తాకినప్పుడు, ఈ అణువు విటమిన్ డి3గా మారుతుంది. కాలేయం, మూత్రపిండాలు దీనిని విటమిన్ డిగా మార్చి శరీరానికి పంపుతాయి.

లోపానికి ప్రధాన కారణాలు:

పుదుచ్చేరి ప్రభుత్వ ఆసుపత్రిలో పనిచేసిన జనరల్ ప్రాక్టీషనర్ డాక్టర్ పీటర్ ప్రకారం, ఆధునీకరణ, మారుతున్న పని విధానం వల్ల చాలా మంది ఇళ్లల్లో, ఆఫీసుల్లో ఎక్కువ సమయం గడుపుతున్నారు. బయటకు వెళ్ళేటప్పుడు శరీరాన్ని పూర్తిగా దుస్తులతో కప్పుకోవడం కూడా ఒక కారణం. కాలుష్యం, దుస్తులు, గాజు కిటికీలు సూర్యరశ్మిలోని UVB కిరణాలు శరీరానికి తగలకుండా అడ్డుకుంటాయి. గాజు కిటికీ పక్కన కూర్చుంటే తగినంత విటమిన్ డి లభించదు.

ఎంత సూర్యరశ్మి అవసరం?

భారత్‌లోని ఒక పురుషుడు రోజుకు రెండు గంటల కంటే ఎక్కువ సమయం ఎండలో గడపాలని, అతని ముఖం, చేతులు, ముంజేతులకు ఎండ తగలాలని ఒక అధ్యయనం సూచించింది. కనీసం 20 నానోగ్రాముల విటమిన్ డి పొందడానికి రోజుకు గంట పాటు ఎండలో నడవాలని మరో అధ్యయనం చెబుతోంది. విటమిన్ డి ఏర్పడటానికి సూర్యరశ్మిలోని అల్ట్రా వయోలెట్ బి (UVB) కిరణాలు అవసరం. ఈ కిరణాలు సాధారణంగా ఉదయం 11 గంటల నుంచి మధ్యాహ్నం 2 గంటల మధ్య బాగా అందుతాయి. అందుకే ఈ సమయంలో సూర్యరశ్మి తీసుకోవడం ఉత్తమం. ఉదయం, సాయంత్రం వేళల్లో ఉండే UVA కిరణాలు విటమిన్ డి ఏర్పడటానికి పెద్దగా ఉపయోగపడవు.

ముందు జాగ్రత్తలు, పరిష్కారాలు:

ఉదయం 11 గంటల నుంచి మధ్యాహ్నం 2 గంటల మధ్య సూర్యరశ్మిని తీసుకోవాలని వైద్యులు సూచిస్తున్నారు. అయితే అధిక సూర్యరశ్మి వల్ల ప్రమాదాలు ఉన్నందున, ఎక్కువసేపు ఎండలో ఉండకూడదు. సన్‌స్క్రీన్, టోపీ, కూల్ గ్లాసెస్, తేలికపాటి దుస్తులు ధరించడం అవసరం. ః

విటమిన్ డి లోప లక్షణాలు, ప్రభావాలు:

అలసట, కీళ్ల నొప్పులు, కాళ్లలో వాపు, ఎక్కువ సేపు నిలబడటానికి ఇబ్బంది, కండరాల బలహీనత, నిరాశకు గురికావడం వంటివి విటమిన్ డి లోప లక్షణాలు. ఈ లోపం వల్ల శరీరంలోని అన్ని భాగాలు క్రమంగా బలహీనపడతాయి. వృద్ధాప్యంలో ఎముకలు, కండరాలు, కీళ్లలో ఎక్కువ నొప్పి వస్తుందని డాక్టర్ పీటర్ హెచ్చరించారు. అంతేకాకుండా, చిన్న వయసులోనే డిమెన్షియాకు గురయ్యే ప్రమాదం కూడా పెరుగుతుందని ఒక అధ్యయనం పేర్కొంది.

ఆహారం, సప్లిమెంట్లు:

నగరవాసులకు రోజుకు ఒక గంట పాటు ఉదయం 11 నుండి మధ్యాహ్నం 2 గంటల మధ్య ఎండలో నడవడం అసాధ్యం. అటువంటి వారికి ఆహారం, సప్లిమెంట్లు కొంతవరకు సహాయపడతాయి. మాంసం, గుడ్లు, చేపలు, పాలు, కాలేయం వంటి విటమిన్ డి ఉన్న ఆహార పదార్థాలు తీసుకోవచ్చు. అయితే, విటమిన్ డి లోపాన్ని నివారించడానికి సూర్యరశ్మికి మించిన తేలికైన, చవకైన, ఉత్తమమైన ఔషధం మరొకటి లేదని వైద్యులు స్పష్టం చేస్తున్నారు.