RBI: బ్యాంక్ అకౌంట్ ఉన్నవాళ్లకు గుడ్ న్యూస్.. ఆర్బీఐ కీలక ఆదేశాలు.. ఇక ఆ బాధ ఉండదు..
డిజిటల్ బ్యాంకింగ్ రోజురోజుకూ పెరుగుతున్నా.. అందులోని పారదర్శకతపై అనుమానాలు అలాగే ఉన్నాయి. కస్టమర్ల అనుమతి లేకుండానే సేవలను యాక్టివేట్ చేయడం, దాగుడుమూతల ఛార్జీలు విధించడంపై ఆర్బీఐ కొరడా ఝుళిపించింది. బ్యాంకులు తమ వెబ్సైట్లు, మొబైల్ యాప్లలో వినియోగదారులను మోసం చేసే డార్క్ ప్యాటర్న్స్పై కీలక ఆదేశాలు జారీ చేసింది.
Updated on: Feb 27, 2026 | 4:07 PM
డిజిటల్ బ్యాంకింగ్ యుగంలో మన చేతిలో మొబైల్ ఉంటే చాలు.. బ్యాంకింగ్ పనులన్నీ చిటికెలో పూర్తవుతాయి. అయితే ఈ సౌలభ్యంతో పాటు కొన్ని ప్రమాదాలు కూడా పొంచి ఉన్నాయి. ముఖ్యంగా బ్యాంక్ యాప్లు, వెబ్సైట్ల రూపకల్పనలో వినియోగదారులను తప్పుదారి పట్టించే డార్క్ ప్యాటర్న్స్ పట్ల రిజర్వ్ బ్యాంక్ ఆఫ్ ఇండియా తీవ్ర ఆగ్రహం వ్యక్తం చేసింది. ఇలాంటి మోసపూరిత విధానాలకు స్వస్తి పలకాలని బ్యాంకులకు గడువు విధించింది.
ఏమిటీ డార్క్ ప్యాటర్న్స్?
బ్యాంకింగ్ సేవలను వాడుకునేటప్పుడు మనకు తెలియకుండానే అదనపు ఛార్జీలు పడటం, అవసరం లేని ఇన్సూరెన్స్ లేదా సర్వీసులను పదేపదే పాప్ అప్ల ద్వారా చూపించడం, క్లిష్టమైన నిబంధనలతో గందరగోళానికి గురిచేయడం వంటి వాటిని డార్క్ ప్యాటర్న్స్ అంటారు. ఇవి వినియోగదారులను తప్పుదోవ పట్టించి, డబ్బులు ఖర్చు పెట్టేలా చేస్తాయి.
ఆర్బీఐ కీలక ఆదేశాలు.. 2026 జూలై డెడ్ లైన్
వినియోగదారుల ప్రయోజనాలను రక్షించడానికి ఆర్బీఐ రెస్పాన్సిబుల్ బిజినెస్ కండక్ట్ అమెండ్మెంట్ డైరెక్షన్ 2026 ముసాయిదా మార్గదర్శకాలను విడుదల చేసింది.
- బ్యాంకులు తమ వెబ్సైట్లు, మొబైల్ యాప్లలో ఉన్న అన్ని రకాల డార్క్ ప్యాటర్న్స్ను 2026 జూలై నాటికి పూర్తిగా తొలగించాలి.
- ఆర్థిక ఉత్పత్తులను ప్రచారం చేసేటప్పుడు వినియోగదారులను తప్పుదారి పట్టించే ప్రకటనలు చేయకూడదు.
- ఏదైనా కొత్త సేవను అందించే ముందు లేదా అదనపు ఛార్జీ విధించే ముందు వినియోగదారుడి నుండి స్పష్టమైన అనుమతి తీసుకోవడం తప్పనిసరి.
వినియోగదారులకు కలిగే లాభాలు:
- తాము తీసుకునే సేవలు, వాటి ఛార్జీల గురించి పూర్తి అవగాహన ఏర్పడుతుంది.
- తెలియకుండా జరిగే లావాదేవీలు ఆగిపోతాయి.
- పారదర్శకమైన విధానాల వల్ల బ్యాంకింగ్ వ్యవస్థపై కస్టమర్ల విశ్వాసం పెరుగుతుంది.
ఆర్బీఐ తీసుకున్న ఈ నిర్ణయం డిజిటల్ బ్యాంకింగ్ను మరింత సురక్షితంగా, బాధ్యతాయుతంగా మార్చనుంది. వినియోగదారులు కూడా బ్యాంకింగ్ యాప్లను ఉపయోగించేటప్పుడు నిబంధనలను జాగ్రత్తగా చదవడం మంచిది.
