Silk Smitha: “సిల్క్ స్మిత మృతదేహంపై ఈగలు వాలుతుంటే చూసి ఆర్టిస్ట్ లైఫ్ ఇదా అనిపించింది”

నటి అనురాధ, దివంగత నటి సిల్క్ స్మితతో తన అనుబంధం, స్మిత వ్యక్తిత్వం, ఆమె మరణం వెనుక ఉన్న సంఘటనలు, అప్పటి సినీ పరిశ్రమ పరిస్థితులపై పలు విషయాలు ఓ ఇంటర్వ్యూలో వెల్లడించారు. సిల్క్ స్మిత మరణం ఇప్పటికీ ఒక మిస్టరీ అని పేర్కొంటూ, ఆమె ఎవరితోనూ తన వ్యక్తిగత విషయాలను పంచుకునే స్వభావం కాదని అనురాధ తెలిపారు. సిల్క్ స్మిత మరణానికి ముందురోజు రాత్రి అనురాధకు ఫోన్ చేసి ఇంటికి రమ్మని అడిగారని, అయితే అనురాధ తన భర్త సతీష్ బెంగళూరు నుంచి వస్తున్న కారణంగా వెళ్లలేదని చెప్పారు. మరుసటి రోజు ఉదయం తన భర్త ఫ్లాష్ న్యూస్‌లో సిల్క్ స్మిత మరణ వార్త చూపిస్తే, తీవ్ర షాక్‌కు గురయ్యారని అనురాధ వివరించారు. చనిపోయే ముందురోజే పిలిచిందని, ఒకవేళ తాను వెళ్లుంటే సిల్క్ స్మిత తన మనసులోని బాధను పంచుకుని ఉండేదేమోనని ఆవేదన వ్యక్తం చేశారు. సిల్క్ స్మిత మృతదేహాన్ని విజయ హాస్పిటల్‌కు పోస్టుమార్టం నిమిత్తం తరలించారని, అక్కడ ఈగలు మూగుతున్న తన దేహం చూసి వాటిని తామే పక్కకు తాము ప్రయత్నించినట్లు తెలిపారు.  ఆ దృశ్యం అప్పట్లో ఒక క్రేజీ నటి అంతిమ దశను చూపిందని కన్నీరుమున్నీరయ్యారని అనురాధ గుర్తుచేసుకున్నారు. సిల్క్ స్మిత ఎవరితోనూ వ్యక్తిగత సమస్యలు చర్చించేవారు కాదని అనురాధ చెప్పుకొచ్చారు. స్నేహంగా ఉన్నా, కేవలం కొనుగోళ్లు, ఇతర సాధారణ విషయాలు మాత్రమే చెప్పేవారని, తనలోని బాధను ఎప్పుడూ వ్యక్తం చేయలేదని పేర్కొన్నారు. సిల్క్ స్మిత పెళ్లి చేసుకోలేదని, చాలా చిన్న వయసులోనే కన్నుమూశారని తెలిపారు. 14 ఏళ్ల వయసులో అనురాధ మోహన పున్నగై సినిమాలో నటించినప్పుడు సిల్క్ స్మితకు 18-19 ఏళ్లు ఉంటాయని చెప్పారు.

అప్పటి సినీ పరిశ్రమ పనితీరు గురించి కూడా అనురాధ వివరించారు. సిల్క్ స్మిత మేకప్, డ్రెస్ చేంజ్ కోసం దాదాపు ఒకటిన్నర గంట సమయం తీసుకునేవారని, ఎవరైనా తలుపు తడితే మరింత ఆలస్యం చేసేవారని పేర్కొన్నారు. అప్పట్లో డిజైనర్లు ఉండేవారు కాదని, కాస్ట్యూమర్లు ఆర్టిస్టుల అభిప్రాయాలు తెలుసుకుని దుస్తులు సిద్ధం చేసేవారని తెలిపారు. ఒక రోజులో 100 నుండి 150 షాట్లు చిత్రీకరించేవారని, మానిటర్లు, కారవాన్‌లు వంటి సౌకర్యాలు లేవని చెప్పారు. అవుట్‌డోర్ షూటింగ్‌ల సమయంలో బెడ్‌షీట్లను అడ్డుపెట్టుకుని దుస్తులు మార్చుకునేవారని వివరించారు. ఆర్టిస్టులందరూ తమ సొంత కుర్చీల్లో కూర్చుని కబుర్లు చెప్పుకుంటూ, షాట్ల మధ్య అక్కడే వేచి ఉండేవారని గుర్తు చేసుకున్నారు. ప్రస్తుత సినీ పరిశ్రమలో బడ్జెట్లు, డిజైనర్లు, కారవాన్‌లు వంటి సౌకర్యాలతో ఎన్నో మార్పులు వచ్చాయని, ఇది ఆరోగ్యకరమైన మార్పుగానే భావిస్తున్నానని అనురాధ అన్నారు. అప్పట్లో డాన్సర్లు జయమాలిని, జ్యోతిలక్ష్మి అక్కాచెల్లెళ్లు అయినా ఒకరితో ఒకరు మాట్లాడుకునేవారు కాదని, వారిద్దరి మధ్య తీవ్ర పోటీ ఉండేదని అనురాధ గుర్తు చేసుకున్నారు. చివరికి జ్యోతిలక్ష్మి మరణానికి ముందు మాత్రమే వారు మాట్లాడుకోవడం మొదలుపెట్టారని జయమాలిని గారు చెప్పారని వివరించారు. వారిద్దరూ సమానమైన డాన్సర్‌లని, ఒకే రకమైన బాడీ షేప్ కలిగి ఉంటారని అనురాధ స్పష్టం చేశారు.

మరిన్ని సినిమా వార్తల కోసం ఇక్కడ క్లిక్ చేయండి.