LPG Subsidy: గ్యాస్ వినియోగదారులకు షాక్.. వెయ్యి రూపాయలకు చేరుకోనున్న వంట గ్యాస్ సిలెండర్!

LPG Subsidy: పెరుగుతున్న ద్రవ్యోల్బణం నేపధ్యంలో, సామాన్యుడు మరొక ఎదురుదెబ్బను తినే అవకాశం కనిపిస్తోంది. మీడియా నివేదికల ప్రకారం, రాబోయే రోజుల్లో వినియోగదారులు LPG సిలిండర్‌ కోసం 1,000 రూపాయలు చెల్లించాల్సి ఉంటుంది. ఎల్‌పిజి సిలిండర్‌లపై ప్రభుత్వం సబ్సిడీని నిలిపివేయవచ్చు. అయితే, ఎల్‌పిజి సిలిండర్ల ధరలను పెంచడంపై అలాంటి వార్తలేవీ ప్రభుత్వం నుంచి బయటకు రాలేదు. కానీ, ప్రభుత్వ అంతర్గత అంచనా ప్రకారం సిలిండర్ కోసం రూ .1,000 వరకు చెల్లించడానికి వినియోగదారులు సిద్ధంగా ఉన్నారని తేలింది.

LPG సిలిండర్‌కి సంబంధించి ప్రభుత్వం రెండు స్టాండ్‌లు..

మీడియా నివేదికల ప్రకారం, LPG సిలిండర్ సబ్సిడీకి సంబంధించి ప్రభుత్వం రెండు స్టాండ్‌లు తీసుకోవచ్చు. మొదటిది, ప్రభుత్వం ఇప్పుడున్నట్లుగానే నడుస్తుంది. రెండవది, ఉజ్వల పథకం కింద, ఆర్థికంగా బలహీనమైన వినియోగదారులకు మాత్రమే సబ్సిడీ ఇవ్వాలి. అయితే, సబ్సిడీ ఇవ్వడం గురించి ప్రస్తుతం ప్రభుత్వం స్పష్టంగా ఏమీ చెప్పలేదు. కానీ, ప్రస్తుతం నెలకొన్న పరిస్థితులు.. పెట్రోల్, డీజిల్ విషయంలో ప్రభుత్వ వైఖరి గమనిస్తే.. రెండో ఆప్షన్ కేంద్రం తీసుకునే సూచనలు ఎక్కువగా కనిపిస్తున్నాయి.

ప్రభుత్వంపై సబ్సిడీ భారం ఒక సంవత్సరంలో 6 సార్లు తగ్గింది.

ప్రభుత్వం వినియోగదారులకు , 2020-2021 ఆర్థిక సంవత్సరంలో రూ. 3,559 కోట్లను ఎల్పీజీ సబ్సిడీగా ఇచ్చింది. 2019-2020 ఆర్థిక సంవత్సరంలో, ఈ వ్యయం రూ .24,468 కోట్లు. అంటే, ఒక సంవత్సరంలోనే, ప్రభుత్వం సబ్సిడీని దాదాపు 6 రెట్లు తగ్గించింది.

ఇప్పుడు సబ్సిడీకి సంబంధించి నియమాలు ఇవీ..

ప్రస్తుత నిబంధనల ప్రకారం, మీ వార్షిక ఆదాయం రూ. 10 లక్షలకు మించి ఉంటే, అప్పుడు మీరు LPG సిలిండర్‌పై సబ్సిడీ ప్రయోజనాన్ని పొందలేరు. ఇది కాకుండా, మే 2020 లో కొన్ని ప్రదేశాలలో LPG పై సబ్సిడీ నిలిపివేశారు.

ఈ సంవత్సరం ఇప్పటివరకు, గ్యాస్ సిలిండర్ ధర రూ .190.50 పెరిగింది.

ఢిల్లీలో, ఈ సంవత్సరం జనవరి 1 న, LPG సిలిండర్ ధర రూ. 694. ఇప్పుడు సిలిండర్ ధర రూ. 884.50. అంటే జనవరి నుంచి దేశీయ గ్యాస్ సిలిండర్ ధర రూ .190.50 పెరిగింది. ఒకటిన్నర సంవత్సరాలలో గ్యాస్ సిలిండర్ ధర రెండింతలు పెరిగింది. గత ఏడున్నర సంవత్సరాలలో దేశీయ గ్యాస్ సిలిండర్ ధర (14.2 కిలోలు) రెట్టింపు అయింది. 2014 మార్చి 1 న 14.2 కిలోల దేశీయ గ్యాస్ సిలిండర్ ధర రూ. 410.50 అయితే ఇప్పుడు అది రూ. 884.50కు చేరింది.

దేశంలో 29 కోట్ల మందికి ఎల్‌పిజి కనెక్షన్‌లు..

భారతదేశంలో దాదాపు 29 కోట్ల మందికి ఎల్‌పిజి కనెక్షన్‌లు ఉన్నాయి. ఇందులో ఉజ్జ్వల పథకం కింద దాదాపు 8 కోట్ల LPG కనెక్షన్లు ఉన్నాయి.

ఇవి కూడా చదవండి..

Airports: వేల కోట్ల నష్టాలతో ఎయిర్ పోర్ట్స్ అథారిటీ తెరపైకి తెచ్చిన ఫార్ములా.. కేంద్రం దారెటు.?

క్రిప్టో కరెన్సీపై హెచ్చరిక.. సంచలన వ్యాఖ్యలు చేసిన సెంట్రల్‌ బ్యాంక్‌ ఎకనామిస్ట్‌.. వీడియో