అకస్మాత్తుగా బరువు తగ్గడంతోపాటు ఈ లక్షణాలు కనిపిస్తున్నాయా..? డేంజర్‌లో ఉన్నట్లే.. జాగ్రత్త

శరీరంలోని ప్రధాన అవయవాల్లో కాలేయం ఒకటి.. దీనిని ఎల్లప్పుడూ ఆరోగ్యంగా ఉంచుకోవడం మొత్తంగా శరీరానికి చాలా మంచిది. అయితే.. కాలేయ సమస్యలు ప్రస్తుత కాలంలో ఎక్కువగా పెరుగుతున్నాయి.. అలాంటి వాటిల్లో లివర్ సిర్రోసిస్ ఒకటి.. కాలేయం తీవ్రమైన సమస్యలలో ఒకటి. కాలేయం సిర్రోసిస్‌కు ప్రధాన కారణం హెపటైటిస్ లేదా దీర్ఘకాలిక మద్యపానం వంటి అలవాట్లు.. అయితే.. కాలేయ సంబంధిత వ్యాధుల విషయంలో ఎప్పుడూ అశ్రద్ధ చేయకూడదు.. లివర్ సిర్రోసిస్ ప్రారంభంలో రోగులు అలసట, బలహీనత, బరువు తగ్గడం వంటివి అనుభవించవచ్చు. తరువాతి దశలలో, రోగులకు కామెర్లు (చర్మం పసుపు), జీర్ణశయాంతర రక్తస్రావం, పొత్తికడుపు వాపు, చికాకు, గందరగోళం, హైపర్‌టెన్షన్ లాంటి పరిస్థితులు ఏర్పడవచ్చు.. అసలు లివర్ సిర్రోసిస్‌ను ఎలా గుర్తించాలి..? ప్రారంభంలో ఎలాంటి లక్షణాలు కనిపిస్తాయి..? అనే వివరాలను తెలుసుకోండి..

లివర్ సిర్రోసిస్ లక్షణాలు..

చర్మం పసుపు రంగులోకి మారుతుంది: మీ చర్మం , గోర్లు పసుపు రంగులోకి మారినట్లయితే, ఈ సమయంలో ఏదైనా సమస్య ఉన్నట్లయితే వెంటనే వైద్య నిపుణుడిని సంప్రదించండి.

ఆకలి లేకపోవడం: కాలేయం సిర్రోసిస్ కారణంగా ఆకలి తగ్గుతుంది. మీరు ఏమీ తినకపోయినా, మీకు ఆకలి అనిపించదు. ఏదైనా తినాలని అనిపించదు.. తరచూ ఇలాగే జరుగుతుంటే మీ కాలేయ పనితీరును చెక్ చేసుకోండి.

విపరీతమైన అలసట: లివర్ సిర్రోసిస్ వంటి పరిస్థితిలో కాలేయం బాగా దెబ్బతింటుంది.. రోగి యొక్క కాలేయం సరిగ్గా పనిచేయదు. బాగా అలసట, నీరసం ఉంటుంది.

శరీరంలో వాపు – దురద: శరీరంలో వాపు, దురద కనిపించడం కూడా కాలేయ సిర్రోసిస్‌ను సూచిస్తాయి. ఇది పరిస్థితిని తీవ్రంగా మార్చగలదు.

వికారం – వాంతులు: కాలేయ సంబంధిత సమస్యల కారణంగా, రోగికి ఆహారం సరిగా జీర్ణం కాకపోవడం, కొన్నిసార్లు వికారం, వాంతులు వంటివి కూడా ఉంటాయి.

కడుపులో నొప్పి: ఉదరం లేదా బొడ్డు ఎగువ కుడి వైపున కాలేయంపై తేలికపాటి నొప్పి లేదా అసౌకర్యం.. ఇంకా తరచూ కడుపులో నొప్పితోపాటు.. ఇలాంటి లక్షణాలు కనిపిస్తే.. వెంటనే వైద్యులను సంప్రదించడం మంచిది..

బరువు తగ్గడం: ప్రయత్నించకుండానే అకస్మాత్తుగా బరువు తగ్గడం.. కండరాల నష్టం, బలహీనత.. కండరాల తిమ్మిరి కూడా లివర్ సిర్రోసిస్ లక్షణాలేనని పేర్కొంటున్నారు.

(గమనిక: ఇక్కడ మీకు అందించిన ఆరోగ్య సమాచారం, సూచనలు మీ అవగాహన కోసం మాత్రమే. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.)