ఎండ వేడికి బ్రెయిన్‌పై ఎలాంటి ఎఫెక్ట్ పడుతుందో తెలుసా? ప్రాణాలు పోయేంత డేంజరా

Heatwave Alert

సాధారణంగా స్ట్రోక్ అనేది బీపీ, షుగర్ లేదా వయసు పైబడటం వల్ల వస్తుందని చాలామంది నమ్ముతారు. అయితే, ఎండలు మరియు డీహైడ్రేషన్ వల్ల మెదడు మరియు రక్తనాళాలపై తీవ్రమైన ఒత్తిడి పడుతుందని వైద్యులు చెబుతున్నారు. వేసవిలో చెమట రూపంలో శరీరం నుండి భారీగా నీరు బయటకు వెళ్లిపోతుంది. తగినంత నీరు తాగకపోవడం వల్ల డీహైడ్రేషన్ ఏర్పడుతుంది. దీనివల్ల రక్తం చిక్కబడి, గడ్డకట్టే అవకాశం పెరుగుతుంది. ఇలా రక్తం గడ్డకట్టడం వల్ల మెదడుకు ఆక్సిజన్ సరఫరా తగ్గి ‘ఇస్కీమిక్ స్ట్రోక్’ వచ్చే ప్రమాదం ఉంది. అంతేకాకుండా, గుండె తన పనితీరును పెంచుకోవడం వల్ల రక్తనాళాలు వ్యాకోచిస్తాయి, ఇది వయసు పైబడిన వారిలో లేదా ఇప్పటికే గుండె సంబంధిత సమస్యలు ఉన్నవారిలో ప్రాణాంతకంగా మారుతుంది.

ప్రమాద సంకేతాలు..

చాలామంది వేసవిలో వచ్చే చిన్నపాటి నీరసాన్ని, అలసటగా భావించి నిర్లక్ష్యం చేస్తారు. కానీ, ఈ లక్షణాలను అస్సలు విస్మరించకూడదు

• శరీరంలో ఏదో ఒక వైపు బలహీనత లేదా తిమ్మిర్లు రావడం.
• మాట్లాడటంలో ఇబ్బంది లేదా మాట తడబడటం.
• తీవ్రమైన తలనొప్పి మరియు చూపు మందగించడం.
• గందరగోళం, బ్యాలెన్స్ తప్పడం మరియు అకస్మాత్తుగా వచ్చే మైకం.

ఈ లక్షణాలు కనిపిస్తే ఆలస్యం చేయకుండా వెంటనే వైద్యులను సంప్రదించాలి. సమయానికి చికిత్స అందకపోతే మెదడుకు శాశ్వత నష్టం జరిగే అవకాశం ఉంది.

తీసుకోవాల్సిన జాగ్రత్తలు

స్ట్రోక్ నుండి మనల్ని మనం కాపాడుకోవడానికి హైడ్రేషన్ చాలా ముఖ్యం. దాహం వేసినా వేయకపోయినా క్రమం తప్పకుండా నీరు తాగుతూ ఉండాలి. కెఫిన్, మద్యం, మరియు చక్కెర అధికంగా ఉండే పానీయాలకు దూరంగా ఉండాలి, ఎందుకంటే ఇవి శరీరాన్ని మరింత డీహైడ్రేషన్‌కు గురిచేస్తాయి. మధ్యాహ్నం వేళల్లో బయటకు వెళ్లడం తగ్గించుకోవాలి. ఒకవేళ బయటకు వెళ్లాల్సి వస్తే లేత రంగు దుస్తులు ధరించాలి. రక్తపోటు మరియు గుండె సంబంధిత మందులు వాడేవారు, తమ డాక్టర్ సలహాతో నీటి సమతుల్యతను కాపాడుకుంటూ మందులను కొనసాగించాలి. సరైన అవగాహన, ముందస్తు జాగ్రత్తలు తీసుకోవడం వల్ల వేసవి తాపం నుండి మెదడును, ప్రాణాలను సురక్షితంగా ఉంచుకోవచ్చు.