Mutual Funds: మ్యూచువల్ ఫండ్స్‌లో ఇన్వెస్ట్‌మెంట్‌ ఎలా చేయాలి..? సిప్‌ అంటే ఏమిటి?

Mutual Funds

మీరు మ్యూచువల్ ఫండ్స్ లో ఇన్వెస్ట్ చేయాలని అనుకుంటున్నారా? అయితే మీకు కచ్చితంగా కొంత కన్ఫ్యూజన్ లో ఉండి ఉంటారు. ఎందుకంటే.. నెలకు 500 రూపాయలతో SIP విధానంలో ఇన్వెస్ట్ చేయాలా? ఒకేసారి అంటే లంప్సమ్ గా 50 వేల రూపాయలను ఇన్వెస్ట్ చేయాలా అనే సందిగ్ధత వెంటాడుతుంది. కదూ.. ఈ సందేహం తీరాలంటే.. ముందు సిప్‌ – లంప్సమ్ పెట్టుబడి మధ్య తేడా ఏమిటో అర్థం చేసుకోవాలి. సిప్‌ అంటే సిస్టమాటిక్ ఇన్వెస్ట్‌మెంట్ ప్లాన్. ఇందులో మీరు ప్రతి నెలా, మూడు నెలలు లేదా ఆరు నెలలపాటు క్రమశిక్షణతో ఒక ఫండ్‌లో నిర్ణీత మొత్తాన్ని పెట్టుబడి పెట్టాలి. కనీసం 100 లేదా 500 రూపాయలతో పెట్టుబడిని ప్రారంభించవచ్చు. మరోవైపు, లంప్సమ్ అంటే ఒకేసారి పెట్టుబడి పెట్టడం.

మీరు ప్రతి నెలా లేదా ప్రతి రెండు-మూడు నెలలకు మీ ఆదాయంలో కొంత భాగాన్ని క్రమం తప్పకుండా పెట్టుబడి పెట్టగలిగితే, సిప్‌ మీకు మంచి ఎంపిక. మీరు ప్రతి నెలా పెట్టుబడి పెట్టే బదులు ఒకేసారి పెద్ద మొత్తంలో పెట్టుబడి పెట్టాలనుకుంటే అలాగే రిస్క్ తీసుకునే సామర్థ్యాన్ని కలిగి ఉంటే, లంప్సమ్ పెట్టుబడి మీకు మరింత ప్రయోజనకరంగా ఉంటుంది. ఉదాహరణకు, మీకు బోనస్ గా పెద్ద మొత్తంలో సొమ్ము చేతికి అందింది లేదా పూర్వీకుల భూమి అమ్మకంపై వాటాగా మీకు ఎక్కువ మొత్తం వచ్చింది. అదీకాకుండా మీరు గత ఒకటి లేదా రెండు సంవత్సరాలలో చాలా డబ్బు సంపాదించి ఆదా చేసిన వ్యాపారవేత్త అయితే, మీరు ఈ డబ్బును మ్యూచువల్ ఫండ్‌లో ఒకేసారి పెట్టుబడి పెట్టడం మంచిది. ఏదేమైనప్పటికీ, నెలసరి జీతంపై ఆధారపడి జీవించే వారికి దానిలో కొంత మొత్తం ప్రతి నెలా సేవింగ్స్ లేదా ఇన్వెస్ట్మెంట్ చేయాలి అనుకునే వారికి సిప్‌ ఉత్తమం అని చెప్పవచ్చు.

లంప్సమ్ ఇన్వెస్ట్మెంట్ ప్రయోజనం ఏమిటంటే, పెట్టుబడిదారులు మార్కెట్‌ను నిరంతరం పర్యవేక్షించాల్సిన అవసరం లేదు. కానీ వారు ఎప్పుడు పెట్టుబడి పెట్టాలి అనేది బాగా అర్థం చేసుకోవాలి. మార్కెట్ డౌన్‌ట్రెండ్‌లో ఉన్నప్పుడు లంప్సమ్ పెట్టుబడి మరింత సముచితంగా ఉంటుంది. అదే సిప్‌ విధానంలో మీరు ఎప్పుడైనా పెట్టుబడి పెట్టవచ్చు. లంప్సమ్ ఇన్వెస్ట్‌మెంట్‌లో రిస్క్ కూడా ఎక్కువగా ఉంటుంది. అందుకే వాటిని నివారించాలని నిపుణులు సలహా ఇస్తున్నారు.ఈక్విటీ ఫండ్స్‌లో, స్టాక్ మార్కెట్ హెచ్చుతగ్గులు రాబడులపై భారీ ప్రభావం చూపుతాయి. స్టాక్ మార్కెట్ పడిపోయినప్పుడు, లంప్సమ్‌లో పెట్టుబడి పెట్టడం మంచిది. రాబడులు పొందవచ్చు. కానీ తర్వాత మార్కెట్ ఎటువైపు వెళ్తుందో అంచనా వేయడం చాలా కష్టం.

తీవ్రమైన మార్కెట్ క్షీణత సమయంలో మీరు పెద్ద మొత్తంలో నిధులను పెట్టుబడి పెట్టినట్లయితే, మీరు 8-10 సంవత్సరాలలో ఈక్విటీ ఫండ్స్‌లో ఎక్కువ లాభాలను పొందవచ్చు. కానీ తప్పుడు సమయంలో పెట్టుబడి పెట్టడం మీకు నష్ట కారణం కావచ్చు అని కూడా గుర్తుంచుకోవాలి. అంటే, స్టాక్ మార్కెట్‌పై మంచి అవగాహన ఉన్నవారు లేదా నిరంతరం మార్కెట్‌పై నిఘా ఉంచే అనుభవజ్ఞులైన పెట్టుబడిదారులకు లంప్సమ్ పెట్టుబడి మరింత ప్రయోజనకరంగా ఉంటుంది. మరోవైపు, డెట్ ఫండ్స్‌లో, మీరు చేయాల్సిందల్లా ద్రవ్యోల్బణం – వడ్డీ రేట్లు మరింత పెరుగుతాయా లేదా అని అంచనా వేయడమే. పెరుగుతున్న వడ్డీ రేట్లు – ద్రవ్యోల్బణం సమయంలో డెట్ ఫండ్‌లు అండర్ పెర్ఫామ్ చేస్తాయి.

పన్ను – పెట్టుబడి నిపుణుడు బల్వంత్ జైన్ మాట్లాడుతూ.. లంప్సమ్ డబ్బును పెట్టుబడి పెట్టడం వల్ల ప్రయోజనాలు ఉన్నాయని, అయితే రిస్క్ కూడా చాలా ఎక్కువ అనీ అంటున్నారు. మార్కెట్ ఎక్కడికి వెళ్తుందో మార్కెట్‌లోని అనుభవజ్ఞుడైన ప్లేయర్ మాత్రమే అంచనా వేయగలడు. అందుకే మధ్యస్థ మార్గం ఏమిటంటే, మీరు లిక్విడ్ డెట్ ఫండ్‌లో ఏకమొత్తాన్ని పెట్టుబడి పెట్టడం అలాగే, ఎస్‌టీపీని ఎంచుకోవడం ద్వారా ప్రతి నెలా లేదా ప్రతి మూడు నెలలకోసారి కొంత మొత్తాన్ని ఈక్విటీ ఫండ్‌లో పెట్టుబడి పెట్టడం మంచి ఎంపికగా అవుతుంది. STP అంటే సిస్టమాటిక్ ట్రాన్స్‌ఫర్ ప్లాన్. దీని ద్వారా ప్రతి నెల లేదా మూడు నెలలకు మీ లంప్సమ్ పెట్టుబడి నుండిచి నిర్ణీత మొత్తం ఈక్విటీ ఫండ్‌లోకి వెళుతుంది. అంటే మీరు ఒక విధంగా సిప్‌ లాగానే ప్రయోజనాలను పొందుతారు. లంప్సమ్ ఇన్వెస్ట్‌మెంట్ అతి పెద్ద ప్రయోజనం ఏమిటంటే, మీరు ఒక్కసారి పెట్టుబడి పెట్టడం ద్వారా ఎటువంటి జాగ్రత్తలు లేకుండా ఉండగలరు. లంప్సమ్ ఇన్వెస్ట్‌మెంట్‌తో మీరు కాంపౌండ్ ప్రయోజనం పొందుతారు. అంటే మీ రాబడులు కాంపౌండ్ పద్ధతిలో పెరుగుతూనే ఉంటాయి.

మీరు ఆన్‌లైన్‌లో అందుబాటులో ఉన్న వివిధ కాలిక్యులేటర్‌ల సహాయంతో మీ లంప్సమ్ పెట్టుబడి ఎంత పెరుగుతుందనే ఆలోచనను కూడా పొందవచ్చు. ఇక్కడ మీరు పెట్టుబడి మొత్తం, పెట్టుబడి కాలం – సంభావ్య రాబడిని నమోదు చేయాలి. దీని తర్వాత కాలిక్యులేటర్ దానిని లెక్కిస్తుంది. దీనితో పాటు, 5 లేదా 10 సంవత్సరాల తర్వాత మీరు పొందే మొత్తం మొత్తాన్ని కూడా ఇది మీకు తెలియజేస్తుంది. ఉదాహరణకు, మీరు ABC ఈక్విటీ ఫండ్‌లో రూ. 50,000 పెట్టుబడి పెట్టారు. మనం వార్షిక రాబడి 12% అనుకుంటే, ఐదేళ్లలో మొత్తం రాబడి రూ. 88,117 అవుతుంది. మీరు ఈ పెట్టుబడిని 10 సంవత్సరాల పాటు కొనసాగిస్తే, మీ రాబడి దాదాపు రెట్టింపు అవుతుంది. అంటే రూ. 1,55,678. అదేవిధంగా 15 ఏళ్లలో ఈ మొత్తం రూ.2,73,678, 20 ఏళ్లలో రూ.4,82,315 అవుతుంది. మీరు మ్యూచువల్ ఫండ్స్‌లో ఒకేసారి పెట్టుబడి పెడితే, ఎక్కువ కాలం పాటు చేయండి. మీరు ఎంచుకునే కాలం ఎక్కువ వుంటే , కాంపౌండ్ బెనిఫిట్ ఉంటుంది. మీకు మార్కెట్‌పై మంచి అవగాహన ఉంటే, అప్పుడు మాత్రమే ఏకమొత్తం పెట్టుబడి ఎంపికను ఎంచుకోండి.

మరిన్ని బిజినెస్ వార్తల కోసం ఇక్కడ క్లిక్ చేయండి