Horoscope Today: వారి పెళ్లి ప్రయత్నాలు ఫలిస్తాయి.. 12 రాశుల వారికి రాశిఫలాలు

దిన ఫలాలు (మే 14, 2025): మేష రాశి వారికి ఆదాయంతో పాటే ఖర్చులు పెరుగుతాయి. మదుపు చేసుకోవడం మంచిది. వృషభ రాశి వారి ఆర్థిక పరిస్థితి గతం కంటే బాగా మెరుగ్గా ఉంటుంది. రావలసిన సొమ్ము కొద్ది ప్రయత్నంతో చేతికి అందుతుంది. మిథున రాశి వారికి ఆదాయానికి, ఆరోగ్యానికి ఇబ్బందేమీ ఉండదు. ఆర్థిక విషయాల్లో ఎవరికీ హామీలు ఉండవద్దు. మేష రాశి మొదలు మీన రాశి వరకు 12 రాశుల వారికి బుధవారంనాటి రాశిఫలాలు ఎలా ఉన్నాయంటే..

మేషం (అశ్విని, భరణి, కృత్తిక 1)

ఆదాయంతో పాటే ఖర్చులు పెరుగుతాయి. మదుపు చేసుకోవడం మంచిది. జీతభత్యాలు కొద్దిగా పెరిగే అవకాశం ఉంది. వృత్తి, ఉద్యోగ, వ్యాపారాలు సానుకూలంగా, లాభసాటిగా సాగిపోతాయి. నిరుద్యోగులకు ఒకటి రెండు అవకాశాలు లభిస్తాయి. పెళ్లి ప్రయత్నాలకు సానుకూల స్పందన లభిస్తుంది. ముఖ్యమైన వ్యవహారాల్లో కార్యసిద్ధి, వ్యవహార జయం కలుగుతాయి. కుటుంబ జీవితం చాలావరకు ప్రశాంతంగా ఉంటుంది. పిల్లల నుంచి శుభవార్తలు వింటారు. ఆరోగ్యం పరవా లేదు.

వృషభం (కృత్తిక 2,3,4, రోహిణి, మృగశిర 1,2)

వృత్తి, ఉద్యోగాలు సానుకూలంగా, సంతృప్తికరంగా సాగుతాయి. వ్యాపారాలు బాగా లాభిస్తాయి. ఆర్థిక పరిస్థితి గతం కంటే బాగా మెరుగ్గా ఉంటుంది. రావలసిన సొమ్ము కొద్ది ప్రయత్నంతో చేతికి అందుతుంది. మొండి బాకీలతో పాటు, బకాయిలు కూడా చేతికి అందుతాయి. ముఖ్యమైన వ్యవహారాల్లో ఆటంకాలు ఉన్నప్పటికీ సకాలంలో పూర్తి చేస్తారు. బంధువుల నుంచి పెళ్లి సంబంధానికి సంబంధించిన శుభవార్త అందుతుంది. సమాజంలో మీ మాటకు, చేతకు విలువ పెరుగుతుంది.

మిథునం (మృగశిర 3,4, ఆర్ద్ర, పునర్వసు 1,2,3)

వృత్తి, వ్యాపారాలు కొత్త పుంతలు తొక్కుతాయి. ఉద్యోగంలో పదోన్నతి లభించడానికి అవకాశం ఉంది. వృత్తి, ఉద్యోగాల రీత్యా ప్రయాణాలు చేసే అవకాశముంది. ఇంటా బయటా బరువు బాధ్యతలు పెరుగుతాయి. విశ్రాంతి దొరకని పరిస్థితి ఏర్పడుతుంది. నిరుద్యోగులకు మంచి ఆఫర్ వచ్చే సూచనలున్నాయి. పెళ్లి ప్రయత్నాలు అనుకూలిస్తాయి. ఆదాయానికి, ఆరోగ్యానికి ఇబ్బందేమీ ఉండదు. ఇతరులకు సహాయం చేసే స్థితిలో ఉంటారు. ఆర్థిక విషయాల్లో ఎవరికీ హామీలు ఉండవద్దు.

కర్కాటకం (పునర్వసు 4, పుష్యమి, ఆశ్లేష)

వృత్తి, ఉద్యోగాల్లో ప్రాధాన్యం బాగా పెరుగుతుంది. వ్యాపార వ్యవహారాలు బిజీగా సాగిపోతాయి. ఆదాయం వృద్ధి చెందడానికి అవకాశం ఉంది. ఏ పని తలపెట్టినా సునాయాసంగా పూర్తవుతుంది. సొంత పనుల మీద ఎక్కువగా దృష్టి పెట్టడం మంచిది. ఒకటి రెండు వ్యక్తిగత సమస్యలు పరిష్కారం అవుతాయి. నిరుద్యోగులు తమకు అందిన అవకాశాలను సద్వినియోగం చేసుకోవడం మంచిది. ఆర్థిక, ఆస్తి వ్యవహారాల్లో జాగ్రత్తగా ఉండాల్సిన అవసరం ఉంది. ఆరోగ్యం బాగానే ఉంటుంది.

సింహం (మఖ, పుబ్బ, ఉత్తర 1)

ఉద్యోగంలో అధికారులు, సహోద్యోగుల నుంచి సహకారం అందుతుంది. నిరుద్యోగులకు మంచి కంపెనీల నుంచి ఆఫర్లు అందుతాయి. ఏ ప్రయత్నం తలపెట్టినా విజయం సాధిస్తారు. కొత్త ఆదాయ మార్గాల గురించి ఆలోచిస్తారు. వ్యాపారాల్లో నష్టాల నుంచి, ఆర్థిక ఒత్తిళ్ల నుంచి చాలా వరకు బయటపడతారు. పిల్లల చదువుల మీద శ్రద్ధ చూపిస్తారు. రావలసిన డబ్బు చేతికి అంది అవసరాలు తీరిపోతాయి. వృథా ఖర్చుల్ని తగ్గించుకోవడం మంచిది. పెళ్లి ప్రయత్నాలు ఫలిస్తాయి.

కన్య (ఉత్తర 2,3,4, హస్త, చిత్త 1,2)

ఉద్యోగ ప్రయత్నాల్లో ఒకటి రెండు శుభ వార్తలు వింటారు. పెళ్లి ప్రయత్నాలు ఒక కొలిక్కి వస్తాయి. ఆస్తి వివాదానికి సంబంధించి బంధువుల నుంచి శుభవార్త అందుతుంది. కుటుంబ పెద్దల నుంచి వారసత్వ ఆస్తి సంక్రమించే అవకాశం ఉంది. ఉన్నతస్థాయి వ్యక్తులతో పరిచయాలు పెరుగుతాయి. ఇష్టమైన ఆలయాలు సందర్శిస్తారు. వృత్తి, ఉద్యోగ, వ్యాపారాల్లో గుర్తింపు ఏర్పడుతుంది. శ్రమకు తగ్గ ఫలితం ఉంటుంది. విదేశాల్లో ఉన్న పిల్లల నుంచి ఆశించిన సమాచారం అందుతుంది.

తుల (చిత్త 3,4, స్వాతి, విశాఖ 1,2,3)

ఆదాయం బాగా పెరుగుతుంది. రాదనుకుని వదిలేసుకున్న సొమ్మును కూడా గట్టి ప్రయత్నంతో రాబట్టుకుంటారు. మొండి బాకీలు కూడా వసూలవుతాయి. ముఖ్యమైన ప్రయత్నాలకు గ్రహ బలం బాగా అనుకూలంగా ఉంది. ముఖ్యమైన పనులు, వ్యవహారాల్లో విజయం సాధిస్తారు. అనుకున్న పనులు అనుకున్నట్టు పూర్తవుతాయి. కుటుంబసమేతంగా ఇష్టమైన ఆలయాలు సందర్శిస్తారు. వృత్తి, వ్యాపార, ఉద్యోగాల్లో అనుకూలతలు పెరుగుతాయి. ఆరోగ్యం అనుకూలంగా ఉంటుంది.

వృశ్చికం (విశాఖ 4, అనూరాధ, జ్యేష్ట)

ఆదాయం నిలకడగా సాగిపోతుంది. ఒకటి రెండు ఆర్థిక, వ్యక్తిగత సమస్యల నుంచి బయటపడే అవకాశం ఉంది. ఉద్యోగంలో బరువు బాధ్యతలు బాగా పెరిగే అవకాశముంది. వృత్తి, వ్యాపారాలు సానుకూలంగా సాగిపోతాయి. నిరుద్యోగులు సొంత ఊర్లోనే ఉద్యోగం సంపాదించుకునే అవకాశం ఉంది. ఆర్థిక విషయాల్లో కుటుంబ సభ్యుల నుంచి కొద్దిగా ఒత్తిడి ఉంటుంది. ముఖ్యమైన వ్యవహారాలు నిదానంగా పూర్తవుతాయి. ఆస్తి వివాదం పరిష్కారం కావచ్చు. ఆరోగ్యం పరవాలేదనిపిస్తుంది.

ధనుస్సు (మూల, పూర్వాషాఢ, ఉత్తరాషాఢ 1)

ఆర్థిక విషయాల్లో రోజంతా చాలావరకు అనుకూలంగా గడిచిపోతుంది. ఇష్టమైన బంధుమిత్రులతో కాలక్షేపం చేస్తారు. ప్రతి ప్రయత్నమూ, ప్రతి వ్యవహారమూ విజయవంతంగా పూర్తవుతాయి. ఎదురు చూస్తున్న శుభవార్తలు వింటారు. ఉద్యోగ, పెళ్లి ప్రయత్నాలు తప్పకుండా మంచి ఫలితాలనిస్తాయి. వృత్తి, వ్యాపార, ఉద్యోగాల్లో అనుకూలతలు ఎక్కువగా ఉంటాయి. ఒకటి రెండు వ్యక్తి గత, ఆర్థిక సమస్యలను పరిష్కరించుకుంటారు. దాంపత్య జీవితంలో అన్యోన్యత పెరుగుతుంది.

మకరం (ఉత్తరాషాఢ 2,3,4, శ్రవణం, ధనిష్ట 1,2)

ఆర్థిక పరిస్థితి బాగా మెరుగ్గా ఉంటుంది. అదనపు ఆదాయ మార్గాలు విస్తరిస్తాయి. ఆదాయానికి, ఆరోగ్యానికి ఇబ్బంది ఉండకపోవచ్చు. ఇంటా బయటా మాటకు, చేతకు విలువ పెరుగుతుంది. వృత్తి, ఉద్యోగాల్లో మీ పనితీరు అధికారులకు సంతృప్తి కలిగిస్తుంది. ధనపరంగా కుటుంబ సభ్యుల నుంచి ఒత్తిడి ఉంటుంది. సొంత పనుల మీద శ్రద్ధ పెట్టడం మంచిది. కొందరు బంధుమిత్రులకు బాగా అండగా నిలబడతారు. నిరుద్యోగులకు కొద్ది ప్రయత్నంతో మంచి ఉద్యోగం వచ్చే అవకాశం ఉంది.

కుంభం (ధనిష్ట 3,4, శతభిషం, పూర్వాభాద్ర 1,2,3)

వృత్తి, వ్యాపారాల్లో చిన్నపాటి మార్పులు చేపట్టి లబ్ది పొందుతారు. ఉద్యోగంలో మీ పనితీరుతో అధికారులను ఆకట్టుకుంటారు. పని భారం కాస్తంత ఎక్కువగా ఉండే అవకాశం ఉంది. ఆర్థిక వ్యవ హారాల్లో కూడా కీలక నిర్ణయాలు అమలు చేస్తారు. ఒకటి రెండు ముఖ్యమైన వ్యక్తిగత సమస్యలకు పరిష్కారం లభిస్తుంది. ఉద్యోగులు, నిరుద్యోగులకు కొత్త ఆఫర్లు అందుతాయి. ముఖ్యమైన వ్యవహారాల్లో శ్రమాధిక్యత ఉంటుంది. పిల్లలు పురోగతి సాధిస్తారు. ఒకటి రెండు శుభవార్తలు వింటారు.

మీనం (పూర్వాభాద్ర 4, ఉత్తరాభాద్ర, రేవతి)

ఆర్థిక పరిస్థితి మునుపటి కంటే బాగా మెరుగుపడుతుంది. రావలసిన సొమ్మును, బాకీలను రాబట్టుకుంటారు. ఒకటి రెండు వ్యక్తిగత కుటుంబ సమస్యలు పరిష్కార దిశగా సాగుతాయి. వస్త్రా భరణాలు కొనుగోలు చేస్తారు. వృత్తి, ఉద్యోగాల్లో ఉత్సాహకర వాతావరణం ఉంటుంది. కొత్త పనులు చేపడతారు. తల్లితండ్రుల్లో ఒకరి ఆరోగ్యం ఆందోళన కలిగిస్తుంది. ఆశించిన పెళ్లి సంబంధం కుదురుతుంది. సొంత పనుల మీద శ్రద్ధ పెట్టడం మంచిది. ఆహార, విహారాల్లో జాగ్రత్తలు పాటించాల్సి ఉంటుంది.