Gold Rates: రాకెట్‌లా దూసుకెళ్తున్న బంగారం ధరలు.. పెట్టుబడి విషయంలో నీలినీడలు
ప్రపంచవ్యాప్తంగా బంగారాన్ని నమ్మకమైన పెట్టుబడి ఎంపికగా భావిస్తారు. ముఖ్యంగా భారతదేశంలో బంగారాన్ని ఆభరణాలు కింద వాడతారు. అయితే కొంత మంది తరుగు, మజూరీ ఖర్చులు లేకుండా కేవలం పెట్టుబడికి వివిధ ఎంపికలను ఎంచుకుంటారు. అయితే ఇటీవల కాలంలో బంగారం ధరలు భారీగా పెరుగుతున్నాయి. ఈ స్థాయి ధరల్లో పెట్టుబడిదారులు బంగారాన్ని కొనుగోలు చేయవచ్చా? అనే భయం పెట్టుబడిదారులను వెంటాడుతుంది.
Srinu |
Updated on: Mar 17, 2025 | 2:36 PM
ఇటీవల బంగారం ఔన్సుకు 3,000 డాలర్ల మార్కును దాటింది. ప్రపంచవ్యాప్తంగా ఉన్న ఆర్థిక అనిశ్చితి, వాణిజ్య ఉద్రిక్తతలు యూఎస్‌ వడ్డీ రేటు అంచనాల నేపథ్యంలో బంగారం ధర వేగంగా పెరుగుతుంది. ఈ సంవత్సరం బంగారం ఇప్పటికే 13 ఆల్ టైమ్ గరిష్టాలను తాకింది. వరుసగా రెండో వారం కూడా దాని పెరుగుదల కొనసాగుతుంది. ద్రవ్యోల్బణ ఆందోళనలు, ఫెడరల్ రిజర్వ్ విధానాలు, భౌగోళిక రాజకీయ ఉద్రిక్తతల మిశ్రమం ఈ పెరుగుదలకు దారితీస్తోంది. ఇటీవలి సానుకూల ద్రవ్యోల్బణం ఉన్నప్పటికీ మార్కెట్ అస్థిరత కారణంగా బంగారం ఆకర్షణ బలంగా ఉంది.
ముఖ్యంగా అమెరికా అధ్యక్షుడు డొనాల్డ్ ట్రంప్ సుంకాల బెదిరింపులు వాణిజ్య యుద్ధ భయాలను తీవ్రతరం చేశాయి. ఇటీవల ట్రంప్ యూరప్ నుంచి మద్యం దిగుమతులపై 200 శాతం సుంకం విధించనున్నట్లు హెచ్చరించారు. ఇది ప్రపంచ వాణిజ్య అంతరాయాల గురించి ఆందోళనలను పెంచింది. దీంతో ఆ ప్రభావం బంగారంపై పడడంతో ధరలు విపరీతంగా పెరుగుతున్నాయి. మార్కెట్ పరిస్థితులు నాటకీయంగా మారకపోతే భౌగోళిక రాజకీయ ఉద్రిక్తతలు గణనీయంగా తగ్గడం లేదా స్టాక్ మార్కెట్ వృద్ధి కొనసాగితే బంగారం ధర పెరుగుతూనే ఉంటుంది. చారిత్రాత్మకంగా బంగారం కొత్త ధరలను చేరుకున్న తర్వాత అది గణనీయంగా తగ్గకుండా దాని విలువను నిలుపుకుంటుంది. రాబోయే నెలల్లో ఔన్సుకు 3,500 డాలర్ల వరకు పెరుగుతుందని నిపుణులు చెబుతున్నారు.
రికార్డు స్థాయిలో బంగారం ధరలు ఉన్నప్పటికీ బంగారం ద్రవ్యోల్బణానికి వ్యతిరేకంగా నమ్మకమైన పెట్టుబడిగా ఉంటుంది. స్టాక్ మార్కెట్ అస్థిరతతో పాటు ఆర్థిక అనిశ్చితి నుంచి తమ సంపదను రక్షించుకోవాలని చూస్తున్న పెట్టుబడిదారులు ఇప్పటికీ బంగారంలో పెట్టుబడికి ఆసక్తి చూపుతున్నారు. ఆర్థిక నిపుణులు సాధారణంగా మీ పోర్ట్‌ఫోలియోలో 10 శాతం కంటే ఎక్కువ బంగారానికి కేటాయించకూడదని సిఫార్సు చేస్తున్నా రు. లిక్విడ్ క్యాష్ అవసరం ఎక్కువగా ఉన్న పాత పెట్టుబడిదారులకు ఈ శాతం ఇంకా తక్కువగా ఉండవచ్చు. బంగారం బలమైన రక్షణ ఆస్తిగా పని చేస్తున్న నేపథ్యంలో స్టాక్‌లు, బాండ్‌లు, రియల్ ఎస్టేట్ పెట్టుబడులను భర్తీ చేయడానికి బంగారంలో పెట్టుబడి పెట్టాలని నిపుణులు చెబుతున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి..
