Repo Rate: రెపోరేట్ ప్రకటించిన RBI.. లోన్లు తీసుకున్న వారి పరిస్థితి ఏంటి? EMI తగ్గుతుందా? పెరుగుతుందా?
ఆర్బీఐ వరుసగా మూడోసారి రెపో రేటును 5.25 శాతం వద్ద యథాతథంగా ఉంచింది. దీంతో గృహ, వ్యక్తిగత రుణాల ఈఎంఐల్లో ఎలాంటి మార్పు ఉండదు. ఇప్పటికే రెపో-లింక్డ్ రుణాలపై ఉన్నవారు గత రేటు కోతల ప్రయోజనాలను కొనసాగిస్తారు. ఎంసీఎల్ఆర్ రుణగ్రహీతలు రెపో-లింక్డ్ రుణాలకు మారాలని నిపుణులు సూచిస్తున్నారు.
Updated on: Jun 05, 2026 | 10:52 AM
భారతీయ రిజర్వ్ బ్యాంక్ జూన్ 5న జరిగిన ద్రవ్య విధాన సమీక్షలో కీలక రెపో రేటును 5.25 శాతం వద్ద యథాతథంగా కొనసాగించింది. ఆర్బిఐ గవర్నర్ సంజయ్ మల్హోత్రా నేతృత్వంలోని ద్రవ్య విధాన కమిటీ (ఎంపిసి) ఆర్థిక సంవత్సరం 2027 కోసం తన రెండవ ద్వైమాసిక విధాన సమావేశాన్ని జూన్ 3 నుండి జూన్ 5 వరకు నిర్వహించింది. వరుసగా మూడోసారి తీసుకున్న ఈ నిర్ణయంతో రుణగ్రహీతలు, డిపాజిటర్లకు స్థిరత్వం లభించనుంది. ఫిబ్రవరి 2025 నుంచి ఆర్బీఐ మొత్తం 125 బేసిస్ పాయింట్లు రెపో రేటును తగ్గించినప్పటికీ, డిసెంబర్ 2025 తర్వాత జరిగిన మూడు సమీక్షల్లో ఎలాంటి మార్పులు చేయలేదు. రెపో రేటు యథాతథంగా ఉండటంతో ఇప్పటికే రుణాలు తీసుకున్న వారి నెలవారీ ఈఎంఐల్లో ఎలాంటి మార్పు ఉండదు. అలాగే కొత్తగా రుణాలు తీసుకునే వారికి కూడా ప్రస్తుతం వడ్డీ రేట్లు స్థిరంగానే కొనసాగే అవకాశం ఉంది. ప్రభుత్వ, ప్రైవేట్ బ్యాంకులు గృహ, వాహన, వ్యక్తిగత రుణాలపై ప్రస్తుత వడ్డీ రేట్లను కొనసాగించే అవకాశాలు ఎక్కువగా ఉన్నాయి.
ఉదాహరణకు 30 సంవత్సరాల కాలానికి 8.20 శాతం వడ్డీతో తీసుకున్న రూ.50 లక్షల గృహ రుణానికి ప్రస్తుతం నెలవారీ ఈఎంఐ రూ.37,346గా ఉంది. రెపో రేటులో మార్పు లేకపోవడంతో అదే మొత్తాన్ని చెల్లించాల్సి ఉంటుంది. అలాగే 12 శాతం వడ్డీ రేటుతో ఐదేళ్ల కాలానికి తీసుకున్న రూ.5 లక్షల వ్యక్తిగత రుణానికి ఈఎంఐ రూ.11,122గానే కొనసాగుతుంది. అయితే రెపో-లింక్డ్ రుణ ఉత్పత్తులపై ఉన్న గృహ రుణగ్రహీతలు గత 125 బేసిస్ పాయింట్ల రేటు కోతల పూర్తి ప్రయోజనాన్ని ఇప్పటికే పొందుతున్నారు. రూ.50 లక్షల, 20 సంవత్సరాల గృహ రుణంపై నెలకు సుమారు రూ.3,050 వరకు ఈఎంఐ తగ్గడంతో పాటు రుణ కాలవ్యవధిలో రూ.7.34 లక్షల వరకు వడ్డీ ఆదా అవుతోంది. అదే రూ.75 లక్షల రుణంపై నెలకు దాదాపు రూ.5,800 ఆదా కాగా, మొత్తం వడ్డీ ఆదా రూ.13.94 లక్షలకు చేరుతోంది.
ఆర్థిక నిపుణుల అభిప్రాయం ప్రకారం.. ఇంకా ఎంసీఎల్ఆర్ (MCLR) ఆధారిత రుణాలపై ఉన్నవారు రెపో-లింక్డ్ రుణాలకు మారడం ద్వారా ఎక్కువ ప్రయోజనం పొందవచ్చు. ప్రస్తుత మార్కెట్ రేట్ల కంటే 50 బేసిస్ పాయింట్లు లేదా అంతకంటే ఎక్కువ వడ్డీ చెల్లిస్తున్న వారు రీఫైనాన్సింగ్ అవకాశాలను పరిశీలించడం మంచిదని సూచిస్తున్నారు. RBI తాజా నిర్ణయంతో రుణగ్రహీతలకు ఇప్పటికే లభిస్తున్న ప్రయోజనాలు కొనసాగనున్నాయి.
మరిన్ని బిజినెస్ వార్తల కోసం ఇక్కడ క్లిక్ చేయండి
