ఆ హీరోయిన్ తో కలిసి నటించాలని ఉంది.. మనసులో మాట బయట పెట్టిన సూపర్ స్టార్

రజినీకాంత్ హీరోగా నెల్సన్ దిలీప్‌కుమార్ దర్శకత్వంలో తెరకెక్కిన చిత్రం ‘జైలర్ 2’. ఈ సినిమాలో విద్యాబాలన్ కీలక పాత్రలో కనిపించనున్నారు. ఆమె ‘కాంతా’ అనే పాత్రను పోషిస్తున్నారు. 2023లో విడుదలై విజయవంతమైన జైలర్ కు సీక్వెల్‌గా రూపొందిన ఈ సినిమాపై ఇప్పటికే భారీ అంచనాలు ఉన్నాయి. అక్టోబర్ 15న ఈ చిత్రం థియేటర్లలో విడుదల కావాల్సి ఉంది. ఈ  సినిమా ప్రమోషన్ల సందర్భంగా రజినీకాంత్ విద్యాబాలన్ గురించి మాట్లాడుతూ.. ఆమె అందమైన నటి మాత్రమే కాదని, అద్భుతమైన ప్రతిభ ఉన్న కళాకారిణి అని ప్రశంసించారు. అంతేకాదు, ఆమెతో కలిసి పూర్తిస్థాయి సినిమా చేయాలని తనకు ఉందని వెల్లడించారు. దీంతో భవిష్యత్తులో ఈ జోడీ మరో సినిమాలో కనిపిస్తుందా.? అనే ఆసక్తి ప్రేక్షకుల్లో నెలకొంది.

సినిమాలో విద్యాబాలన్ పాత్ర ఎంత కీలకమో ప్రమోషన్లలో దర్శకుడు నెల్సన్ చెప్పిన విషయాలు తెలియజేస్తున్నాయి. రజినీకాంత్‌కు ధీటుగా నిలబడే బలమైన పాత్రలో ఆమె కనిపించనున్నారు. అయితే, తలైవా ఎదుట సిగరెట్ తాగుతూ ఆయన ముఖం వైపు పొగ వదిలే సన్నివేశాన్ని చిత్రీకరించే సమయంలో విద్యాబాలన్ కొంత ఆందోళనకు గురయ్యారట. ఈ సన్నివేశం షూటింగ్ మొదటి రోజే జరిగిందని, విద్యాబాలన్ చేతులు వణకడం గమనించానని నెల్సన్ వెల్లడించారు. ఆ సీన్‌ను సరిగ్గా చిత్రీకరించడానికి సుమారు మూడు టేకులు తీసుకోవాల్సి వచ్చిందని తెలిపారు. తెరపై ఎంతో ధైర్యంగా కనిపించే పాత్రను పోషించేటప్పుడు ఆమె ఎదుర్కొన్న ఈ అనుభవం ఇప్పుడు చర్చనీయాంశంగా మారింది.

జైలర్ 2 విద్యాబాలన్‌కు మరో ప్రత్యేకమైన అనుభవాన్ని కూడా అందించింది. తమిళంలో సుదీర్ఘమైన సంభాషణలు చెప్పడం కోసం ఆమె ఎంతో శ్రమించాల్సి వచ్చిందని ప్రమోషన్ కార్యక్రమంలో సహనటులు వెల్లడించారు. డైలాగ్స్ నేర్చుకునే సమయంలో ఎంతో ఏకాగ్రతతో ఉండేవారని, షాట్ పూర్తయ్యాక మాత్రం అందరితో సరదాగా మాట్లాడేవారని విద్యాబాలన్ తన అనుభవాలను పంచుకున్నారు. విభిన్నమైన కథలను ఎంచుకుంటూ తన నటనతో ప్రేక్షకులను ఆకట్టుకునే విద్యాబాలన్‌కు, స్టైల్‌తో పాటు ప్రత్యేకమైన స్క్రీన్ ప్రెజెన్స్‌తో అభిమానులను అలరించే రజినీకాంత్‌కు భారీ ఫ్యాన్ ఫాలోయింగ్ ఉంది. వీరిద్దరూ ‘జైలర్ 2’లో కలిసి కనిపించడం ఇప్పటికే ఆసక్తిని పెంచుతోంది.

మరిన్ని సినిమా వార్తల కోసం ఇక్కడ క్లిక్ చేయండి.