‘సాహో’ దర్శకుడు సుజీత్ నిశ్చితార్థం.. ఫొటోలు వైరల్..!

టాలీవుడ్‌లో వరుస పెళ్లి బాజాలు మోగుతున్నాయి. లాక్‌డౌన్ సమయంలోనూ ప్రభుత్వ నిబంధనలకు అనుగుణంగా కొంతమంది వివాహం చేసుకోగా.. మరికొందరు నిశ్చితార్థం, రోకా వంటి కార్యక్రమాలను పూర్తి చేసుకుంటున్నారు. ఈ నేపథ్యంలో తాజాగా సాహో దర్శకుడు సుజీత్ రెడ్డి నిశ్చితార్థం చేసుకున్నారు. తాను ప్రేమించిన ప్రవళ్లిక అనే డెంటిస్ట్‌కి ఆయన ఇవాళ ఉంగరం తొడిగేశారు. హైదరాబాద్‌లో జరిగిన ఈ వేడకకు ఇరు వర్గాల అత్యంత సన్నిహితులు మాత్రమే హాజరైనట్లు తెలుస్తోంది. ఈ వేడుకకు సంబంధించిన ఫొటోలు ప్రస్తుతం సోషల్ మీడియాలో వైరల్‌గా మారాయి.

కాగా పలు షార్ట్‌ ఫిలింస్‌తో మంచి పేరు తెచ్చుకున్న సుజీత్.. రన్‌ రాజా రన్ చిత్రం ద్వారా టాలీవుడ్‌లోకి దర్శకుడిగా ఎంట్రీ ఇచ్చారు. ఈ సినిమా మంచి విజయం సాధించడంతో.. ఆ తరువాత ప్రభాస్‌ని డైరెక్ట్ చేసే అవకాశాన్ని సొంతం చేసుకున్నారు. ఇక ప్రభాస్‌తో సుజీత్ తెరకెక్కించిన సాహో గతేడాది ప్రేక్షకుల ముందుకు రాగా.. పెద్దగా ఆకట్టుకోలేకపోయింది. అయితే అందులో సుజీత్ డైరెక్షన్‌కి మంచి మార్కులే పడ్డాయి. ఇక ఈ దర్శకుడు ప్రస్తుతం మెగాస్టార్‌ చిరంజీవిని డైరెక్ట్ చేసేందుకు సిద్ధమయ్యారు. చిరు ప్రధాన పాత్రలో నటిస్తోన్న లూసిఫర్ రీమేక్‌కి సుజీత్ దర్శకత్వం వహించనున్నారు. కొరటాలతో చిరు సినిమా తరువాత ఈ మూవీ సెట్స్‌పైకి వెళ్లనుంది.

Read This Story Also: కరోనా పరీక్షలు.. ఏపీ ఖాతాలో మరో రికార్డు