బ్రేకింగ్: సీనియర్ నటి గీతాంజలి కన్నుమూత

అలనాటి నటి గీతాంజలి కన్నుమూశారు. గుండెపోటుతో రాత్రి 11.45నిమిషాలకు ఆమె తుదిశ్వాస విడిచారు. ప్రస్తుతం గీతాంజలి పార్థివదేహం నందినగర్‌లోని ఆమె నివాసంలో ఉంచారు. తెలుగు, తమిళం, కన్నడ, హిందీ భాషల్లో ఆమె నటించారు. గీతాంజలి అసలు పేరు మణి. సహనటుడు రామకృష్ణను గీతాంజలి వివాహం చేసుకున్నారు. కాకినాడలో జన్మించిన గీతాంజలి.. మొదట హిందీలో ‘పేయింగ్ గెస్ట్’ అనే చిత్రం ద్వారా వెండితెరకు పరిచయం అయ్యింది. శ్రీశ్రీ మర్యాదరామన్న, సీతారామకళ్యాణం, డాక్టర్ చక్రవర్తి, బొబ్బిలి యుద్ధం, ఇల్లాలు, తోడ నీడ, లేత మనసులు, దేవత, శ్రీకృష్ణావతారం, ప్రాణమిత్రులు, పూలరంగడు, గూఢాచారి 116వంటి చిత్రాల్లో ఆమె నటించారు.  చివరగా నాగార్జున నటించిన ‘భాయ్’ చిత్రంలో కనిపించిన గీతాంజలి.. తమన్నా నటించిన దటీజ్ మహాలక్ష్మిలోనూ నటించింది. అయితే ఈ చిత్రం ఇంకా విడుదల అవ్వలేదు. నంది అవార్డు కమిటీలోనూ సభ్యురాలిగా పనిచేశారు. ఇక వీరి కుమారుడు ‘భూమ’ అనే చిత్రం ద్వారా హీరోగా పరిచయం అయ్యాడు. మధ్యాహ్నం 3.30గంటలకు గీతాంజలి మృతదేహం ఫిల్మ్‌చాంబర్‌కు తరలించనుండగా.. సాయంత్రం 5గంటలకు మహాప్రస్థానంలో ఆమె అంత్యక్రియలు నిర్వహించనున్నారు. మరోవైపు గీతాంజలి మరణంపై టాలీవుడ్ ప్రముఖులు తమ సంతాపాన్ని ప్రకటిస్తున్నారు.