పెళ్లిపై క్లారిటీ ఇచ్చిన రానా

దగ్గుబాటి కుటుంబంలో పెళ్లిబాజాలు మోగనున్నాయి. తాను ప్రేమించిన మిహీకా బ‌జాజ్‌ను వివాహం చేసుకోబోతున్నారు. వీరి పెళ్లి తేదీ కూడా ఖరారైంది. ఈ ఏడాది ఆగస్ట్ 8న తన ప్రేయసి మిహీకా మెడలో రానా మూడు ముళ్లు వేయనున్నారు. ఈ విషయాన్ని రానా కుటుంబీకులు అధికారికంగా వెల్లడించారు. పెళ్లి తంతు 6,7,8 తేదీల్లో మూడు రోజుల పాటు కొనసాగనున్నట్టు తెలిపారు. పెళ్లికి ముందు రెండు రోజులు వేడుకలు ఘనంగా జరగనున్నాయి.

అతి కొద్దిమంది స్నేహితులు, బంధువులు, సన్నిహితుల సమక్షంలో రానా, మిహికాల పెళ్లి జరగనుంది. పెళ్లికి సంబంధించిన అన్ని కార్యక్రమాలు ప్రభుత్వ నియమ నిబంధనలకు లోబడే జరగనున్నాయి. పెళ్లిని తెలుగు, మార్వాడీ సంప్రదాయాల ప్రకారం ఈ వేడుకల్ని నిర్వహిస్తారు. అగస్టు నాటికి దేశంలో కరోనా వ్యాప్తి తగ్గితే… వివాహ వేడుకల్లో మార్పులు చేద్దామనే ఆలోచనలో ఉన్నారు వధూవరుల కుటుంబాలు.

రానాకి కాబోయే భార్య మిహీకా వెడ్డింగ్‌ ప్లానర్‌. ఆమె ఆలోచనలకు అనుగుణంగా, స్పెషల్ థీమ్‌తో పెళ్లి వేడుకలు జరగబోతున్నాయట. మంచి స్నేహితులుగా ఉంటూ మనసులు ఇచ్చి పుచ్చుకున్న రానా, మిహీకా జంట తమ ప్రేమ విషయాన్ని పెద్దలకి చెప్పి ఒప్పించారు. ఇటీవలే ఇరు కుటుంబాల సమక్షంలో “రోకా” వేడుక జరిగింది.