వృద్ధాప్యంలో యవ్వనస్తుల్లా ఉంచే సూపర్ ఫుడ్ వచ్చేస్తోంది! ఎలుకలపై జరిపిన ప్రయోగం సక్సెస్..

ఎక్కువ మొక్కల ఆధారిత ఆహారం.. తక్కువ జంతు ప్రోటీన్.. దీర్ఘాయుష్షుకు ఇదే రహస్యమా? అనే ప్రశ్నకు తాజా పరిశోధన ఆసక్తికర సమాధానం ఇచ్చింది. అమెరికాలోని దక్షిణ కాలిఫోర్నియా విశ్వవిద్యాలయం (USC) శాస్త్రవేత్తలు నిర్వహించిన అధ్యయనం ప్రకారం.. మొక్కల ఆధారిత ఆహారంతో పాటు పరిమిత స్థాయిలో చేపలు తీసుకోవడం, అలాగే మాంసం, గుడ్లు, పాల ఉత్పత్తుల్లో అధికంగా ఉండే మెథియోనిన్ అనే అమైనో ఆమ్లాన్ని సమతుల్యంగా తీసుకోవడం వల్ల వృద్ధాప్యంలో ఆరోగ్యం మెరుగుపడే అవకాశం ఉందని తేలింది. ఈ పరిశోధన ఫలితాలు ప్రముఖ శాస్త్రీయ జర్నల్ సెల్ మెటబాలిజంలో ప్రచురితమయ్యాయి.

పరిశోధనలో భాగంగా వృద్ధాప్యంలో ఉన్న ఎలుకలను నాలుగు వేర్వేరు ఆహార విధానాలపై పరీక్షించారు. సాధారణ ఆహారం, పాశ్చాత్య శైలి అధిక కొవ్వు-చక్కెర ఆహారం, కీటోజెనిక్ డైట్, అలాగే తక్కువ ప్రోటీన్‌తో నియంత్రిత స్థాయిలో మెథియోనిన్ కలిగిన ప్రత్యేక దీర్ఘాయుష్షు ఆహారాన్ని అందించారు. వీటిలో చివరి ఆహారం తీసుకున్న ఎలుకలు ఎక్కువ కాలం ఆరోగ్యంగా జీవించడమే కాకుండా, శరీర కొవ్వు తగ్గడం, కండరాల బలం నిల్వ ఉండటం, బలహీనత లక్షణాలు తగ్గడం వంటి ప్రయోజనాలు కనిపించాయని పరిశోధకులు వెల్లడించారు.

ఈ ఫలితాలకు మద్దతుగా పరిశోధకులు 2 లక్షల మందికిపైగా ప్రజల ఆహారపు అలవాట్లు, ఆరోగ్య సమాచారాన్ని కూడా విశ్లేషించారు. ఎక్కువగా మొక్కల ఆధారిత ఆహారం తీసుకునే వారిలో ఊబకాయం, టైప్-2 మధుమేహం వచ్చే అవకాశాలు తక్కువగా ఉన్నట్లు గుర్తించారు. అధిక జంతు ప్రోటీన్ తీసుకునే వారిలో ఈ రెండు సమస్యలు ఎక్కువగా కనిపించినట్లు అధ్యయనం వెల్లడించింది. ఈ పరిశోధనకు నాయకత్వం వహించిన ప్రొఫెసర్ వాల్టర్ లాంగో మాట్లాడుతూ.. సాంప్రదాయ మధ్యధరా (Mediterranean) ఆహార విధానాన్ని ఆధారంగా తీసుకుని ఈ ప్రత్యేక ఆహార నమూనాను రూపొందించామని తెలిపారు. ఈ విధానంలో కూరగాయలు, పప్పులు, ధాన్యాలు, గింజలు, ఆలివ్ నూనె వంటి మొక్కల ఆధారిత ఆహారాలకు ప్రాధాన్యం ఇస్తూ, అవసరమైన మేరకు మాత్రమే చేపలను చేర్చడం జరుగుతుందని వివరించారు. జంతు ప్రోటీన్‌ను పూర్తిగా మానేయాల్సిన అవసరం లేదని, అయితే దాని మోతాదు సమతుల్యంగా ఉండాలని ఆయన సూచించారు.

మరో ఆసక్తికర అంశం ఏమిటంటే.. ఈ ప్రత్యేక ఆహారం తీసుకున్న ఎలుకలు ఇతర సమూహాల కంటే ఎక్కువ ఆహారం తీసుకున్నప్పటికీ శరీర కొవ్వు తగ్గింది. అదే సమయంలో కండరాల ద్రవ్యరాశి నిల్వ ఉండడం, జీవక్రియకు సంబంధించిన GLP-1 వంటి హార్మోన్ల స్థాయిలు పెరగడం గమనించారు. అంటే కేవలం కేలరీలు తగ్గించడం మాత్రమే కాకుండా, ఏ రకమైన ప్రోటీన్ తీసుకుంటున్నామనేది కూడా ఆరోగ్యంపై ప్రభావం చూపుతుందని పరిశోధకులు పేర్కొన్నారు. అయితే ఈ ఫలితాలు ప్రస్తుతం ప్రధానంగా జంతు అధ్యయనాల ఆధారంగా వచ్చినవేనని, మానవుల్లో కూడా ఇదే స్థాయిలో ప్రయోజనాలు లభిస్తాయో లేదో నిర్ధారించడానికి నియంత్రిత క్లినికల్ ట్రయల్స్ నిర్వహించాల్సి ఉందని శాస్త్రవేత్తలు స్పష్టం చేశారు. అందువల్ల ఈ అధ్యయనం ఆశాజనకంగా ఉన్నప్పటికీ, వైద్యులు లేదా పోషకాహార నిపుణుల సలహా లేకుండా ఆహారంలో పెద్ద మార్పులు చేయకూడదని నిపుణులు సూచిస్తున్నారు.