Kannappa Movie: కన్నప్ప సినిమా హార్డ్ డ్రైవ్తో యువతి పరారీ.. ఇద్దరిపై కేసు నమోదు..
మంచు విష్ణు నటించిన సినిమా కన్నప్ప రిలీజ్కి సిద్ధమవుతోంది. ఈ క్రమంలోనే ఈ చిత్రానికి సంబంధించిన కీలక సన్నివేశాలు ఉన్న హార్డ్డ్రైవ్ ముంబై నుంచి హైదరాబాద్కి ఇటీవల కొరియర్ చేశారు. అయితే ఈనెల 25న ఆ కొరియర్ను ఆఫీస్బాయ్ తీసుకున్నా.. మేనేజ్మెంట్కు దాన్ని ఇవ్వలేదు. ఓ అమ్మాయి హార్డ్ డ్రైవ్ తీసుకొని పరారీ అయినట్లు సమాచారం.
Updated on: May 27, 2025 | 11:40 AM
టాలీవుడ్ హీరో మంచు విష్ణు డ్రీమ్ ప్రాజెక్ట్ కన్నప్ప. కొన్ని నెలలుగా షూటింగ్ జరుపుకున్న ఈ సినిమా త్వరలోనే విడుదల కానుంది. ఈ క్రమంలో ఈ సినిమాకు సంబంధించిన హార్డ్ డ్రైవ్ మాయమైనట్లు ఎగ్జిక్యూటివ్ ప్రొడ్యూసర్ పోలీసులకు ఫిర్యాదు చేశారు. తమ అనుమతి లేకుండా హార్డ్ డ్రైవ్ తీసుకెళ్లారని ఫిల్మ్ నగర్ పోలీసులకు తెలిపారు. వివరాల ప్రకారం.. ముంబైకి చెందిన వీఎఫ్ఎక్స్ విక్రేతల్లో ఒకరు (హైవ్ స్టూడియోస్) కన్నప్ప సినిమాకు సంబంధించి కీలకమైన డేటాతో కూడిన హార్డ్ డ్రైవ్ను ఇటీవల డీటీడీసీ కొరియర్ ద్వారా ఫిల్మ్ నగర్లోని ట్వంటీ ఫోర్ ఫ్రేమ్స్ ఫ్యాక్టరీ ప్రైవేట్ లిమిటెడ్ కార్యాలయానికి పంపించారు. డీటీడీసీ డెలివరీ రికార్డుల ప్రకారం సదరు పార్శిల్ ఈనెల 25న కార్యాలయానికి చేరుకుంది.
అయితే ఆ పార్శిల్ తీసకున్న ఆఫీస్ బాయ్ రఘు దానిని చరిత అనే యువతికి అప్పగించాడు. ఆ తర్వాత హార్డ్ డ్రైవ్ తీసుకున్న ఆ అమ్మాయి ఎవరికీ కనిపించకుండా తిరుగుతుంది. కొందరు వ్యక్తుల మార్గదర్శకత్వంలో పనిచేస్తున్న చరిత సినిమాకు నష్టం కలిగించాలనే ఉద్దేశంతోనే కనిపించకుండా పోయిందంటూ ట్వంటీ ఫోర్ ఫ్రేమ్స్ ఫ్యాక్టరీ ప్రైవేట్ లిమిటెడ్ కు చెందిన రెడ్డి విజయ్ కుమార్ ఫిల్మ్ నగర్ పోలీసులకు ఫిర్యాదు చేశారు. ఈ కారణంతో తమ సినిమా ప్రాజెక్టుకు తీవ్ర అంతారాయం కలిగించిందని.. సదరు హార్డ్ డ్రైవ్ లో కన్నప్ప సినిమాకు సంబంధించి విడుదల చేయని, గోప్యమైన , సున్నితమైన కంటెంట్ ఉందని.. దానిని లీక్ చేయడం లేదా.. డిలీట్ చేయడం వల్ల తమకు ఆర్థికంగా కోలుకోలేని నష్టం కలుగుతుందని ఫిర్యాదులో పేర్కొన్నారు. తక్షణమే హార్డ్ డ్రైవ్ ను రికవరీ చేసి తమకు అప్పగించాలని కోరారు. ఈ ఘటనపై కేసు నమోదు చేసుకుని దర్యాప్తు చేస్తున్నట్ల పోలీసులు తెలిపారు.
ఇవి కూడా చదవండి :
Damarukam Movie: ఢమరుకం మూవీ విలన్ భార్య తెలుగులో తోపు హీరోయిన్.. ఇంతకీ ఆమె ఎవరంటే..
