Hyderabad Crime: ఇల్లు అమ్మిన సొమ్ము ఇవ్వలేదని, తండ్రి, మామను కొట్టి చంపిన యువకుడు

సమాజంలో మానవత్వం మంటగలుస్తోంది. కాసుల కోసం కన్నవారిపై కసాయిల్లా ప్రవర్తిస్తున్నారు. హైదరాబాద్ శివారులో దారుణం వెలుగు చూసింది. పట్టపగలు నడి రోడ్డు మీద ఓ యువకుడు రెచ్చిపోయాడు. అందరు చూస్తుండగానే కన్న తండ్రి, మేనమామపై విచక్షణారహితంగా దాడి చేశాడు. చుట్టూ ఉన్నవారు నిశ్చేష్టులయ్యారే తప్పా, అడ్డుకునే ప్రయత్నం చేయలేకపోయారు. ఈ ఘటనకు సంబంధించి కేసు నమోదు చేసుకున్న పోలీసులు దర్యాప్తు చేపట్టారు.

రంగారెడ్డి జిల్లా రాజేంద్రనగర్ మైలార్‌దేవ్ పల్లి పోలీస్ స్టేషన్ పరిధిలోని బాబుల్ రెడ్డి నగర్ ఈ దారుణం చోటు చేసుకుంది ఇల్లు అమ్మేయడం ఆ తండ్రి చేసిన పాపమైంది. ఇల్లు విక్రయించగా, అగ్రిమెంట్ కాగానే కొన్ని డబ్బులు రావడంతో రాకేష్ తండ్రి లక్ష్మీనారాయణ ఇద్దరి మధ్య గొడవలు మొదలయ్యాయి. ఇదే విషయంలో కొన్ని రోజులుగా వీరిద్దరి మధ్య వాగ్వాదం నడుస్తున్నట్టుగా స్థానికులు తెలిపారు. ఈ క్రమంలోనే మరోసారి ఘర్షణ జరిగింది. దీంతో విచక్షణ కోల్పోయిన రాకేష్ నడిరోడ్డులో తండ్రిని ఇనుప రాడుతో కొట్టి, ముఖంపై రాళ్ళు వేయడంతో అక్కడికక్కడే మృతి చెందాడు.

తండ్రిని కొట్టొద్దని విడిపించే ప్రయత్నం చేసిన మామ శ్రీనివాసుపై దాడి చేశాడు రాకేష్. ఈ ఘటనలో తీవ్రంగా గాయపడ్డ శ్రీనివాస్‌ను స్థానికులు ఉస్మానియా ఆసుపత్రికి తరలించారు. ఆసుపత్రిలో చికిత్స పొందుతూ శ్రీనివాస్ కూడా మృతి చెందినట్లు పోలీసులు వెల్లడించారు. కాగా ఈ ఘటనకు సంబంధించి సమాచారం అందుకున్న పోలీసులు కేసు నమోదు చేసుకుని దర్యాప్తు చేపట్టారు. పరారీలో ఉన్న రాకేష్ కోసం ప్రత్యేక బృందాలతో గాలింపు చేపట్టారు.

మరిన్ని క్రైమ్ వార్తల కోసం ఇక్కడ క్లిక్ చేయండి…