AI ని చూసి భయపడొద్దు.. ఉద్యోగాలు పోవు.. కొత్త అవకాశాలు వస్తాయి: అమెజాన్ ఫౌండర్ జెఫ్ బెజోస్

కృత్రిమ మేధ (AI) ప్రపంచవ్యాప్తంగా ఉద్యోగాల భవిష్యత్తుపై తీవ్ర చర్చకు దారితీస్తోంది. AI కారణంగా లక్షలాది ఉద్యోగాలు కనుమరుగవుతాయని కొందరు నిపుణులు హెచ్చరిస్తుండగా, అమెజాన్ వ్యవస్థాపకుడు జెఫ్ బెజోస్ మాత్రం పూర్తిగా భిన్నమైన అభిప్రాయాన్ని వ్యక్తం చేశారు. AI మనుషుల ఉద్యోగాలను లాక్కోదని, పైగా భవిష్యత్తులో మరింత మంది ఉద్యోగుల అవసరాన్ని సృష్టిస్తుందని ఆయన పేర్కొన్నారు.

పారిస్‌లో జరిగిన వివాటెక్ టెక్నాలజీ కాన్ఫరెన్స్‌లో మాట్లాడిన బెజోస్, AI వల్ల మానవులు అనవసరంగా మారిపోతారనే భయాలు అతిశయోక్తి అని అన్నారు. AI ప్రధాన లక్ష్యం మనుషులను భర్తీ చేయడం కాదని, వారి సామర్థ్యాలను పెంచడమేనని స్పష్టం చేశారు. ఈ సాంకేతికత ద్వారా ప్రజలు మరింత సమర్థవంతంగా పనిచేయగలరని, ఇప్పటివరకు సమయం, వనరులు, సాంకేతిక పరిమితుల కారణంగా సాధ్యం కాని పనులను కూడా చేపట్టగలరని వివరించారు.

ప్రపంచంలో ఇంకా పరిష్కారం కోసం ఎదురుచూస్తున్న అనేక సమస్యలు ఉన్నాయని, AI వాటికి పరిష్కార మార్గాలను చూపగలదని బెజోస్ అభిప్రాయపడ్డారు. ప్రజల ఉత్పాదకత పెరిగిన కొద్దీ కొత్త పరిశ్రమలు, కొత్త వ్యాపార అవకాశాలు వెలుగులోకి వస్తాయని చెప్పారు. దీంతో ఉద్యోగాల సంఖ్య తగ్గడం కాకుండా, కొత్త రకాల ఉపాధి అవకాశాలు సృష్టించబడతాయని ఆయన విశ్వాసం వ్యక్తం చేశారు.

అయితే మరోవైపు AIపై ఆందోళనలు కూడా పెరుగుతున్నాయి. ఇటీవల నిర్వహించిన ఒక సర్వే ప్రకారం, దాదాపు సగం మంది అమెరికన్లు AI తమ ఉద్యోగాలను, తమ కుటుంబ సభ్యుల ఉద్యోగాలను ప్రభావితం చేస్తుందని భయపడుతున్నారు. ఇప్పటికే అనేక కంపెనీలు ఖర్చులు తగ్గించుకునేందుకు, సామర్థ్యాన్ని పెంచుకునేందుకు AI ఆధారిత వ్యవస్థలను అమలు చేస్తున్నాయి. అయినప్పటికీ, పారిశ్రామిక విప్లవం మాదిరిగానే AI కూడా ప్రారంభంలో సవాళ్లు సృష్టించినా, దీర్ఘకాలంలో కొత్త పరిశ్రమలు, కొత్త ఉద్యోగాలు, ఆర్థిక వృద్ధికి దారితీస్తుందని జెఫ్ బెజోస్ అభిప్రాయపడ్డారు. AI మానవులను భర్తీ చేసే శక్తి కాదు, వారి ప్రతిభను మరింత విస్తరించే సాధనమని ఆయన పేర్కొన్నారు.

మరిన్ని బిజినెస్ వార్తల కోసం ఇక్కడ క్లిక్ చేయండి..