AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Chandra Mohan: ఆ హీరో ఆస్తులు చూడటానికే సగం రోజు పట్టింది.. అయినా నా దగ్గర 2 లక్షలు అప్పు తీసుకుని ఏం చేశాడంటే.. చంద్రమోహన్..

దివంగత నటుడు చంద్రమోహన్ సినిమాలకు ప్రత్యేక ఫ్యాన్ ఫాలోయింగ్ ఉంటుంది. ఆయన చిత్రాలకు ముఖ్యంగా ఫ్యామిలీ అడియన్స్, లేడీ ఫ్యాన్స్ ఎక్కువగా ఉంటారు. తెరపై ఎన్నో వైవిధ్యమైన పాత్రలు పోషించి తనదైన ముద్ర వేశారు. ఇదిలా ఉంటే.. గతంలో ఓ ఇంటర్వ్యూలో ఆయన మాట్లాడుతూ తన సినీ ప్రయాణంతోపాటు టాలీవుడ్ హీరో ఆస్తులు, సంపాదన గురించి చేసిన కామెంట్స్ ఇప్పుడు సోషల్ మీడియాలో వైరల్ గా మారాయి.

Chandra Mohan: ఆ హీరో ఆస్తులు చూడటానికే సగం రోజు పట్టింది.. అయినా నా దగ్గర 2 లక్షలు అప్పు తీసుకుని ఏం చేశాడంటే.. చంద్రమోహన్..
Chandra Mohan About Sobhan Babu Real Estate
Rajitha Chanti
|

Updated on: Oct 30, 2026 | 3:05 PM

Share

దివంగత సీనియర్ నటుడు చంద్రమోహన్ గతంలో ఓ ఇంటర్వ్యూలో చేసిన కామెంట్స్ ఇప్పుడు సోషల్ మీడియాలో వైరల్ గా మారాయి. దివంగత నటుడు శోభన్ బాబుతో తనకున్న దశాబ్దాల అనుబంధాన్ని, స్నేహాన్ని, అలాగే ఆయన అద్భుతమైన ఆర్థిక ఆలోచనలను ఆ ఇంటర్వ్యూలో ఆయన పంచుకున్నారు. ఇద్దరూ ఏరా అని పిలుచుకునేంత సన్నిహితంగా ఉండేవారని, శోభన్ బాబు తన జీవితంలో ఒక మార్గదర్శి, తత్వవేత్త అని చంద్రమోహన్ వివరించారు. ఇండస్ట్రీ మద్రాస్ నుంచి హైదరాబాద్‌కు మారినప్పుడు రామారావు గారు అందరినీ రమ్మని ఆహ్వానించారు. అప్పుడు తాను, శోభన్ బాబు మొదట రానని చెప్పిన వారిలో ఉన్నామని చంద్రమోహన్ తెలిపారు. శోభన్ బాబు “హైదరాబాద్‌కు వెళ్లి అందరితో కలిస్తే మన మర్యాద ఉండదు, దూరంగా ఉంటేనే గ్లామర్ ఉంటుంది” అని చెప్పేవారని, తాను ఆయన మాటను నమ్మి కొంతకాలం మద్రాస్‌లోనే కొనసాగానని చంద్రమోహన్ గుర్తు చేసుకున్నారు. అప్పట్లో ప్రొడ్యూసర్‌లు మద్రాస్‌లో ఉన్న నటుల కోసం ఫ్లైట్, లాడ్జింగ్ ఖర్చులు భరించేవారని, తర్వాత తాను ప్యాకేజీ సిస్టమ్‌కు మారాను అని వివరించారు. ఈ ప్యాకేజీలో తన ప్రయాణం, వసతి ఖర్చులు తానే చూసుకునేలా, కేవలం రెమ్యూనరేషన్ మాత్రమే తీసుకునేలా మాట్లాడుకునేవాడినని చెప్పారు.

శోభన్ బాబు కేవలం గొప్ప నటుడే కాదు, అసాధారణమైన ఆర్థిక దక్షత గల వ్యక్తి అని చంద్రమోహన్ ప్రశంసించారు. “భూమిపై పెట్టుబడులు పెట్టండిరా. మనుషులు పెరుగుతారు, భూమి పెరగదు. కాబట్టి భూమికి ఎప్పుడూ డిమాండ్ ఉంటుంది. అది నీదైతే ఇంటిలో కూర్చొని డిమాండ్ చేయవచ్చు” అని శోభన్ బాబు తమకు, మురళీ మోహన్‌కు సలహా ఇచ్చేవారని చంద్రమోహన్ తెలిపారు. ఈ సలహా తాను కూడా పాటిస్తూ, సంపాదించిన ప్రతి పైసాను స్టేటస్ కోసం కాకుండా భూమిపైనే పెట్టానని శోభన్ బాబు చెప్పేవారని ఆయన పేర్కొన్నారు. శోభన్ బాబు సంపాదించిన ఆస్తుల గురించి మాట్లాడుతూ, ఒకసారి తన కారులో అన్నా నగర్‌లోని తన ఆస్తులను చూపించడానికి రమ్మని శోభన్ బాబు అడిగారని చంద్రమోహన్ గుర్తు చేసుకున్నారు. అన్నా నగర్‌లోని ఆయన స్థలాలను చూపించడానికి సుమారు ఒక పూట పట్టిందని, అక్కడ దాదాపు 18 ప్లాట్లు, బిల్డింగులు ఉన్నాయని చెప్పారు. ప్రతి మూడు బిల్డింగులకు ఒక మేనేజర్‌ను నియమించి, వారి ద్వారా అద్దె వసూళ్లు, నిర్వహణ చూసుకునేవారని తెలిపారు. వీరందరికీ ఒక జనరల్ మేనేజర్ ఉండేవారని, ఆయన అన్ని వివరాలను శోభన్ బాబుకు అందించేవారని వివరించారు.

అంతేకాకుండా, శోభన్ బాబు కేవలం 2 లక్షల రూపాయలను చంద్రమోహన్ నుంచి అప్పుగా తీసుకుని 30 లక్షల విలువైన 30 ఎకరాల తోటను కొనుగోలు చేసిన సంఘటనను వెల్లడించారు. ఆ తోటను కొనేటప్పుడు M.G.R. వంటి పెద్దవారు కూడా పోటీకి వచ్చారని, అయితే శోభన్ బాబు ఆ తోటను సొంతం చేసుకోగలిగారని చెప్పారు. ఆ 30 ఎకరాల తోటలో కొబ్బరి చెట్లతో పాటు ఆవులు, పెద్ద గెస్ట్ హౌస్ ఉన్నాయని వివరించారు. శోభన్ బాబు తన నలుగురు పిల్లల పెళ్లిళ్లను (ముగ్గురు ఆడపిల్లలు, ఒక మగపిల్లవాడు) ఆ తోటలోనే ఘనంగా జరిపారని చంద్రమోహన్ తెలిపారు. యావత్ సినీ పరిశ్రమ అంతా ఆ పెళ్లిళ్లకు హాజరైందని, జనరేటర్లు పెట్టి, విజయవాడ నుంచి కోళ్లను తెప్పించి అద్భుతంగా నిర్వహించారని గుర్తుచేసుకున్నారు. శోభన్ బాబు చాలా సెంటిమెంట్‌కు ప్రాధాన్యత ఇచ్చేవారని, చంద్రమోహన్ నుంచి తీసుకున్న 2 లక్షల రూపాయలను తన ఆస్తుల కొనుగోలుకు సెంటిమెంట్ అడ్వాన్స్‌గా భావించేవారని తెలిపారు.

తనకు కొడుకు లేకపోవడం వల్ల ఆస్తులను నిర్వహించడానికి ఒక మంచి వ్యక్తి దొరకలేదని, అందువల్లే శోభన్ బాబు స్థాయిలో తాను రియల్ ఎస్టేట్‌లో పెట్టుబడులు పెట్టలేకపోయానని చంద్రమోహన్ విచారం వ్యక్తం చేశారు. మొత్తంగా, శోభన్ బాబు కేవలం తెలుగు సినిమాకు ఒక స్టార్ హీరో మాత్రమే కాదని, ఆయన ఒక గొప్ప దూరదృష్టి కలిగిన వ్యాపారవేత్త, రియల్ ఎస్టేట్ దిగ్గజమని చంద్రమోహన్ చెప్పిన మాటలు ఇప్పుడు మరోసారి అందరి దృష్టిని ఆకర్షిస్తున్నాయి.

ఎక్కువ మంది చదివినవి : Soundarya : సౌందర్యతో 3 బ్లాక్ బస్టర్స్ చేశా.. ఆమె భర్త ఇప్పుడు ఏం చేస్తున్నారంటే.. టాలీవుడ్ హీరో కామెంట్స్..

శోభన్ బాబు..

Sobhan Babu

Sobhan Babu

ఎక్కువ మంది చదివినవి : ఏముంటది మావ ఈ పాట.. 32 ఏళ్లుగా యూట్యూబ్‏ను షేక్ చేస్తున్న లవ్ సాంగ్.. అప్పట్లో లవర్ కోసం తెగ పాడేవారు..

Follow Us