స్టార్ హీరో కుమార్తెను అని తెలిసి కూడా..: వరలక్ష్మీ శరత్ కుమార్

సినీ ఫ్యామిలీ బ్యాక్‌గ్రౌండ్ నుంచి వచ్చినప్పటికీ.. తనకంటూ ప్రత్యేక గుర్తింపును సంపాదించుకున్నారు వరలక్ష్మీ శరత్‌కుమార్. అయితే హీరో కుమార్తె అయినప్పటికీ.. ఈమెకు కాస్టింగ్ కౌచ్ ఇబ్బందులు తప్పలేదు. కెరీర్ ప్రారంభంలో సినిమా ఆఫర్ల కోసం వెళితే.. పలువురు తనతో అసభ్యంగా ప్రవర్తించారని వరలక్ష్మీ గతంలోనూ పలుమార్లు చెప్పుకొచ్చారు. ఇక దీనిపై తాజాగా ఓ ఇంటర్వ్యూలో మరోసారి మాట్లాడిన వరలక్ష్మీ.. ‘‘ఒక స్టార్ వారసురాలిని అయినప్పటికీ అన్ని ఇబ్బందులు ఎదుర్కొన్నా.. కానీ సినిమాల కోసం నా కారెక్టర్‌ను నేను వదులుకోకూడదు అని గట్టిగా నిర్ణయించుకున్నా. అలాగే ఎదుగుతూ వచ్చా’’ అని చెప్పారు. తాను ఒక హీరో, రాజకీయ నాయకుడి కుమార్తెను అని తెలిసి కూడా కొంతమంది దర్శకులు, నిర్మాతలు చాలా అసభ్యకరంగా మాట్లాడేవారని ఆమె చెప్పుకొచ్చింది. నేను కాస్టింగ్ కౌచ్‌కు లొంగనని పలువురు ప్రముఖులు చెప్పిన ఆడియో ప్రూఫ్‌లు కూడా తన వద్ద ఉన్నాయని పేర్కొన్నారు.

‘‘అంతేకాదు మొదట్లో కాస్టింగ్ కౌచ్‌కు నేను నో చెప్పినందుకు చాలా మంది నాపై నిషేదం విధించారు. వాటన్నింటిని దాటుకొని నా స్వశక్తితో 25 సినిమాలను పూర్తి చేశా. 25మంది మంచి నిర్మాతలు, దర్శకులతో నేను పనిచేశా. ఇటీవలే 29వ సినిమాకు సంతకం చేశా’’ అని వరలక్ష్మీ తెలిపారు. మహిళలు ఇప్పటికీ ప్రతి చోట ఎన్నో ఇబ్బందులను ఎదుర్కొంటున్నారని.. వాటిపై వారు కచ్చితంగా నోరు విప్పాలని ఆమె సూచించారు. కాగా మాస్‌రాజా రవితేజ నటిస్తోన్న క్రాక్ చిత్రంలో వరలక్ష్మీ శరత్‌కుమార్ ఓ కీలక పాత్రలో నటిస్తోన్న విషయం తెలిసిందే.