Aarthi Agarwal: 16 ఏళ్లకే తొలి సినిమాతో స్టార్డమ్.. ఆ చిన్న పొరపాటుతో ప్రాణాలు వదిలిన ఆర్తి అగర్వాల్..
మొదటి సినిమాతోనే స్టార్ హీరో విక్టరీ వెంకటేష్తో జతకట్టిన ఆర్తి... ఆ తర్వాత ప్రభాస్, మెగాస్టార్ చిరంజీవి, నాగార్జున, తరుణ్, మహేష్ బాబు, బాలకృష్ణ, మాస్ మహారాజా రవితేజ వంటి అగ్ర హీరోలతో స్క్రీన్ షేర్ చేసుకుంది. ముఖ్యంగా ఇంద్ర సినిమాలో చిరంజీవికి ప్రేయసిగానే కాదు.. ఎదురించే ప్రతినాయికగానూ ఆమె నటన అద్భుతమనే చెప్పాలి. చిన్న వయసులోనే స్టార్ డమ్ అందుకుని.. టాప్ హీరోయిన్గా ఓ వెలుగు వెలిగిన అంతలోనే అనంతలోకాలకు వెళ్లిపోయింది.
Updated on: May 18, 2023 | 6:53 PM
చంద్రబింబం లాంటి ముఖం.. కలువల్లాంటి కన్నులు.. నిండైన రూపం.. చూడగానే కట్టిపడేసే అందం.. అన్ని ఆర్తి అగర్వాల్ సొంతమే. ఇప్పటికీ తెలుగు ప్రేక్షకుల హృదయాల్లో చెరగని రూపం. ‘నువ్వు నాకు నచ్చావ్’ అంటూ 16 ఏళ్ల వయసులో టాలీవుడ్ వెండితెరపై సందడి చేసింది. తొలి సినిమాతోనే భారీ విజయాన్ని అందుకుంది. ఇంకేముంది.. ఆమె ముందు వరుస అవకాశాలు క్యూకట్టాయి. మొదటి సినిమాతోనే స్టార్ హీరో విక్టరీ వెంకటేష్తో జతకట్టిన ఆర్తి… ఆ తర్వాత ప్రభాస్, మెగాస్టార్ చిరంజీవి, నాగార్జున, తరుణ్, మహేష్ బాబు, బాలకృష్ణ, మాస్ మహారాజా రవితేజ వంటి అగ్ర హీరోలతో స్క్రీన్ షేర్ చేసుకుంది. ముఖ్యంగా ఇంద్ర సినిమాలో చిరంజీవికి ప్రేయసిగానే కాదు.. ఎదురించే ప్రతినాయికగానూ ఆమె నటన అద్భుతమనే చెప్పాలి. చిన్న వయసులోనే స్టార్ డమ్ అందుకుని.. టాప్ హీరోయిన్గా ఓ వెలుగు వెలిగిన ఆర్తి అంతలోనే అనంతలోకాలకు వెళ్లిపోయింది.
నిండైన రూపం.. చక్కని చిరునవ్వుతో కోట్లాది ప్రేక్షకులను అలరించిన ఆర్తి నిజ జీవితంలో మాత్రం ఎంతో విషాదం దాగుంది. కెరీర్ మంచి ఫాంలో ఉన్న సమయంలోనే ప్రేమ, పెళ్లంటూ వచ్చిన రూమర్స్తో విసిగి 2005లో క్లీనింగ్ కెమికల్ తాగి ఆత్మహత్య ప్రయత్నం చేసింది. ఆ తర్వాత ఏడాది.. మెట్లపై నుంచి పడి ఆసుపత్రిలో చేరింది. ఇక ప్రేమే కాదు.. పెళ్లి సైతం ఆమె జీవితంలో ఎక్కువ రోజులు కొనసాగలేదు. 2007లో న్యూజెర్సీకి చెందిన ఉజ్వల్ నికమ్ ను పెళ్లి చేసుకున్నారు ఆర్తి. ఆ తర్వాత కొంత కాలంగా వ్యక్తిగత కారణాలతో విడాకులు తీసుకున్నారు.
అయితే చాలా కాలం ఇండస్ట్రీకి దూరంగా ఉన్న ఆర్తి అగర్వాల్ రీఎంట్రీ సైతం పెద్ద సక్సెస్ కాలేదు. పలు చిత్రాల్లో కీలకపాత్రలలో కనిపించినప్పటికీ అంతగా హిట్ కాకపోవడంతో.. ఆర్తికి అవకాశాలు రాలేదు. తెలుగులో మొత్తం 50కి పైగా చిత్రాల్లో నటించింది ఆర్తి అగర్వాల్. అయితే సెకండ్ ఇన్నింగ్స్ స్టార్ట్ చేసిన ఆర్తి.. బరువు తగ్గేందుకు తీసుకున్న నిర్ణయమే ఆమె ప్రాణాలను తీసింది. స్థూలకాయం, శ్వాసకోస సమస్యలతో బాధపడిన ఆమె.. 2015 జూన్ 4న అమెరికాలోని అట్లాంటిక్ సిటీలో లైపోసక్షన్ సర్జరీ చేయించుకుంది. చికిత్స వికటించడంతో గుండెపోటు వచ్చి ఇన్ఫెక్షన్ రావడంతో జూన్ 6న ఆర్తి అగర్వాల్ కన్నుమూసింది.
మరిన్ని సినిమా వార్తల కోసం ఇక్కడ క్లిక్ చేయండి.
