జెట్ స్పీడ్‌లో దళపతి విజయ్ నయా మూవీ షూటింగ్.. విడుదలయ్యేది ఎప్పుడంటే

సినిమాల నుంచి రాజకీయాల్లోకి అడుగుపెట్టాడు స్టార్ హీరో విజయ్ దళపతి. తమిళనాడు రాజకీయాలకు కొత్త దిశానిర్దేశం చూపిస్తానని విజయ్ అంటున్నారు. దళపతి రాజకీయ ప్రవేశాన్ని ఆయన అభిమానులు కూడా స్వాగతిస్తున్నారు. అదే సమయంలో దీనిని వ్యతిరేకించే వారు కూడా ఉన్నారు. విజయ్ టీవీకే (తమిళగ వెట్రి కళగం) పార్టీ స్థాపించి ఒక సంవత్సరం పూర్తయిన సందర్భంగా మహాబలిపురంలోని ఒక రిసార్ట్‌లో వార్షికోత్సవ కార్యక్రమాన్ని నిర్వహించారు. ఈ కార్యక్రమంలో ఎన్నికల వ్యూహకర్త ప్రశాంత్ కిషోర్ కూడా పాల్గొన్నారు. ఈ కార్యక్రమం తమిళనాడు రాజకీయాల్లో పెద్ద చర్చకు దారితీసింది. దళపతి విజయ్ తన చివరి సినిమా జన నాయగన్ తోనూ బిజీగా ఉన్నాడు.

దళపతి విజయ్ జన నాయగన్ సినిమాకు వీహెచ్ వినోదు దర్శకత్వం వహిస్తున్నారు. ఈ సినిమా షూటింగ్ 2024 చివరలో ప్రారంభమైంది అలాగే ఇప్పుడు మొదటి దశ షూటింగ్ పూర్తయింది. ప్రస్తుతం చెన్నైలో రెండవ దశ షూటింగ్ జరుగుతోందని తెలుస్తుంది. ఈ సినిమా బాలకృష్ణ నటించిన భగవంత్ కేసరి సినిమాకు రీమేక్ అని చాలా మంది అంటున్నారు, అయితే ఇది కొత్త కథాంశంతో కూడిన సినిమా అని కోలీవుడ్ లో టాక్ వినిపిస్తుంది.

ఈ జన నాయగన్ సినిమా షూటింగ్ మే 2025 నాటికి పూర్తవుతుందని కోలీవుడ్ వర్గాలు చెబుతున్నాయి. ఈ సినిమా టైటిల్‌ పోస్టర్ ను జనవరి 26, 2025న గణతంత్ర దినోత్సవం సందర్భంగా విడుదల చేశారు. ఈ చిత్రాన్ని కెవిఎన్ ప్రొడక్షన్స్ నిర్మిస్తోంది. బీస్ట్ సినిమాలో నటించిన తర్వాత అందాల భామ పూజా హెగ్డే ఈ సినిమాలో విజయ్ సరసన నటిస్తోంది. వీరితో పాటు, బాబీ డియోల్, గౌతమ్ వాసుదేవ్ మీనన్, ప్రకాష్ రాజ్, నరైన్, ప్రియమణి, శ్రుతి హాసన్, మమతా బైజు, వరలక్ష్మి శరత్‌కుమార్, రెబా మోనికా జాన్, డిజె అరుణాచలం వంటి నటులు వివిధ సినీ ప్రముఖులు నటిస్తున్నారు. ముందుగా ఈ సినిమా అక్టోబర్ 2025 లో విడుదల అవుతుందని చెప్పినప్పటికీ, ఇప్పుడు 2026 లో పొంగల్ సందర్భంగా విడుదలయ్యే అవకాశం ఉంది.