Ayurvedic herb: ఔషధాల గని.. అతిమధురంతో 40 రకాల వ్యాధులు మాయం
ఆయుర్వేదంలో వేల సంవత్సరాలుగా ఉపయోగించబడుతున్న అతి మధురం (లిక్కరైస్ లేదా ములేటి) కేవలం తియ్యటి రుచిని మాత్రమే కాదు, అద్భుతమైన ఔషధ గుణాలను కూడా కలిగి ఉంది. శ్వాసకోశ సమస్యల నుంచి జీర్ణక్రియ వరకు, రోగనిరోధక శక్తిని పెంచడం నుండి చర్మ సౌందర్యం వరకు అనేక ఆరోగ్య ప్రయోజనాలను అందించే ఈ మూలిక గురించి ఇప్పుడు వివరంగా తెలుసుకుందాం.
అతి మధురం ఒక ప్రసిద్ధ ఆయుర్వేద మూలిక. దీని శాస్త్రీయ నామం గ్లయిసిరైజా గ్లాబ్రా దీన్నే ములేటి అని కూడా పిలుస్తారు. దీని వేర్లు, బెరడు అనేక ఔషధ గుణాలను కలిగి ఉంటాయి. తియ్యటి రుచిని కలిగి ఉండటం వల్ల దీనికి “అతి మధురం” అనే పేరు వచ్చింది. ఇందులో గ్లయిసిరైజిక్ ఆమ్లం, గ్లూకోజ్, సుక్రోజ్, ఈస్ట్రోజెన్ వంటి అనేక సమ్మేళనాలు ఉంటాయి. దీన్ని రోజుకో అరచెంచా వాడితే ఏయే వ్యాధులు నయమవుతాయో చూద్దాం..
శ్వాసకోశ సమస్యలకు
అతి మధురం దగ్గు, జలుబు, గొంతు నొప్పి, ఆస్తమా, బ్రోన్కైటిస్ వంటి శ్వాసకోశ సంబంధిత సమస్యలకు చక్కగా పనిచేస్తుంది. ఇది కఫాన్ని కరిగించి బయటకు పంపడంలో సహాయపడుతుంది, శ్వాసనాళాలను శుభ్రపరుస్తుంది. తేనెతో కలిపి తీసుకుంటే గొంతు నొప్పికి తక్షణ ఉపశమనం లభిస్తుంది.
జీర్ణ సమస్యలకు
అతి మధురం జీర్ణవ్యవస్థకు ఎంతో మేలు చేస్తుంది. ఇది అల్సర్లు, కడుపులో మంట, ఎసిడిటీ, గ్యాస్, మలబద్ధకం వంటి సమస్యలను తగ్గిస్తుంది. దీనిలోని సమ్మేళనాలు కడుపులో ఒక రక్షణ పొరను ఏర్పరచి, ఆమ్లాల నుండి ఉపశమనాన్ని అందిస్తాయి. అలాగే, జీర్ణశక్తిని మెరుగుపరుస్తుంది.
రోగనిరోధక శక్తి పెంపు
అతి మధురం రోగనిరోధక శక్తిని పెంచడంలో సహాయపడుతుంది. ఇందులో ఉండే యాంటీ ఆక్సిడెంట్, యాంటీ మైక్రోబయల్ గుణాలు శరీరాన్ని వ్యాధుల నుండి కాపాడతాయి.
కాలేయ ఆరోగ్యానికి
కాలేయ ఆరోగ్యానికి అతి మధురం చాలా ప్రయోజనకరంగా ఉంటుంది. ఇది కాలేయాన్ని ఫ్రీ రాడికల్స్ బారి నుండి రక్షించి, కామెర్లు వంటి కాలేయ సంబంధిత సమస్యల చికిత్సలో సహాయపడుతుంది.
చర్మ, జుట్టు ఆరోగ్యం
అతి మధురం చర్మ సౌందర్యానికి కూడా ఉపకరిస్తుంది. దీనిలోని యాంటీ ఆక్సిడెంట్, యాంటీ ఇన్ఫ్లమేటరీ గుణాలు చర్మాన్ని సంరక్షించి, దద్దుర్లు, దురదలు, మొటిమలు, మచ్చలు తగ్గించడంలో సహాయపడతాయి. ఇది చర్మం రంగును మెరుగుపరిచి, యవ్వనంగా కనిపించేలా చేస్తుంది. జుట్టు రాలడాన్ని తగ్గించి, జుట్టు ఆరోగ్యానికి కూడా మంచిది.
ఇతర ప్రయోజనాలు
అతి మధురం మానసిక ఒత్తిడి, ఆందోళన, నిరాశను తగ్గించి, మానసిక ప్రశాంతతను అందిస్తుంది. నీరసం, అలసటను తగ్గించి శరీరానికి శక్తిని, ఉత్సాహాన్ని ఇస్తుంది. కీళ్లు, కండరాల నొప్పుల నుంచి ఉపశమనం కలిగిస్తుంది. అతి మధురం చూర్ణంతో దంతాలను తోముకోవడం వల్ల దంతాలు దృఢంగా మారి, పిప్పి పళ్ళు, చిగుళ్ళ రక్తస్రావం, నోటి పూత వంటి సమస్యలు తగ్గుతాయి. ఇది చెడు కొలెస్ట్రాల్ను తగ్గించి, గుండె ఆరోగ్యానికి సహాయపడుతుంది. ముఖ్యంగా స్త్రీలలో ఈస్ట్రోజెన్ హార్మోన్ల సమతుల్యతకు తోడ్పడుతుంది. జ్ఞాపకశక్తిని పెంచడానికి, ఏకాగ్రతను మెరుగుపరచడానికి సహాయపడుతుంది.
గమనిక: అతి మధురాన్ని ఔషధంగా ఉపయోగించే ముందు, ముఖ్యంగా దీర్ఘకాలిక వ్యాధులు ఉన్నవారు లేదా గర్భిణులు, పాలిచ్చే తల్లులు తప్పకుండా ఆయుర్వేద వైద్య నిపుణుడిని సంప్రదించాలి. అతిగా తీసుకోవడం వల్ల కొన్ని దుష్ప్రభావాలు (ఉదా: రక్తపోటు పెరగడం) ఉండవచ్చు.