TG DSC Exam Dates: డీఎస్సీకి భారీగా దరఖాస్తులు.. త్వరలో హాల్‌టికెట్లు విడుదల

హైదరాబాద్‌, జూన్‌ 23: తెలంగాణ ఉపాధ్యాయ పోస్టుల భర్తీకి సంబంధించి డీఎస్సీ దరఖాస్తు ప్రక్రియ ముగిసింది. డీఎస్సీ పరీక్షకు మొత్తం 2,79,956 దరఖాస్తులు అందినట్లు విద్యాశాఖ తెలిపింది. మొత్తం 11,062 పోస్టుల భర్తీకి విద్యాశాఖ ఈ ఏడాది ఫిబ్రవరిలో నోటిఫికేషన్‌ జారీచేసిన సంగతి తెలిసిందే. డీఈడీ, బీఈడీ పూర్తిచేసివారు టెట్‌ పరీక్షలో ఉత్తీర్ణులైన వారు మాత్రమే డీఎస్సీకి దరఖాస్తు చేసుకోవడానికి అర్హులు. సెకండరీ గ్రేడ్‌ టీచర్‌ (ఎస్జీటీ), స్కూల్‌ అసిస్టెంట్‌ (ఎస్‌ఏ) పోస్టులకు దరఖాస్తు చేసుకున్నారు. బీఈడీ పూర్తిచేసిన వారు టెట్‌ పాసైతే స్కూల్‌ అసిస్టెంట్‌లోనే రెండు మెథడాలజీ సబ్జెక్టులకు దరఖాస్తు చేసుకోవడానికి వెసులుబాటు ఉంటుంది. ఆ ప్రకారం ఒక్కో అభ్యర్ధి రెండు సబ్జెక్టులకు దరఖాస్తు చేసుకుని ఉంటే డీఎస్సీకి పోటీపడే అభ్యర్థుల సంఖ్య 2 లక్షల వరకే ఉంటుందని విద్యాశాఖ అంచనా వేస్తోంది. ఆ లెక్కన చూస్తే ఒక్కో పోస్టుకు సుమారు 25 మంది పోటీ పడుతున్నారు.

అత్యధికంగా హైదరాబాద్‌ జిల్లా నుంచి 27,027 దరఖాస్తులురాగా.. తర్వాత నల్గొండ నుంచి 15,610 దరఖాస్తులు అందాయి. 5 శాతం నాన్‌లోకల్‌ కోటా ఉండటంతో ఇతర జిల్లాల వారు సైతం హైదరాబాద్‌ జిల్లాకు దరఖాస్తు చేసుకున్నారు. దీంతో పెద్దఎత్తున దరఖాస్తులు అందాయని భావిస్తున్నారు. అతి తక్కువగా మేడ్చల్‌ జిల్లా నుంచి 2,265 మాత్రమే వచ్చాయి. ఆ తర్వాత జయశంకర్‌ భూపాలపల్లి జిల్లా నుంచి 2,828 దరఖాస్తులు అందాయి. ప్రభుత్వం డీఎస్సీకి ఉచితంగా దరఖాస్తు చేసుకునే అవకాశం ఇచ్చినందున టెట్‌లో అర్హత సాధించిన వారిలో 23,919 మంది ఫీజు చెల్లించకుండానే ఈ అవకాశాన్ని సద్వినియోగం చేసుకున్నారు. ఇక డీఎస్సీ పరీక్షలు జులై 17 నుంచి 31 వరకు ఆన్‌లైన్ లో జరగనున్న సంగతి తెలిసిందే. పరీక్షకు వారం రోజుల ముందు హాల్ టికెట్లు వెలువడే అవకాశం ఉంది.

ఇవి కూడా చదవండి

ఇదేం ప్రేమ నాయనా..! మత్తుమందిచ్చి అబ్బాయిని అమ్మాయిగా మార్చేశాడు

కల్తీసార ఘటనలో 38కిచేరిన మరణాలు..రూ.10లక్షల ఎక్స్‌గ్రేషియా ప్రకటన

ఛీ..యాక్! భోజనంలో బాగా వేయించిన జెర్రి..తిరుపతిలో హోటల్‌ నిర్వాకం

తెలంగాణ ఎమ్మెల్యే మేడిపల్లి సత్యం భార్య సూసైడ్‌..!

మరిన్ని విద్యా, ఉద్యోగ కథనాల కోసం క్లిక్‌ చేయండి.