వరల్డ్ అప్డేట్: కరోనా మరణాలు @ 5.29 లక్షలు…

ప్రపంచదేశాలను కరోనా వైరస్ పట్టి పీడిస్తోంది. ఈ మహమ్మారి వ్యాప్తిని అరికట్టేందుకు దేశాలన్నీ కూడా దశల వారీగా లాక్ డౌన్ విధించినప్పటికీ ఎలాంటి ఉపయోగం లేకపోయింది. రోజురోజుకూ పాజిటివ్ కేసులు, మరణాల సంఖ్య పెరుగుతూనే ఉంది. ఇప్పటివరకు ఈ వైరస్ 213 దేశాలకు పాకింది. తాజా సమాచారం ప్రకారం ప్రపంచవ్యాప్తంగా 11,231,300 పాజిటివ్ కేసులు నమోదు కాగా, 529,909 మంది కరోనాతో చనిపోయారు. ఇదిలా ఉంటే 6,373,234 ఈ వైరస్ బారి నుంచి కోలుకుని ఆసుపత్రి నుంచి డిశ్చార్జ్ అయ్యారు. గడిచిన 24 గంటల్లో ప్రపంచంలో ఏకంగా 2,09,028 కేసులు, 5170 మరణాలు సంభవించాయి. అయితే మరణాల రేటు కంటే రికవరీ రేటు అధికంగా ఉండటంతో ప్రజలకు కాస్త ఊరటను ఇస్తోంది.

అమెరికా, బ్రెజిల్, బ్రిటన్, రష్యా దేశాల్లో కరోనా తీవ్రతరంగా ఉంది. ప్రస్తుతం అన్ని దేశాలూ లాక్ డౌన్ దశల వారీగా సడలిస్తున్న నేపథ్యంలో ఈ వైరస్ వ్యాప్తి ఎక్కువగా ఉంది. అగ్రరాజ్యం అమెరికాలో అత్యధిక కేసులు(2,892,476), మరణాలు(132,129) సంభవించాయి. అటు బ్రెజిల్ లో పాజిటివ్ కేసులు 1,545,458 నమోదు కాగా, మృతుల సంఖ్య 63,295కు చేరింది. ఇక రష్యాలో 674,515 పాజిటివ్ కేసులు, 10,027 మరణాలు నమోదయ్యాయి. భారత్‌లో కరోనా కేసులు 651,315 నమోదు కాగా, మృతుల సంఖ్య 18,695కి చేరింది.