Nani: రానా గురించి ఆసక్తికర కామెంట్స్ చేసిన న్యాచురల్ స్టార్.. ఆ పాన్ ఇండియా స్టార్‎తో నటించాలని ఉందని..

Nani, Rana

ఎలాంటి ఫిల్మ్ బ్యాగ్రౌండ్ లేకుండా అసిస్టెంట్ డైరెక్టర్‏గా ఇండస్ట్రీలోకి అడుగుపెట్టి హీరోగా గుర్తింపు అందుకున్నారు న్యాచురల్ స్టార్ నాని. అష్టా చమ్మా సినిమాతో హీరోగా వెండితెరపై సందడి చేసిన ఈ హీరో.. ఆ తర్వాత వెనుదిరిగి చూసుకోలేదు. ఇప్పటివరకు నాని నటించిన చిత్రాలన్ని సూపర్ హిట్ కావడం విశేషం. ప్రస్తుతం శ్రీకాంత్ ఓదెల దర్శకత్వంలో దసరా చిత్రం చేస్తున్నారు నాని. ఇందులో కీర్తి సురేష్ కథానాయికగా నటిస్తోంది. ఇటీవలే షూటింగ్ కంప్లీట్ చేసుకున్న ఈ మూవీ ప్రస్తుతం పోస్ట్ ప్రొడక్షన్ పనులు జరుపుకుంటుంది. ఈ క్రమంలోనే ఇటీవల హీరో రానా దగ్గుబాటితో కలిసి సింగర్ స్మిత నిర్వహిస్తున్న నిజం విత్ స్మిత టాక్ షోలో పాల్గొన్న నాని. వీరికి సంబంధించిన 3వ ఎపిసోడ్ ఈరోజు నుంచే స్ట్రీమింగ్ అవుతుంది. ఇందులో రానా, నాని తమ వ్యక్తిగత విషయాలను పంచుకున్నారు.

ఈ క్రమంలోనే రానాతో తనకున్న అనుబంధాన్ని గురించి చెప్పుకొచ్చారు నాని. అష్టా చమ్మా సినిమా చేసేటప్పుడు నా సినిమా ఎవరు చూస్తారా అనుకునేవాడినని.. అలా మూడు నాలుగు సినిమాలు చేశానని అన్నారు నాని.. ఆ సమయంలో ఇండస్ట్రీకి సంబంధించిన కుటుంబాలలో తనకు ఎవరు తెలియదని తెలిపారు.

“నా సినిమాల గురించిగానీ.. నా నటన గురించి గాని ఎవరూ మాట్లాడేవరాు కాదు. దాంతో నా సినిమాలను ఎవరూ చూడడం లేదేమో అనుకున్నాను. కానీ ఓ మ్యాగజైన్‏కు ఇచ్చిన ఇంటర్వ్యూలో రానా నా గురించి మాట్లాడాడు. ఇండస్ట్రీకి కొత్తగా వచ్చిన వారిలో ఎవరిపై బెట్ పెడతారనే ప్రశ్నకు ఆయన నా పేరు చెప్పాడు. ఒక పెద్ద ఫ్యామిలీకి చెందిన వ్యక్తి నా గురించి అలా మాట్లాడడం అదే మొదటిసారి. అప్పటికీ నేను బయట రానాను చూడలేదు. కానీ ఆయన పట్ల అభిమానం పెరిగిపోయింది. ఆ తర్వాత మేమిద్దరం కలుసుకున్నాం. మా మధ్య స్నేహం పెరుగుతూనే వచ్చింది. మేము కలిసి నటించాలని ఉంది. చాలాసార్లు ఈ విషయాన్ని మాట్లాడుకున్నాం. అన్ని కలిస్తే కలిసి సినిమా చేస్తాం” అంటూ చెప్పుకొచ్చారు.

మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి.