Gold Jewelry: ఇకపై ప్రతి బంగారు ఆభరణానికి ఒక ప్రత్యేక గుర్తింపు సంఖ్య.. ప్రభుత్వం మరో కీలక నిర్ణయం
Gold Jewelry: 24 క్యారెట్ల బంగారం అత్యంత స్వచ్ఛమైనది. కానీ ఆభరణాల తయారీకి సాధారణంగా 22 క్యారెట్ల బంగారాన్ని ఉపయోగిస్తారు. ధర తక్కువగా వస్తుందని హాల్మార్క్ లేని బంగారాన్ని కొని మోసపోవద్దు. ప్రభుత్వ కొత్త నిబంధనలు అమల్లోకి వస్తే, సామాన్య వినియోగదారుడికి మరింత భరోసా లభిస్తుంది.
Updated on: Apr 07, 2026 | 6:20 AM
Gold Jewelry: బంగారం కొనుగోలు చేసే వినియోగదారుల ప్రయోజనాలను రక్షించడానికి, మోసాలను అరికట్టడానికి భారత ప్రభుత్వం కీలక అడుగులు వేస్తోంది. బంగారు ఆభరణాల స్వచ్ఛతలో అక్రమాలను అరికట్టేందుకు ప్రస్తుతం ఉన్న హాల్మార్కింగ్ వ్యవస్థను మరింత పటిష్టం చేయాలని కేంద్రం ప్రతిపాదించింది.
ఏమిటీ కొత్త మార్పు?
ప్రస్తుతం దేశంలోని 400 జిల్లాల్లో హాల్మార్క్ యూనిక్ ఐడి (HUID) వ్యవస్థ అమలులో ఉంది. అయితే, ఒకే గుర్తింపు సంఖ్యను బహుళ ఆభరణాలపై ఉపయోగిస్తున్నట్లు ప్రభుత్వానికి ఫిర్యాదులు అందాయి. దీనివల్ల వినియోగదారులు తాము కొన్న బంగారం నాణ్యతపై మోసపోయే అవకాశం ఉంది. దీనిని నివారించడానికి ప్రభుత్వం ప్రతి ఆభరణానికి ఒక ప్రత్యేక గుర్తింపు సంఖ్యను కేటాయించనుంది. ఈ సంఖ్య కేవలం ఆ ఒక్క ఆభరణానికే పరిమితం అవుతుంది. అలాగే దీనిని మరే ఇతర నగపై ఉపయోగించడం సాధ్యం కాదు. ఇప్పటికే 25 జిల్లాల్లో ఈ విధానాన్ని పైలట్ ప్రాజెక్ట్గా పరీక్షించారు. అక్కడ ప్రతి నగ ఫోటో, బరువు, ఇతర వివరాలను ఆన్లైన్ పోర్టల్లో నమోదు చేశారు.
బంగారం స్వచ్ఛతను ఇంట్లోనే తనిఖీ చేయడం ఎలా?
మీరు కొనుగోలు చేసిన బంగారం అసలైనదో కాదో తెలుసుకోవడానికి ఈ కింది పద్ధతులు పాటించండి:
- BIS హాల్మార్క్ చూడండి: నగపై భారత ప్రమాణాల బ్యూరో (BIS) త్రికోణపు గుర్తు, స్వచ్ఛత (ఉదాహరణకు 22K/916), హాల్మార్కింగ్ సెంటర్ కోడ్ ఉన్నాయో లేదో స్పష్టంగా తనిఖీ చేయండి.
- అయస్కాంత పరీక్ష (Magnet Test): బంగారం సహజంగా అయస్కాంత తత్వాన్ని కలిగి ఉండదు. ఒకవేళ మీ బంగారం అయస్కాంతానికి అంటుకుంటే, అందులో ఇనుము వంటి ఇతర లోహాల మిశ్రమం ఉందని అర్థం.
- నైట్రిక్ యాసిడ్ పరీక్ష: నగపై స్వల్పంగా గీసి, అక్కడ ఒక చుక్క నైట్రిక్ యాసిడ్ వేయండి. బంగారం రంగు ఆకుపచ్చగా మారితే అది నకిలీ అని గుర్తించాలి. అసలైన బంగారంపై యాసిడ్ ఎటువంటి ప్రభావం చూపదు.
- నీటి పరీక్ష: ఒక గ్లాసు నీటిలో బంగారాన్ని వేయండి. బంగారం సాంద్రత ఎక్కువ కాబట్టి అది వెంటనే మునిగిపోతుంది. ఒకవేళ అది తేలినా లేదా నీటిపై నిలబడినా అది స్వచ్ఛమైన బంగారం కాదు.
- నమ్మకమైన దుకాణంలోనే కొనండి: ఎల్లప్పుడూ పేరున్న జ్యువెలర్స్ వద్దే బంగారం కొనండి. వారు పక్కా బిల్లుతో పాటు హాల్మార్క్ గ్యారెంటీని ఇస్తారు. ఇది భవిష్యత్తులో నగలను తిరిగి అమ్మేటప్పుడు మీకు మేలు చేస్తుంది.
24 క్యారెట్ల బంగారం అత్యంత స్వచ్ఛమైనది. కానీ ఆభరణాల తయారీకి సాధారణంగా 22 క్యారెట్ల బంగారాన్ని ఉపయోగిస్తారు. ధర తక్కువగా వస్తుందని హాల్మార్క్ లేని బంగారాన్ని కొని మోసపోవద్దు. ప్రభుత్వ కొత్త నిబంధనలు అమల్లోకి వస్తే, సామాన్య వినియోగదారుడికి మరింత భరోసా లభిస్తుంది.
