30 ఏళ్ల వయసు తేడా ఉంటే తప్పేంటి! హీరోలతో రొమాన్స్‌పై కౌంటర్ ఇచ్చిన యువ నటి

Bold Comments Heroine

సినీ పరిశ్రమలో హీరో హీరోయిన్ల మధ్య వయసు వ్యత్యాసం అనేది దశాబ్దాలుగా నడుస్తున్న చర్చ. ముఖ్యంగా సీనియర్ స్టార్ హీరోల సరసన యంగ్ హీరోయిన్లు నటించినప్పుడు సోషల్ మీడియాలో రకరకాల కామెంట్స్ వినిపిస్తుంటాయి. తాజాగా ఒక కన్నడ భామకు కూడా ఇలాంటి ప్రశ్నలే ఎదురయ్యాయి. టాలీవుడ్‌లో వరుసగా పెద్ద హీరోలతో స్క్రీన్ షేర్ చేసుకుంటున్న ఈ చిన్నది, తనపై వస్తున్న ట్రోలింగ్‌కు ధీటుగా బదులిచ్చింది. వయసు అనేది కేవలం ఒక సంఖ్య మాత్రమేనని, నటనకు ప్రాధాన్యం ఉన్నప్పుడు అవేమీ పట్టించుకోనని స్పష్టం చేసింది.

మాస్ మహారాజాతో రొమాన్స్..

ప్రస్తుతం ఆ ముద్దుగుమ్మ టాలీవుడ్ మాస్ మహారాజా సరసన ‘భర్త మహాశయులకు విజ్ఞప్తి’ సినిమాలో నటిస్తోంది. 2026 సంక్రాంతి కానుకగా విడుదల కానున్న ఈ సినిమా ప్రమోషన్లలో భాగంగా ఒక ఇంటర్వ్యూలో పాల్గొన్న ఆమెకు ఏజ్ గ్యాప్ గురించి ప్రశ్న ఎదురైంది. ఈ చిత్ర కథానాయకుడి వయసు 57 ఏళ్లు కాగా, ఆమె వయసు కేవలం 29 ఏళ్లు. దాదాపు 30 ఏళ్ల వయసు తేడా ఉన్న హీరోలతో రొమాన్స్ చేయడంపై నెటిజన్లు నెగటివ్ కామెంట్స్ చేస్తున్నారు. దీనిపై స్పందిస్తూ.. “నేను ఒక నటిగా నా పాత్రకు ఎంతవరకు న్యాయం చేస్తున్నాను అనేదే చూస్తాను. సినిమా యంగ్ హీరోదా లేక సీనియర్ హీరోదా అనేది ముఖ్యం కాదు” అని ఆమె కుండబద్దలు కొట్టింది.

Bmv Poster

నేర్చుకోవాల్సింది చాలా ఉంది..

గతంలో కింగ్ నాగార్జున సరసన ‘నా సామిరంగ’ సినిమాలో నటించి మెప్పించిన ఈ భామ, అప్పటి నుంచి సీనియర్ హీరోలకే ప్రాధాన్యత ఇస్తోందనే ముద్ర పడింది. దీనిపై ఆమె క్లారిటీ ఇస్తూ.. “నాగార్జున వంటి పెద్ద నటులతో పనిచేయడం నా అదృష్టం. ఆయన సెట్స్‌లో చూపించే ఎనర్జీ, డెడికేషన్ చూసి నేను షాక్ అయ్యాను. సీనియర్ హీరోలతో పనిచేస్తే కెరీర్‌కు సంబంధించి ఎన్నో కొత్త విషయాలను నేర్చుకోవచ్చు. వారి అనుభవం మనకు పాఠంలా పనిచేస్తుంది” అని కొనియాడింది. కేవలం గ్లామర్ పాత్రలకే కాకుండా, నటనకు స్కోప్ ఉన్న పాత్రలకే తాను ఓటు వేస్తానని ఆమె తెలిపింది.

Ashika Ranganath

కేవలం ఈ ఒక్క సినిమానే కాదు, మెగాస్టార్‌తో కలిసి ఒక భారీ ప్రాజెక్టులో నటిస్తున్న ఈ భామ, తమిళంలోనూ కార్తి సరసన ఛాన్స్ కొట్టేసింది. ఒకప్పుడు హీరోయిన్లు సీనియర్ హీరోలతో నటించడానికి వెనకడుగు వేసేవారు కానీ, ఈ కన్నడ బ్యూటీ మాత్రం తనకంటూ ఒక ప్రత్యేకమైన రూట్‌ను క్రియేట్ చేసుకుంటోంది. నటనలో పరిణతి ఉన్న పాత్రలు దొరికితే వయసుతో సంబంధం లేకుండా ఏ హీరోతోనైనా నటించడానికి తాను సిద్ధమని ఓపెన్ అయిపోయింది ఆషికా రంగనాథ్​. ఈమె చేసిన వ్యాఖ్యలు ఇప్పుడు ఇండస్ట్రీలో చర్చనీయాంశంగా మారాయి. ఏది ఏమైనా, తనపై వస్తున్న విమర్శలకు గట్టిగానే సమాధానం చెప్పింది.