
Meghalaya Accident: మేఘాలయలో ఘోర రోడ్డు ప్రమాదం చోటుచేసుకుంది. ప్రయాణికులతో వెళుతున్న బస్సు నదిలోకి దూసుకెళ్లింది. ఈ ఘటనలో నలుగురు దుర్మరణం చెందారు. మరో ఇద్దరు నీటిలో గల్లంతు కాగా.. మరికొంతమందికి తీవ్రగాయాలయ్యాయి. ఈ ఘటన మేఘాలయలోని నోంగ్చ్రామ్ సమీపంలో జరిగింది. బుధవారం అర్థరాత్రి తురా నుంచి షిల్లాంగ్ నగరానికి వెళుతున్న బస్సు.. ప్రమాదవశాత్తు నోంగ్చ్రామ్లోని రింగ్ది నదిలో పడిపోయింది. వంతనపైనుంచి నీటిలో బోల్తా పడింది. ఈ దుర్ఘటనలో ఇప్పటివరకు నలుగరు ప్రయాణికులు మరణించారని పోలీసులు వెల్లడించారు. మరో ఇద్దరు గల్లంతైనట్లు పేర్కొంటున్నారు. కాగా.. ప్రమాదం జరిగిన బస్సులో 22 మంది ప్రయాణికులున్నారని ఈస్ట్ గారో హిల్స్ పోలీసులు తెలిపారు.
సమాచారం అందుకున్న పోలీసులు వెంటనే సంఘటనా స్థలానికి చేరుకుని సహాయక చర్యలు చేపట్టారు. సిబ్బంది రంగంలోకి దిగి 16 మంది ప్రయాణికులను రక్షించినట్లు పోలీసులు వెల్లడించారు. క్షతగాత్రులను ఆసుపత్రికి తరలించామని చికత్స అందుతుందని వెల్లడించారు. బస్సులోనుంచి నాలుగు మృతదేహాలను వెలికితీశామని.. మరో రెండు మృతదేహాల కోసం గాలిస్తున్నట్లు వెల్లడించారు. మృతుల్లో బస్సు డ్రైవరు కూడా ఉన్నాడని పోలీసులు తెలిపారు. కాగా.. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.
Also Read: