Mahila Samman Scheme: ఇక నుంచి బ్యాంకుల్లోనూ ‘మహిళా సమ్మాన్‌ సేవింగ్స్‌ సర్టిఫికేట్‌’

ఈ సంవత్సరం మహిళల కోసం కేంద్ర ప్రభుత్వం కొత్తగా రూపొందించిన మహిళా సమ్మాన్ సేవింగ్ సర్టిఫికేట్ (MSSC) 2023 పథకాన్ని ఇప్పుడు వివిధ బ్యాంకుల నుండి పొందవచ్చు. ఫిబ్రవరి బడ్జెట్‌లో నిర్మలా సీతారామన్ ఈ పొదుపు పథకాన్ని ప్రకటించారు. ఇది పోస్టాఫీసుల్లో మాత్రమే అందుబాటులో ఉండేది. ఇప్పుడు మీరు 16 బ్యాంకుల్లో మహిళా సమ్మాన్ సేవింగ్ సర్టిఫికెట్ పొందవచ్చు. 4 ప్రైవేట్ బ్యాంకులు, 12 ప్రభుత్వ యాజమాన్యంలోని బ్యాంకులు ఉన్నాయి. ఆర్థిక శాఖ ఇటీవల విడుదల చేసిన నోటిఫికేషన్‌లో మహిళా సమ్మాన్ సేవింగ్స్ పత్ర యోజన అన్ని ప్రభుత్వ బ్యాంకులు, 4 ప్రైవేట్ బ్యాంకులలో అందుబాటులో ఉంటుందని పేర్కొంది. అయితే చాలా మంది మహిళలు ఇన్వెస్ట్‌మెంట్‌ చేసేందుకు ప్రోత్సహించేందుకు మోడీ సర్కార్‌ 2023 బడ్జెట్‌ సమావేశాల్లో వన్‌టైమ్‌ సేవింగ్స్‌ స్కీమ్‌ అయిన ‘మహిళా సమ్మాన్‌ సేవింగ్స్‌ సర్టిఫికేట్‌’ను ప్రవేశపెట్టింది. ఈ స్కీమ్‌లో వారి కోసం లేదా మైనర్‌ల కోసం అకౌంట్‌ను ఓపెన్‌ చేసుకోవచ్చు. అన్ని ప్రభుత్వ రంగ బ్యాంకులు, ఐసిఐసిఐ బ్యాంక్ , యాక్సిస్ బ్యాంక్, హెచ్‌డిఎఫ్‌సి బ్యాంక్, ఐడిబిఐ బ్యాంకులు మహిళా సమ్మాన్ సేవింగ్ సర్టిఫికేట్ స్కీమ్‌ను అందించడానికి అధికారం కలిగి ఉన్నాయని అని గెజిట్ నోటిఫికేషన్‌లో పేర్కొంది.

మహిళా సమ్మాన్ సేవింగ్స్ సర్టిఫికేట్‌ 2023ని అందిస్తున్న బ్యాంకులు:

• ICICI బ్యాంక్
• యాక్సిస్ బ్యాంక్
• HDFC బ్యాంక్
• IDBI బ్యాంక్
• స్టేట్‌ బ్యాంక్‌ ఆఫ్‌ ఇండియా (ఎస్‌బీఐ)
• బ్యాంక్ ఆఫ్ బరోడా
• బ్యాంక్ ఆఫ్ ఇండియా
• బ్యాంక్ ఆఫ్ మహారాష్ట్ర
• కెనరా బ్యాంక్
• సెంట్రల్ బ్యాంక్ ఆఫ్ ఇండియా
• ఇండియన్ బ్యాంక్
• ఇండియన్ ఓవర్సీస్ బ్యాంక్
• పంజాబ్ నేషనల్ బ్యాంక్
• పంజాబ్ అండ్ సింధ్ బ్యాంక్
• యూనియన్ బ్యాంక్ ఆఫ్ ఇండియా
• UCO బ్యాంక్

  మహిళా సమ్మాన్ సేవింగ్స్ సర్టిఫికేట్ స్కీమ్ కోసం షరతులు:

• మహిళా సమ్మాన్ నిధి యోజనతో సహా వివిధ జాతీయ పొదుపు పథకాల పనితీరు కోసం బ్యాంకులు ప్రత్యేక సాఫ్ట్‌వేర్‌ను కలిగి ఉండాలి.
• స్కీమ్‌లలో జమ చేసిన డబ్బును 1 నుంచి 3 రోజులలోపు ఆర్బీఐలోని ప్రభుత్వ ఖాతాకు బదిలీ చేయాలి.
• జాతీయ పొదుపు పథకాలు అందుబాటులో లేని శాఖల జాబితాను బ్యాంకులు ముందుగానే తెలియజేయాలి.
• పొదుపు పథకంలో వచ్చే డబ్బును బదిలీ చేయడంలో బ్యాంకులు ఆలస్యం చేస్తే, వడ్డీ, డిపాజిట్ శాతం 0.5 % మొత్తాన్ని డిపాజిట్ చేసిన వ్యక్తికి పెనాల్టీగా చెల్లించాలి. 30 రోజుల కంటే ఎక్కువ ఆలస్యం అయితే శాతం 1 శాతం బ్యాంకులు పెనాల్టీగా చెల్లించాలి.

మరిన్ని బిజినెస్ వార్తల కోసం ఇక్కడ క్లిక్ చేయండి