Arattai vs WhatsApp: అరట్టైలో వాట్సాప్కు లేని ఆ 5 అద్భుత ఫీచర్లు ఏమిటో తెలుసా?
ప్రపంచవ్యాప్తంగా వాట్సాప్ ను చాలామంది వాడుతున్నప్పటికీ, భారతదేశంలో తయారైన ఉత్పత్తులకు మద్దతు ఇవ్వాలనే ప్రధాని మోదీ పిలుపు తర్వాత అరట్టైకి మంచి ఆదరణ దక్కుతోంది. ఈ యాప్ ముఖ్యంగా గోప్యతకు, భారతీయ సర్వర్లలో డేటా భద్రతకు ఎక్కువ ప్రాధాన్యత ఇస్తుంది. అంతేకాకుండా, ఇందులో ప్రకటనలు లేకుండా సందేశాలు పంపుకోవచ్చు. మరి ఈ రెండు యాప్స్ మధ్య ప్రధానంగా ఉన్న తేడాలేంటో తెలుసుకుందామా?
Updated on: Oct 03, 2025 | 6:50 PM
జోహో (Zoho) కంపెనీ తయారుచేసిన ‘అరట్టై’ అనే మెసేజింగ్ యాప్ ను వాట్సాప్ కు ప్రత్యామ్నాయంగా భారతీయ యాప్ గా చూస్తున్నారు. గోప్యత, భద్రత, కొన్ని ప్రత్యేక ఫీచర్ల విషయంలో ఈ రెండు యాప్ ల మధ్య తేడాలు ఉన్నాయి.
ముఖ్యమైన తేడాలు ఏమిటంటే: ప్రకటనలు లేవు: వాట్సాప్ ప్రకటనల ద్వారా డబ్బు సంపాదిస్తుంది. అందుకే ఇటీవల అప్ డేట్స్ ట్యాబ్ లో ప్రకటనలు చూపించడం మొదలుపెట్టింది. కానీ, అరట్టైలో ఎటువంటి ప్రకటనలు ఉండవు.
‘పాకెట్’ ఫీచర్: అరట్టైలో ‘పాకెట్’ అనే కొత్త ఫీచర్ ఉంది. దీనిలో ముఖ్యమైన మెసేజ్ లు, లింక్ లు, ఫొటోలు, రిమైండర్లను ఒక ప్రత్యేక ప్రైవేట్ స్థలంలో దాచుకోవచ్చు. దీనివల్ల వాట్సాప్ లో మనం తరచుగా మనకు మనమే మెసేజ్ పంపుకునే అవసరం ఉండదు.
డేటా భద్రత: అరట్టై యాప్ లో మీ డేటా మొత్తం భారతదేశంలోని సర్వర్లలోనే భద్రపరుస్తారు. దీని వలన మీ వ్యక్తిగత సమాచారంపై మీకు ఎక్కువ నియంత్రణ ఉంటుంది.
మల్టీ-డివైస్ సపోర్ట్: అరట్టై యాప్ ఆండ్రాయిడ్, ఐఓఎస్, విండోస్, మ్యాక్ఓఎస్, లైనక్స్ వంటి అనేక రకాల పరికరాల్లో ఒకేసారి ఎటువంటి ఇబ్బంది లేకుండా పనిచేస్తుంది.
వీడియో మీటింగ్స్: వృత్తి నిపుణుల కోసం, అరట్టైలో వేరే యాప్ అవసరం లేకుండా వీడియో కాన్ఫరెన్స్ లలో నేరుగా చేరే సౌలభ్యం ఉంది.
వాట్సాప్ కు కోట్లాది మంది యూజర్లు ఉండటం వలన అరట్టై దానిని పూర్తిగా అధిగమించడం కష్టమే. అయినప్పటికీ, అరట్టై తక్కువ కాలంలోనే 10 లక్షలకు పైగా డౌన్ లోడ్ లు సాధించడం, యాప్ స్టోర్ లో టాప్ లో నిలవడం చూస్తుంటే, గోప్యతను కోరుకునే వారికి ఇది భారతదేశంలో ఒక మంచి ప్రత్యామ్నాయంగా మారే అవకాశం ఉంది.
