Mouth Ulcer: నోటి అల్సర్తో జర భద్రం.. ఆ ప్రాణాంతక వ్యాధికి ఇది కూడా ఓ సంకేతమే!
నోటి పూతల గురించి తెలియని వారుండరు. కారంగా ఉండే ఆహారం తినడం వల్ల, కడుపు బలహీనంగా ఉన్నప్పుడు నోటిలో పూతలు వచ్చే అవకాశం ఉంది. సాధారణంగా ఇలాంటి పూతల ఒకసారి వస్తే కొన్ని రోజుల్లోనే నయమవుతాయి. ఇది చాలా సాధారణం. కానీ తరచుగా ఇలా జరిగితే మాత్రం దానిని విస్మరించవద్దని నిపుణులు హెచ్చరిస్తున్నారు. ఎందుకంటే ఇది తీవ్రమైన అనారోగ్యానికి సంకేతం కావచ్చు. ఇది పదేపదే జరగడానికి కారణం ఏమిటో ఇక్కడ తెలుసుకుందాం..
నోటి పూతలకు అనేక కారణాలు ఉండవచ్చు. వీటిలో శరీరంలో ఫోలిక్ యాసిడ్ లేదా ఐరన్ లోపం ఉండటం సర్వసాధారణం. దీనితో పాటు, కడుపు సమస్యలు, కారంగా ఉండే ఆహారాలు తినడం కూడా ఇందుకు కారణమే. కొంతమందిలో ఈ పూతలు ప్రతి మూడు నుండి నాలుగు నెలలకు ఒకటి లేదా రెండుసార్లు కనిపిస్తాయి. ఆ తరువాత వాటంతట అవే మాయమవుతాయి. కానీ మీకు తరచుగా పూతల వచ్చి అవి నయం అయిన తర్వాత తిరిగి వస్తే, వీలైనంత త్వరగా డాక్టర్ని సంప్రదించడం మంచిది.
అల్సర్లు ఎప్పుడు ప్రమాదకరంగా మారవచ్చు?
ఒక వ్యక్తికి ప్రతి నెలా పదే పదే నోటి పూతలు, నోటి నుండి స్వల్ప రక్తస్రావం, బరువులో హెచ్చుతగ్గులు ఉంటే దానిని తేలికగా తీసుకోకూడదు. ఈ లక్షణాలు కాకుండా, నెల పాటు నయం కాని విధంగా నోటి పూత ఉన్నా కూడా ప్రమాదకరమే. అలాంటి సందర్భాలలో నోటి క్యాన్సర్ వచ్చే ప్రమాదం ఎక్కువగా ఉంటుంది. అంతే కాదు, ఇది పేగు వ్యాధి, థైరాయిడ్ సమస్యలు, మధుమేహం వల్ల కూడా కావచ్చు. కొన్ని సందర్భాల్లో HIV వైరస్ కూడా ఇలాంటి లక్షణాలను కలిగి ఉంటుంది.
ఎవరికి ఎక్కువ ప్రమాదం ఉంది?
- ధూమపానం చేసే లేదా పొగాకు ఉపయోగించే వారిలో.
- డయాబెటిక్ రోగులలో.
- విటమిన్ బి12 లోపంతో బాధపడేవారిలో.
- జీర్ణ సమస్యలు ఉన్నవారిలో.
- కారంగా ఉండే ఆహారం తినే వారు.
నోటి పూతలను ఎలా నివారించాలి?
- మీ విటమిన్ బి12 స్థాయిలను తనిఖీ చేసుకోవాలి. తక్కువగా ఉంటే, దానికి మందులు తీసుకోవాలి.
- పొగ తాగకూడదు.
- కారంగా ఉండే ఆహార పదార్థాల వినియోగాన్ని తగ్గించాలి.
- నోటి పరిశుభ్రతను పాటించాలి.
మరిన్ని ఆరోగ్య కథనాల కోసం క్లిక్ చేయండి.