TSPSC Group 4 Exam Today: మరికాసేపట్లో ప్రారంభంకానున్న గ్రూప్‌-4 పరీక్ష.. 8 గంటల నుంచే లోనికి ఎంట్రీ

హైదరాబాద్‌: తెలంగాణ రాష్ట్ర వ్యాప్తంగా ఈ రోజు (జూన్‌ 1) గ్రూప్‌-4 ఉద్యోగాల భర్తీకి రాతపరీక్ష జరగనుంది. ఈ పరీక్షకు దాదాపు 9.51 లక్షల మంది అభ్యర్థులు దరఖాస్తు చేసుకోగా.. వారిలో శుక్రవారం రాత్రి వరకు 8.81 లక్షల మంది హాల్‌టికెట్లను డౌన్‌లోడ్‌ చేసుకున్నట్లు టీఎస్పీయస్సీ తెల్పింది. ఇక వీరందరికీ ఈ రోజు (శనివారం) ఒకేసారి ఆఫ్‌లైన్‌ విధానంలో పరీక్ష జరగనుంది. గ్రూప్-4 పరీక్షకు రాష్ట్రవ్యాప్తంగా 2,878 పరీక్ష కేంద్రాలను ఏర్పాటు చేశారు. ఎటువంటి అవాంతరాలు జరగకుండా ఇప్పటికే కమిషన్‌ అన్నీ ఏర్పాటు చేసింది. గ్రూప్‌-4 పరీక్ష రెండు పేపర్లను రెండు సెషన్లలో నిర్వహిస్తారు. పరీక్ష సమాయానికి 15 నిమిషాల ముందే గేట్లు మూసివేయనున్నారు.

ఉదయం సెషన్‌లో జరిగే పేపర్‌-1 పరీక్షకు 8 గంటల నుంచే పరీక్ష కేంద్రంలోకి అనుమతిస్తారు. 9.45 గంటల తర్వాత గేట్లు మూసేస్తారు. అలాగే మధ్యాహ్నం జరిగే పేపర్‌-2 పరీక్షకు ఒంటి గంట నుంచే లోనికి అనుమతిస్తారు. 2.15 గంటల తర్వాత పరీక్ష కేంద్రంలోకి అనుమతి ఉండదు. పేపర్‌ 1 జనరల్‌ స్టడీస్‌ ఉదయం 10 నుంచి మధ్యాహ్నం 12.30 గంటల వరకు, పేపర్‌ 2 (సెక్రటేరియల్‌ ఎబిలిటీస్‌) మధ్యాహ్నం 2.30 నుంచి సాయంత్రం 5 గంటల వరకు జరుగుతాయి.

కాగా 8,180 గ్రూప్‌-4 సర్వీసుల భర్తీకి ఈ నియామక పరీక్ష నిర్వహిస్తోన్న సంగతి తెలిసిందే. పరీక్షకు హాజరయ్యే అభ్యర్థులు హాల్‌టికెట్‌తో పాటు ఫొటోగుర్తింపు కార్డు తప్పనిసరి తీసుకెళ్లాలి. హాల్‌టికెట్‌, ప్రశ్నపత్రం నంబరు సరిగా రాయకపోయినా, బబ్లింగ్‌ సరిగ్గా చేయకపోయినా, బ్లూ లేదా బ్లాక్‌ బాల్‌పాయింట్‌ పెన్‌ కాకుండా ఇతర ఏ పెన్‌ ఉపయోగించినా సదరు ఓఎంఆర్‌ పత్రం చెల్లుబాటు కాదని టీఎస్పీయస్సీ సూచించింది.

ఇవి కూడా చదవండి

పురుషుడిలా మారిన మహిళా టీచర్‌.. ఎందుకో తెలుసా?

ఎస్‌ఐ ఇంట్లో గుట్టలుగా నోట్ల కట్టలు.. సెల్ఫీలు దిగుతూ ఫోజులు!

సింహాన్ని దత్తత తీసుకున్న స్టార్‌ నటుడు.. ఇంతకీ ఎందుకో తెలుసా..?

మరిన్ని తెలంగాణ వార్తల కోసం క్లిక్‌ చేయండి.