Waltair Veerayya: ఏయూలో చకచకా ప్రీ రిలీజ్ ఈవెంట్ ఏర్పాట్లు.. విశాఖకు రానున్న మెగాస్టార్ చిరంజీవి, రవితేజ..

మెగాస్టార్‌ మూవీ వస్తోందంటే అభిమానులకు పండగే పండుగ. సంక్రాంతి పండగ సందర్భంగా థియేటర్లలో సందడి చేసేందుకు రెడీ అయింది చిరంజీవీ నటించిన వాల్తేరు వీరయ్య మూవీ. ఈనెల 13న ప్రేక్షకుల ముందుకు రాబోతుంది. ఇప్పటికే విడుదలైన సాంగ్స్ ఆకట్టుకుంటున్నాయి. ఇక శనివారం సాయంత్రం రిలీజ్ అయిన ట్రైలర్ యూట్యూబ్ ను షేక్ చేస్తుంది. ఈ చిత్రప్రచార కార్యక్రమాల్లో ఈరోజు (ఆదివారం) విశాఖ ఆంధ్రయూనివర్సిటీ ఇంజనీరింగ్ కాలేజ్ గ్రౌండ్స్ లో ప్రిరిలీజ్‌ ఈవెంట్‌ గ్రాండ్ గా ప్లాన్ చేసింది మూవీ యూనిట్. అయితే సమయం తక్కువ ఉండడంతో చకచకా ఏర్పాట్లు చేస్తుంది చిత్రబృందం. ఇప్పటికే ఏయూలో మెగా అభిమానుల సందడి మొదలైంది.

ఈరోజు సాయంత్రం 6 గంటలకు జరిగే ప్రిరిలీజ్ వేడుకకు మధ్యాహ్నం హైదరాబాద్ నుంచి స్పెషల్ చార్టెడ్ ప్లైట్‌లో విశాఖ రానున్నారు మెగాస్టార్ చిరంజీవి, మాస్ మాహారాజా రవితేజ. ఇప్పటికే రిలీజైన వాల్తేరు వీరయ్య ట్రైలర్ సోషల్ మీడియాను షేక్ చేస్తుంది. అభిమానుల అంచనాలను పెంచేసింది వాల్తేరు వీరయ్య ట్రైలర్. మాస్‌ ప్రేక్షకులకు కావలసిన అంశాలు, వినోదం, అద్భుతమైన భావోద్వేగాలతో ట్రైలర్ కలర్‌ఫుల్‌ ఎంటర్టైన్‌మెంట్‌ ఉంది. కే.ఎస్‌ రవీంద్ర (బాబీ) డైరెక్షన్, దేవీ శ్రీ స్వరకల్పన, మైత్రీ మూవీస్ నిర్మాణంలో ఈ చిత్రం రూపుదిద్దుకుంది.

ఈ సినిమాలో చిరు సరసన శ్రుతి హాసన్ నటిస్తుండగా.. ఇందులో మాస్ మాహారాజా రవితేజ కీలకపాత్రలో నటిస్తున్నారు. ఇందులో చాలా కాలం తర్వాత చిరు ఫుల్ మాస్ అవతారంలో కనిపించనున్నారు. మాస్, యాక్షన్ సన్నివేశాలతోపాటు.. చిరు కామెడీ టైమింగ్ కూడా మరింత ఎక్కువగానే ఉన్నట్లు ట్రైలర్ చూస్తే తెలుస్తోంది. దీంతో ఈ సంక్రాంతికి చిరు అభిమానులకు ఫుల్ ట్రీట్ ఇవ్వనున్నట్లుగా అర్థమవుతుంది.