Health Tips: మామిడి పండ్లను ఇష్టంగా తెగ లాగించేస్తున్నారా.? అయితే ఇది మీకోసమే.!
పండ్లలో రారాజు మామిడి పండు. దీని రుచికి సాటి మరోటి ఉండదంటే అతిశయోక్తి కాదు. మామిడిపండ్లను చూస్తేనే నోరూరుతుంది అందరికీ? దీనిని ఇష్టపడనివారుండరు. రుచిలోనే కాదు ఇవి ఆరోగ్యానికీ ఎంతో మేలు చేస్తాయి. అయితే వీటిని తినడానికి ఓ పద్ధతి ఉంటుంది. మరి మీరు మామిడిపళ్లను..
Updated on: Jun 03, 2024 | 9:53 PM
పండ్లలో రారాజు మామిడి పండు. దీని రుచికి సాటి మరోటి ఉండదంటే అతిశయోక్తి కాదు. మామిడిపండ్లను చూస్తేనే నోరూరుతుంది అందరికీ? దీనిని ఇష్టపడనివారుండరు. రుచిలోనే కాదు ఇవి ఆరోగ్యానికీ ఎంతో మేలు చేస్తాయి. అయితే వీటిని తినడానికి ఓ పద్ధతి ఉంటుంది. మరి మీరు మామిడిపళ్లను సరైన పద్ధతిలోనే తింటున్నారా? ఒక్కసారి ఆలోచించండి. పండును తినడానికి పద్ధతేంటండి బాబు… అనుకుంటున్నారా? అవును.. మామిడిపండ్ల మీద ఒకరకం ఫైటిక్ ఆమ్లం ఉంటుంది. ఇది చర్మానికి తగిలితే అలర్జీ తలెత్తొచ్చు. దురద పుట్టొచ్చు. అందువల్ల మామిడికాయలనైనా, పండ్లనైనా శుభ్రంగా కడగటం చాలా ముఖ్యం. తొడిమ వద్ద అంటుకొనే సొన పూర్తిగా పోయేలా శుభ్రం చేయాలి. ఇందుకోసం మామిడిపండ్లను నీటిలో కనీసం అరగంట సేపు నానబెట్టి, కడగటం మంచిది. దీంతో అధికంగా ఉన్న ఫైటిక్ ఆమ్లం తొలగిపోతుంది.
ఆయుర్వేదం ప్రకారం- భోజనంతో పాటు పండ్లను తినకూడదు. కానీ, మామిడిపండ్లు దీనికి మినహాయింపు. వీటిని పాలతో కలిపి తీసుకుంటే మంచి బలవర్ధకంగా పనిచేస్తుంది. అంతేకాదు.. శృంగారం మీద ఆసక్తినీ పెంచుతుంది. పిత్త, వాత దోషాలను తగ్గిస్తుంది. అయితే జీర్ణ సమస్యలు.. రుమటాయిడ్ ఆర్థ్రయిటిస్, సొరియాసిస్, ల్యూపస్ వంటి ఆటోఇమ్యూన్ జబ్బులు.. చర్మ సమస్యలు గలవారు మామిడిపండ్లను పాలతో కలిపి తీసుకోకూడదు.
ఇక మామిడిలో యాంటీఆక్సిడెంట్ల గుణాలతో కూడిన గ్యాలటానిన్లు, మ్యాంగిఫెరిన్ వంటి వృక్ష రసాయనాలు దండిగా ఉంటాయి. ఇవి విశృంఖల కణాల దుష్ప్రభావాలను అడ్డుకుంటున్నట్టు అధ్యయనాలు చెబుతున్నాయి. అయితే తొక్కతో పాటు తింటేనే ఇవి అందుతాయి. ఎందుకంటే ఇవి తొక్క కిందే ఉంటాయి కాబట్టి. మామిడిపండ్లు విసర్జన సాఫీగా అయ్యేలా చేస్తాయి. ఇవి దీర్ఘకాల మలబద్ధకం తగ్గటానికీ తోడ్పడుతున్నట్టు బయటపడింది. మామిడిలో విటమిన్ ఎ, సి దండిగా ఉంటాయి. ఇవి చర్మం బిగుతుగా ఉండటానికి తోడ్పడే కొలాజెన్ ఏర్పడటంలో పాలు పంచుకుంటాయి. అంటే ఇవి చర్మం నిగనిగకూ తోడ్పడతాయన్నమాట. ఇలా వృద్ధాప్య ఛాయలనూ తగ్గిస్తాయి.
